Lukas 2

BSNP Edita

Lukas 2

2:1 Awor a sosodé den e dianan ei ku Cesar Augusto a saka un dekreto, ku mester a tene un senso di henter e mundu habitá.

2:2 E senso aki a tuma lugá pa promé biaha tempu ku Sirenio tabata gobernadó di Siria.

2:3 I tur hende tabata bai pa wòrdu registrá pa e senso, kada un na su mes stat.

2:4 I Jose tambe a sali for di Galilea, for di e stat Nazarèt, pa bai Judea, na e stat di David ku yama Bètlehèm, pasobra e tabata di e kas i famia di David,

2:5 pa wòrdu registrá huntu ku Maria, kende tabata komprometí kuné i tabata spera yu.

2:6 I a sosodé ku mientras nan tabata ayanan, e dianan a keda kumplí pa e duna lus.

2:7 I el a duna lus na su yu hòmber primogénito; i el a lor'E den paña i a pon'E den un pesebre, pasobra no tabatin lugá pa nan den posada.

2:8 I den e mesun region tabatin wardadónan ku tabata keda den e sabananan, i ku anochi tabata tene warda riba nan tou di karné.

2:9 I direpiente un angel di Señor a presentá nan dilanti, i e gloria di Señor tabata resplandesé tur rònt di nan; i nan a spanta mashá.

2:10 I e angel a bisa nan: "No tene miedu; pasobra mira, mi ta trese bon nobo di gran goso pa boso ku lo ta pa henter e pueblo;

2:11 pasobra awe den e stat di David a nase pa boso un Salbador, Kende ta Cristo e Señor.

2:12 I esaki lo ta e señal pa boso: boso lo haña un bebi lorá den paña, i drumí den un pesebre."

2:13 I direpiente a paresé huntu ku e angel un multitut di e ehérsito selestial, dunando alabansa na Dios i bisando:

2:14 "Gloria na Dios den halturanan, i na tera pas meimei di hende ku ta agrad'E."

2:15 I a sosodé ku ora e angelnan a laga nan i a bai shelu, e wardadónan a kuminsá bisa otro: "Laga nos bai Bètlehèm awor i mira e kos aki ku a sosodé i ku Señor a partisipá na nos."

G5613 -- I a sosodé ku ora -> When
G32a -- e angelnan -> the angels
G565 -- a laga -> had gone
G565 -- a laga -> away
G3772 -- nan i a bai shelu -> from them into heaven
G4166 -- , e wardadónan -> the shepherds
G2980 -- a kuminsá bisa -> ] saying
G240 -- otro -> to one
G240 -- otro -> another
G1330 -- : "Laga nos bai -> Let us go
G1330 -- Laga nos bai -> straight
G965 -- Bètlehèm -> to Bethlehem
G1211 -- awor -> then
G3708 -- i mira -> and see
G3778 -- e kos aki -> this
G4487 -- e kos aki -> thing
G1096 -- ku a sosodé -> that has happened
G3739 -- i ku -> which
G2962 -- Señor -> the Lord
G1107 -- a partisipá -> has made
G1107 -- a partisipá -> known

2:16 I nan a bai purá i a haña Maria i Jose, i e bebi ku tabata drumí den pesebre.

2:17 I ora nan a mira esaki, nan a partisipá loke a wòrdu bisá na nan tokante di e Yu aki.

2:18 I tur ku a tende esaki a keda strañá di e kosnan ku e wardadónan a konta nan.

2:19 Ma Maria a warda tur e kosnan aki, i a keda pensa riba nan den su kurason.

2:20 I e wardadónan a bai bèk, glorifikando i alabando Dios pa tur loke nan a tende i mira, manera a wòrdu kontá na nan.

2:21 I riba e di ocho dia, ora ku a bira tempu pa sirkumsid'E, nan a dun'E e nòmber Jesus, manera e angel a yam'E promé ku El a wòrdu konsebí den matris.

2:22 I ora ku e dianan di nan purifikashon, di akuèrdo ku e lei di Moisés, a keda kumplí, nan a hib'E Jerusalèm pa present'E na Señor

2:23 (manera ta pará skirbí den e Lei di Señor: "Tur yu hòmber primogénito ku habri matris lo wòrdu yamá santu pa SEÑOR"),

2:24 i pa ofresé un sakrifisio di akuèrdo ku loke a wòrdu bisá den e Lei di Señor: "Dos tòrteldùif òf dos pichon."

