Mateo 26

BSNP Edita

Mateo 26

26:1 I a sosodé ku ora Jesus a kaba di papia tur e palabranan aki, El a bisa Su disipelnan:

26:2 "Boso sa ku aki dos dia ta e Fiesta di Pasku, i e Yu di Hende lo wòrdu entregá pa wòrdu krusifiká."

26:3 E ora ei e saserdotenan prinsipal i e ansianonan di e pueblo a reuní den palasio di e sumosaserdote ku yama Kaifas;

26:4 i huntu nan a traha kòmplòt pa na skondí gara Jesus i mat'E.

26:5 Ma nan tabata bisa: "No durante di e Fiesta, pa no bin un lantamentu den e pueblo."

26:6 Awor ora Jesus tabata na Betania, na kas di Simon e leproso,

26:7 a bin un muhé serka djE ku un butishi di alabaster ku perfume di gran balor aden, i el a bash'é riba Su kabes mientras ku E tabata sintá na mesa.

26:8 Ma ora ku e disipelnan a mira esaki, nan a keda indigná i a bisa: "Pakiko e drispidimentu aki?

26:9 Pasobra e perfume aki por a wòrdu bendí na preis haltu i e plaka duná na hende pober."

26:10 Ma Jesus a ripará esaki i a bisa nan: "Pakiko boso ta molestiá e muhé? Pasobra el a hasi un bon obra na Mi.

26:11 Pasobra e pobernan boso tin semper serka boso, ma Ami boso no tin semper.

26:12 Pasobra ora ku el a basha e perfume aki riba Mi kurpa, el a hasié pa preparáMi pa deramentu.

26:13 Di bèrdat Mi ta bisa boso, unda ku e evangelio aki wòrdu prediká den henter mundu, loke ku e muhé aki a hasi tambe lo wòrdu kontá na su rekuèrdo."

26:14 E ora ei un di e diesdosnan ku yama Judas Iskariot a bai serka e saserdotenan prinsipal,

26:15 i a puntra: "Kiko boso kier dunami si mi entregu'E na boso?" I nan a dun'é trinta pida plata.

26:16 I for di e ora ei e tabata buska un bon oportunidat pa entregu'E.

26:17 Awor riba e promé dia di e Fiesta di Pan Sin Zürdeg e disipelnan a bin serka Jesus, bisando: "Unda Bo kier pa nos prepará pa Bo pa kome e Pasku?"

26:18 I El a bisa: "Bai den stat serka tal i tal hende, i bis'é: 'E Maestro ta bisa: "Mi tempu ta serka; Mi ta bai tene e Pasku na bo kas huntu ku Mi disipelnan."'"

26:19 I e disipelnan a hasi manera Jesus a manda nan, i nan a prepará e Pasku.

26:20 Awor ora ku a bira nochi, E tabata sintá na mesa ku e diesdos disipelnan.

26:21 I ora nan tabata kome, El a bisa: "Di bèrdat Mi ta bisa boso ku un di boso lo traishonáMi."

26:22 I masha tristu mes kada un di nan a kuminsá puntr'E: "No ta ami tòg, Señor?"

26:23 I El a kontestá i a bisa: "Esun ku a hinka su man huntu ku Mi den e kòmchi ta esun ku lo traishonáMi.

26:24 E Yu di Hende mester bai, manera ta pará skirbí di djE, ma ai di e hòmber ei dor di ken e Yu di Hende ta wòrdu traishoná! Lo tabata bon pa e hòmber ei si e no a nase nunka."

26:25 I Judas, kende a traishon'E, a kontestá i a bisa: "No ta ami tòg, Rabi?" El a bis'é: "Bo mes a bisa esei."

26:26 I mientras ku nan tabata kome, Jesus a kohe pan, i despues di a bendishon'é, El a kibr'é i a duna Su disipelnan i a bisa: "Tuma, kome; esaki ta Mi kurpa."

26:27 I despues ku El a kohe un kopa i a duna gradisimentu, El a duna nan esei, bisando: "Boso tur bebe for di djé;

26:28 pasobra esaki ta Mi sanger di e aliansa, ku ta wòrdu dramá pa hopi pa pordon di piká.

