Lukas 24

BSNP Edita

Lukas 24

24:1 Ma riba e promé dia di siman, mainta bon tempran, nan a bai na e tumba i a hiba e spesereinan ku nan a prepará.

24:2 I nan a haña e piedra lorá kitá for di e tumba,

24:3 ma ora nan a drenta, nan no a haña e kurpa di Señor Jesus.

24:4 I a sosodé ku mientras nan no tabata sa kiko pa pensa di esaki, ata, direpiente dos hòmber tabata pará banda di nan, bistí na paña briyante.

24:5 I den nan spantu e muhénan a bùig ku nan kara te na suela, ma e hòmbernan a bisa nan: "Pakiko boso ta buska Esun bibu serka e mortonan?

24:6 E no ta akinan, ma El a resusitá. Kòrda kon El a papia ku boso, tempu ku E tabata na Galilea ainda,

24:7 bisando, ku e Yu di Hende mester wòrdu entregá den man di hòmbernan pekaminoso i wòrdu krusifiká, i resusitá riba e di tres dia."

24:8 I nan a kòrda Su palabranan.

24:9 Nan a bolbe for di e tumba i a konta tur e kosnan aki na e diesunnan i na tur e otronan.

24:10 Awor esakinan tabata Maria Magdalena i Johana i Maria, mama di Santiago; tambe e otro muhénan ku tabata huntu ku nan tabata konta e kosnan aki na e apòstelnan.

24:11 I e palabranan aki a parse nan ko'i loko i nan no a kere nan.

24:12 [Ma Pedro a lanta i a kore bai na e tumba; i el a bùk wak paden i a mira solamente e pañanan di lora morto aden; i el a bai su kas, i a keda atmirá di loke a sosodé.]

24:13 I mira, riba e mesun dia ei dos di nan tabata bai na un pueblito ku yama Emaus, ku tabata keda mas o menos diesun kilometer for di Jerusalèm.

24:14 I nan tabata kombersá ku otro tokante di tur e kosnan aki ku a tuma lugá.

24:15 I a sosodé ku mientras nan tabata kombersá i diskutí ku otro, Jesus mes a yega serka nan i a kuminsá kana huntu ku nan.

24:16 Ma nan wowo a wòrdu strobá, asina ku nan no a rekonos'E.

24:17 I El a bisa nan: "Ki kombersashon boso tin tantu asina ku otro segun ku boso ta kana?" I nan a keda para ta wak tristu asina.

24:18 I un di nan ku yama Kleofas a kontestá i a bis'E: "Ta Abo ta e úniko stranhero den Jerusalèm ku no sa di e kosnan ku a sosodé ayanan den e dianan aki?"

24:19 I El a bisa nan: "Ki kosnan?" I nan a bis'E: "E kosnan tokante di Jesus di Nazarèt, Kende tabata un profeta poderoso den echo i den palabra den bista di Dios i di henter e pueblo,

24:20 i kon e saserdotenan prinsipal i nos gobernantenan a entregu'E na sentensia di morto i a krusifik'E.

24:21 Ma nos tabata spera ku E lo tabata Esun ku tabata bai redimí Israel. Ma ku tur esaki, awe ta tres dia kaba ku e kosnan aki a sosodé.

24:22 Ma tambe algun muhé for di meimei di nos a laga nos tur asombrá. Ora nan tabata na e tumba mainta tempran,

24:23 i no a haña Su kurpa, nan a bin bisa ku tambe nan a mira un vishon di angelnan, kendenan a bisa ku E ta na bida.

24:24 I algun di esnan ku tabata huntu ku nos a bai na e tumba i a haña esei meskos ku e muhénan tambe a bisa, ma E nan no a mira."

24:25 I El a bisa nan: "O hòmbernan sin sintí i floho di kurason pa kere tur loke e profetanan a papia!

24:26 E Cristo no mester a sufri tur e kosnan aki i drenta den Su gloria?"

24:27 I kuminsando ku Moisés i ku tur e profetanan El a splika nan e kosnan tokante di Su mes den tur e Skrituranan.

24:28 I nan a yega serka di e pueblito kaminda nan tabata bai, i El a hasi komo si fuera E lo a sigui bai mas leu.

24:29 I nan a insistí i a bis'E: "Keda serka nos, pasobra nochi ta kuminsá sera i dia ta kabando." I El a bai paden pa keda serka nan.

24:30 I a sosodé ku ora E tabata sintá na mesa huntu ku nan, El a kohe e pan, a bendishon'é, a kibr'é i a duna nan.

24:31 I nan wowo a habri i nan a rekonos'E; i El a disparsé for di nan bista.

24:32 I nan a bisa otro: "Nos kurason no tabata kima den nos mientras ku E tabata papia ku nos na kaminda, mientras ku E tabata splika nos e Skrituranan?"

24:33 I mesora nan a lanta i a bolbe Jerusalèm i a haña reuní huntu e diesunnan i e otronan ku tabata ku nan,

24:34 bisando: "Di bèrdat, Señor a resusitá i a paresé na Simon."

24:35 I nan a konta nan eksperensianan na kaminda i kon El a wòrdu rekonosí dor di nan na e kibramentu di pan.

24:36 I mientras ku nan tabata konta e kosnan aki, Jesus mes a bin para meimei di nan, i a bisa nan: "Pas sea ku boso."

24:37 Nan a spanta i a haña miedu i a kere ku nan tabata mira un spiritu.

24:38 I El a bisa nan: "Pakiko boso ta intrankil, i pakiko ta lanta duda den boso kurason?

24:39 Wak Mi mannan i Mi pianan, ku ta Ami mes; mishi ku Mi i mira, pasobra un spiritu no tin karni i wesu, manera boso ta mira ku Ami tin."

24:40 [I ora ku El a bisa esaki, El a mustra nan Su mannan i Su pianan.]

24:41 I ora ku di alegria ainda nan no por a kere i nan a keda atmirá, El a bisa nan: "Boso tin algu aki pa kome?"

24:42 I nan a dun'E pida piská hasá;

24:43 i El a tuma esaki i a kom'é nan dilanti.

24:44 I El a bisa nan: "Esakinan ta Mi palabranan ku Mi a papia ku boso mientras ku Mi tabata serka boso ainda, ku tur kos ku ta pará skirbí tokante di Mi den e Lei di Moisés i e Profetanan i e Salmonan mester wòrdu kumplí."

24:45 E ora ei El a habri nan huisio pa nan komprendé e Skrituranan,

24:46 i El a bisa nan: "Asina ta pará skirbí, ku e Cristo mester a sufri i lanta for di e mortonan riba e di tres dia,

24:47 i ku repentimentu pa pordon di piká mester a wòrdu proklamá den Su nòmber na tur nashon, kuminsando na Jerusalèm.

24:48 Boso ta testigu di e kosnan aki.

24:49 I mira, Mi ta manda e promesa di Mi Tata riba boso; ma boso mester keda den e stat Jerusalèm te ora boso wòrdu bistí ku poder for di ariba."

24:50 I El a hiba nan te na Betania, i El a hisa Su mannan i a bendishoná nan.

24:51 I a sosodé ku mientras ku E tabata bendishoná nan, El a bai for di nan i a wòrdu tumá ariba den shelu.

24:52 I nan a bolbe Jerusalèm ku gran goso,

24:53 i tabata tur ora bai den tèmpel, alabando i bendishonando Dios. Amèn.

Lukas 23 Huan 1