2:25 I mira, tabatin un hòmber na Jerusalèm ku yama Simeon; i e hòmber aki tabata hustu i deboto i tabata spera e konsolashon di Israel; i Spiritu Santu tabata riba djé.

2:26 I a wòrdu revelá na djé dor di Spiritu Santu ku e lo no mira morto promé ku el a mira e Cristo di Señor.

2:27 I moví dor di e Spiritu el a bai den tèmpel; i ora ku e mayornan a trese e yu Jesus, pa hasi kunE segun e kustumber di Lei,

2:28 el a tum'E den su brasanan, i el a bendishoná Dios i a bisa:

2:29 "Awor Señor, Bo ta laga bo sirbidó bai na pas, segun Bo palabra;

2:30 pasobra mi wowonan a mira Bo salbashon,

2:31 ku Bo a prepará den presensia di tur pueblo,

2:32 un lus di revelashon pa e paganonan, i e gloria di Bo pueblo Israel."

2:33 I Su tata i mama a keda strañá di e kosnan ku tabata wòrdu bisá di djE.

2:34 I Simeon a bendishoná nan i a bisa Su mama Maria: "Mira, e Yu aki ta destiná pa e kaída i pa e lantamentu di hopi hende na Israel i pa un señal ku lo wòrdu kontradisí--

2:35 i un spada lo traspasá asta bo mes alma--pa e pensamentunan di hopi kurason wòrdu revelá."

2:36 I tabatin un profeta, Ana, yu muhé di Fanuel, di e tribu di Aser. E tabata di edat hopi avansá i el a biba shete aña ku su esposo despues di e dia di su matrimonio,

2:37 i despues komo biuda te na edat di ochent'i kuater aña. I nunka e no tabata sali for di tèmpel, i tabata sirbi di dia i anochi ku yunamentu i orashon.

2:38 I na e momento ei el a yega serka i a kuminsá duna gradisimentu na Dios, i a sigui papia di djE ku tur esnan ku tabata spera e redenshon di Jerusalèm.

2:39 I ora nan a kumpli ku tur kos, di akuèrdo ku e Lei di Señor, nan a bolbe Galilea, na nan mes stat Nazarèt.

2:40 I e Mucha tabata krese i bira fuerte i a wòrdu yená ku sabiduria; i e grasia di Dios tabata riba djE.

2:41 I tur aña Su mayornan tabata bai Jerusalèm pa e Fiesta di Pasku.

2:42 I ora ku El a yega na edat di diesdos aña, nan a bai ayanan manera tabata e kustumber di e Fiesta;

2:43 i despues ku e dianan di e Fiesta a pasa, ora ku su mayornan tabata riba kaminda pa bai kas, e mucha Jesus a ked'atras na Jerusalèm, sin ku nan a ripará.

2:44 Nan a kere ku E tabata den e grupo di biahero i nan a sigui pa un distansia di ún dia di biahe; i nan a kuminsá busk'E entre nan famianan i konosínan.

2:45 I ora nan no a hañ'E, nan a bolbe Jerusalèm pa busk'E.

2:46 I a sosodé ku despues di tres dia nan a hañ'E den tèmpel, sintá meimei di e siñadónan, ta skucha nan i ta hasi nan pregunta.

2:47 I tur esnan ku a tend'E a keda strañá di Su komprendementu i Su kontestanan.

2:48 I ora nan a mir'E, nan a keda asombrá; i Su mama a bis'E: "Yu, pakiko Bo a hasi e kos aki ku nos? Mira, Bo tata i ami tabata buskaBo ansiosamente."

2:49 El a bisa nan: "Pakiko boso tabata buskaMi? Boso no tabata sa ku Mi mester tabata den e kas di Mi Tata?"

2:50 I nan no tabata komprendé e palabranan ku E tabata papia ku nan.

2:51 I El a bai ku nan i a yega Nazarèt; i El a keda sometí na nan; i Su mama tabata warda tur e palabranan aki den su kurason.

2:52 I Jesus tabata krese den sabiduria i estatura, i den grasia serka Dios i hende.

Lukas 1 Lukas 3