26:29 Ma Mi ta bisa boso, for di awor aki lo Mi no bebe mas di e fruta aki di e mata di wendrùif te na e dia ku Mi beb'é di nobo ku boso den e reino di Mi Tata."

26:30 I despues di a kanta un himno, nan a sali bai Seru di Oleifi.

26:31 E ora ei Jesus a bisa nan: "Awenochi boso tur lo trompeká pa Mi motibu, pasobra ta pará skirbí: 'Lo Mi dal e Wardadó mata, i e karnénan di e tou lo wòrdu plamá.'

26:32 Ma despues ku Mi a wòrdu lantá, lo Mi bai Galilea boso dilanti."

26:33 Pedro a kontestá i a bis'E: "Maske tur trompeká pa Bo motibu, ami nunka lo no trompeká."

26:34 Jesus a bis'é: "Di bèrdat Mi ta bisabo ku awenochi mes, promé ku un gai kanta, lo bo nengaMi tres biaha."

26:35 Pedro a bis'E: "Asta si mi tin ku muri huntu ku Bo, lo mi no nengaBo." I tur e disipelnan a bisa meskos.

26:36 E ora ei Jesus a yega ku nan na un lugá ku yama Getsemané, i a bisa Su disipelnan: "Sinta akinan mientras ku Ami ta bai ayanan pa hasi orashon."

26:37 I El a hiba Pedro i e dos yu hòmbernan di Zebedeo huntu kunE, i a kuminsá bira tristu i masha angustiá.

26:38 E ora ei El a bisa nan: "Mi alma ta masha tristu mes, te na morto; keda akinan i vigilá huntu ku Mi."

26:39 I El a bai un poko mas leu for di nan i a tira Su kurpa abou ku Su kara te na suela, i a hasi orashon, bisando: "Mi Tata, si ta posibel, laga e kopa aki pasa bai for di Mi; sinembargo, no manera Ami kier, ma manera Abo kier."

26:40 I El a bin serka e disipelnan i a haña nan ta drumi, i a bisa Pedro: "Boso no por a keda vigilá ni ún ora huntu ku Mi?

26:41 Keda vigilá i hasi orashon, pa boso no kai den tentashon; e spiritu ta boluntario, ma e karni ta debil."

26:42 El a bolbe bai pa di dos biaha i a hasi orashon, bisando: "Mi Tata, si e kopa aki no por pasa for di Mi sin ku Mi beb'é, ku Bo boluntat sosodé."

26:43 I El a bolbe bin i a haña nan ta drumi, pasobra nan wowo tabata pisá.

26:44 I El a bolbe kita laga nan i a bai hasi orashon pa di tres biaha, bisando e mesun palabranan atrobe.

26:45 E ora ei El a bin serka e disipelnan i a bisa nan: "Ainda boso ta drumi i ta sosegá? Mira, e ora ta serka i e Yu di Hende lo wòrdu entregá den man di pekadó.

26:46 Lanta, laga nos ban; mira, esun ku ta traishonáMi ta serka di yega!"

26:47 I mientras ku E tabata papia ainda, ata, Judas, un di e diesdosnan, a bin, i huntu kuné un multitut grandi ku spada i klòp, mandá dor di e saserdotenan prinsipal i e ansianonan di e pueblo.

26:48 Awor esun ku tabata traishon'E a duna nan un señal, bisando: "Esun ku mi duna un sunchi, Esei t'E; gar'E."

26:49 I mesora el a bai serka Jesus i a bisa: "Saludo, Rabi!" i el a dun'E un sunchi.

26:50 I Jesus a bis'é: "Amigu, hasi loke bo a bin pa hasi." E ora ei nan a bin i a tira man riba Jesus i a gar'E.

26:51 I mira, un di esnan ku tabata huntu ku Jesus a ekstendé su man i a saka su spada, a dal e esklabu di e sumosaserdote, i a kap su orea kit'afó.

