Lukas 18

BSNP Edita

Lukas 18

18:1 Awor E tabata konta nan un parábola pa mustra nan ku nan mester hasi orashon tur ora bai i no desmayá,

18:2 bisando: "Den un sierto stat tabatin un hues ku no tabatin temor pa Dios, ni rèspèt pa hende.

18:3 I tabatin un biuda den e stat ei ku tur ora bai tabata bin serka djé, bisando: 'Hasi hustisia pa mi kontra mi atversario.'

18:4 "I pa un tempu e no tabata kier; ma despues el a bisa den su mes: 'Maske mi no tin temor pa Dios, ni rèspèt pa hende,

18:5 tòg, pasobra e biuda aki ta molestiámi, lo mi hasi hustisia p'é, pa e no kansami dor di bin kada bes asina.'"

18:6 I Señor a bisa: "Tende loke e hues inhustu a bisa;

18:7 awor Dios lo no hasi hustisia na Su skohínan ku ta sklama na djE di dia i anochi, i lo E tarda pa kontestá nan?

18:8 Mi ta bisa boso ku E lo hasi hustisia pronto pa nan. Sinembargo, ora ku e Yu di Hende bin, lo E haña fe riba mundu?"

18:9 I tambe El a konta e parábola aki na sierto hendenan ku tabata konfia den nan mes ku nan tabata hustu, i tabata wak otronan ku menospresio:

18:10 "Dos hòmber a bai den tèmpel pa hasi orashon; esun tabata un fariseo i e otro un publikano.

18:11 E fariseo a lanta para i tabata hasi orashon asin'aki den su mes: 'Dios, mi ta gradisíBo ku mi no ta manera e otro hendenan: ladron, inhustu, adúltero, ni tampoko manera e publikano aki.

18:12 Mi ta yuna dos biaha pa siman; mi ta duna e di dies parti di tur mi entrada.'

18:13 "Ma e publikano, pará na un distansia, no kier a hisa ni su wowo na shelu, ma tabata bati riba su pechu, bisando: 'Dios, tene miserikòrdia di mi, pekadó!'

18:14 "Mi ta bisa boso, e hòmber aki, kontrario di e otro, a bai su kas hustifiká; pasobra ken ku halsa su mes lo wòrdu umiyá, ma esun ku umiyá su mes lo wòrdu halsá."

18:15 I nan tabata trese nan yunan chikitu serka djE pa E pone man riba nan; ma ora e disipelnan a mira esaki, nan a kuminsá reprendé nan.

18:16 Ma Jesus a yama nan, bisando: "Laga e muchanan bin serka Mi, i no stroba nan, pasobra e reino di Dios ta pertenesé na esnan manera esakinan.

18:17 Di bèrdat Mi ta bisa boso, esun ku no risibí e reino di Dios manera un mucha lo no drenta den djé."

18:18 I un gobernante a puntr'E: "Bon Maestro, kiko mi mester hasi pa eredá bida etèrno?"

18:19 I Jesus a bis'é: "Pakiko bo ta yamaMi bon? Ni un hende no ta bon sino Dios so.

18:20 Bo konosé e mandamentunan: 'No kometé adulterio; no mata; no hòrta; no duna testimonio falsu; onra bo tata i bo mama.'"

18:21 I el a bisa: "Tur e kosnan aki mi a warda for di mi hubentut."

18:22 I ora Jesus a tende esaki, El a bis'é: "Un kos bo falta ainda; bende tur bo propiedatnan, i partié pa hende pober, i lo bo tin tesoro den shelu; i bin, siguiMi."

18:23 Ma ora ku el a tende e kosnan aki, el a bira masha tristu, pasobra e tabata masha riku mes.

18:24 I Jesus a wak é i a bisa: "Ki difisil ta pa esnan ku ta riku drenta e reino di Dios!

18:25 Pasobra ta mas fasil pa un kamel pasa dor di wowo di un angua, ku pa un hende riku drenta e reino di Dios."

18:26 I esnan ku a tende esaki a puntra: "Ta ken por wòrdu salbá anto?"

18:27 Ma El a bisa: "E kosnan imposibel pa hende ta posibel pa Dios."

18:28 I Pedro a bisa: "Mira, nos a bandoná loke ta di nos, i a siguiBo."

18:29 I El a bisa nan: "Di bèrdat Mi ta bisa boso, no tin ningun hende ku a bandoná kas òf esposa òf ruman hòmbernan òf mayornan òf yunan, pa kousa di e reino di Dios,

18:30 ku lo no risibí hopi bes mas tantu den e tempu aki, i den e siglo ku ta bin, bida etèrno."

18:31 I El a hala e diesdosnan un banda i a bisa nan: "Mira, nos ta bai Jerusalèm, i tur kos ku ta skirbí pa medio di e profetanan tokante di e Yu di Hende lo wòrdu kumplí.

18:32 Pasobra E lo wòrdu entregá na e paganonan, i lo wòrdu bofoná i maltratá i skupí.

18:33 I nan lo sut'E i mat'E. I riba e di tres dia E lo lanta for di morto."

18:34 I nan no a komprendé ningun di e kosnan aki, i e palabranan aki tabata skondí pa nan, i nan no a komprendé e kosnan ku a wòrdu bisá.

18:35 I a sosodé ku ora E tabata aserkando Jeriko tabatin un hòmber siegu sintá kantu di kaminda ta pidi limosna.

18:36 I ora ku el a tende un multitut ta pasa, el a puntra kiko esaki por ta.

18:37 I nan a bis'é ku Jesus di Nazarèt tabata pasa.

18:38 I el a grita bisa: "Jesus, Yu di David, tene miserikòrdia di mi!"

18:39 I esnan ku tabata bai dilanti tabata rous é mand'é keda ketu; ma el a grita mas duru ainda: "Yu di David, tene miserikòrdia di mi!"

18:40 I Jesus a keda para i a ordená pa tres'é serka djE; i ora ku el a yega serka, El a puntr'é:

18:41 "Kiko bo kier pa Mi hasi pa bo?" I el a bisa: "Señor, mi kier rekobrá mi bista!"

18:42 I Jesus a bis'é: "Risibí bo bista; bo fe a salbabo."

18:43 I mesora el a rekobrá su bista i a siguiE, glorifikando Dios. I ora tur e hendenan a mira esaki, nan a duna alabansa na Dios.

Lukas 17 Lukas 19