26:52 E ora ei Jesus a bis'é: "Pone bo spada bèk na su lugá; pasobra tur esnan ku saka spada lo peresé pa medio di spada.

26:53 Of bo ta kere ku Mi no por pidi Mi Tata, i mesora E lo pone mas ku diesdos legion di angel na Mi disposishon?

26:54 Kon anto e Skrituranan por wòrdu kumplí, ku ta bisa ku t'asina mester sosodé?"

26:55 Na e momento ei Jesus a bisa e multitutnan: "Boso a sali bin ku spada i klòp pa arestáMi komo si fuera ta ladron Mi ta? Mi tabata sinta tur dia den tèmpel ta siña e hendenan, i boso no a garaMi.

26:56 Ma tur esaki a tuma lugá pa e Skrituranan di e profetanan por keda kumplí." E ora ei tur e disipelnan a bandon'E i a hui bai.

26:57 I esnan ku a gara Jesus a hib'E serka sumosaserdote Kaifas, kaminda e eskribanan i e ansianonan a reuní.

26:58 Ma Pedro tambe tabata siguiE na un distansia, te na e plenchi di e sumosaserdote; i el a drenta paden i a kai sinta serka e ofisialnan pa mira kon ta bai para.

26:59 Awor e saserdotenan prinsipal i henter e Konsilio tabata purba haña testimonio falsu kontra Jesus, pa nan por a laga mat'E;

26:60 ma nan no por a haña nada, maske ku hopi testigu falsu a presentá. Ma despues dos a presentá,

26:61 i a bisa: "E hòmber aki a bisa: 'Ami por destruí e tèmpel di Dios i lant'é bèk den tres dia.'"

26:62 E ora ei e sumosaserdote a lanta para i a puntr'E: "Bo no ta kontestá nada? Ta kiko e hòmbernan aki ta testifiká kontra Bo?"

26:63 Ma Jesus a keda ketu. I e sumosaserdote a bis'E: "Mi ta ordenáBo bou di huramentu pa den nòmber di e Dios bibu Bo bisa nos si ta Abo ta e Cristo, e Yu di Dios."

26:64 Jesus a bis'é: "Bo mes a bisa esei; sinembargo, Mi ta bisa boso, for di awor boso lo mira e Yu di Hende sintá na man drechi di e Todopoderoso, i biniendo riba e nubianan di shelu."

26:65 E ora ei e sumosaserdote a sker su pañanan, bisando: "El a blasfemá! Pakiko nos tin mester di mas testigu? Mira, awor boso a tende e blasfemia!

26:66 Kiko boso ta pensa?" Nan a kontestá i a bisa: "E meresé morto!"

26:67 E ora ei nan a skupi den Su kara i a dal E ku moketa; i otronan a bòft'E,

26:68 i a bisa: "Abo Cristo, profetisá na nos; ta ken ta esun ku a dal Bo?"

26:69 Awor Pedro tabata sintá pafó riba plenchi, i un sirbidó muhé a yega serka djé i a bisa: "Abo tambe tabata huntu ku Jesus e galileo."

26:70 Ma el a nenga esaki dilanti di nan tur, bisando: "Mi no sa di kiko bo ta papia."

26:71 I ora ku el a sali bai na entrada di e porta, un otro sirbidó muhé a mir'é i a bisa esnan ku tabata einan: "E hòmber aki tabata huntu ku Jesus di Nazarèt."

26:72 I el a bolbe nenga esaki ku un huramentu, bisando: "Mi no konosé e hòmber."

26:73 I un ratu despues esnan ku tabata pará aserka a bin i a bisa Pedro: "Siguramente abo tambe ta un di nan, pasobra bo manera di papia ta redabo."

26:74 E ora ei el a kuminsá maldishoná i hura, bisando: "Mi no konosé e hòmber!" I mesora un gai a kanta.

26:75 I Pedro a kòrda e palabra ku Jesus a bisa: "Promé ku un gai kanta, lo bo nengaMi tres biaha." I el a sali bai pafó i a yora amárgamente.

Mateo 25 Mateo 27