Huan 12

BSNP Edita

Huan 12

12:1 Jesus anto, seis dia promé ku Pasku, a bin Betania kaminda Lázaro tabata, kende Jesus a lanta for di e mortonan.

12:2 Aya nan a prepará un sena p'E; i Marta tabata sirbi; i Lázaro tabata un di esnan ku tabata sintá na mesa huntu kunE.

12:3 Anto Maria a kohe un liber di perfume di nardo puru di hopi balor, i a hunta pia di Jesus i a seka Su pianan ku su kabei. I e kas a yena ku e fragansia di e perfume.

12:4 Ma Judas Iskariot, un di Su disipelnan, kende tabatin intenshon di traishon'E, a bisa:

12:5 "Pakiko e perfume aki no a wòrdu bendí pa tres shen denario i duná na hende pober?"

12:6 Awor el a bisa esaki, no pasobra hende pober tabata import'é, ma pasobra e tabata un ladron, i komo ku e tabatin e kaha di plaka, e tabatin kustumber di kohe di loke tabata wòrdu tirá aden.

12:7 Anto Jesus a bisa: "Lagu'é; el a warda esaki pa e dia di Mi deramentu.

12:8 Pasobra e pobernan boso tin semper serka boso, ma Ami boso no tin semper."

12:9 Anto e multitut grandi di e hudiunan a haña sa ku E tabata ayanan; i nan a bin, no solamente pa motibu di Jesus, ma pa nan por a mira Lázaro tambe, kende El a lanta for di e mortonan.

12:10 Ma e saserdotenan prinsipal a konsultá ku otro pa mata Lázaro tambe,

12:11 pasobra pa su motibu hopi di e hudiunan tabata bai for di nan i tabata kere den Jesus.

12:12 E dia siguiente, ora ku e multitut grandi ku a bin e Fiesta a tende ku Jesus tabata bin Jerusalèm,

12:13 nan a kohe ramanan di palma, i a sali bai kontr'E, i a kuminsá grita: "Hosana!" "Bendishoná ta Esun ku ta bin den e nòmber di SEÑOR, e Rei di Israel!"

12:14 I Jesus a haña un buriku yòn i a sinta riba djé, manera ta pará skirbí:

12:15 "No tene miedu, yu muhé di Sion; ata bo Rei ta bin, sintá riba un yu di buriku."

12:16 E kosnan aki Su disipelnan no a komprendé na prinsipio; ma ora Jesus a wòrdu glorifiká, e ora ei nan a kòrda ku e kosnan aki tabata pará skirbí tokante di djE, i ku nan a hasi e kosnan aki kunE.

12:17 I asina e multitut, ku tabata huntu kunE ora ku El a yama Lázaro sali for di e tumba i a lant'é for di e mortonan, tabata duna testimonio di djE.

12:18 Pa e motibu aki tambe e multitut a bai kontr'E, pasobra nan a tende ku El a hasi e milager aki.

12:19 E fariseonan anto tabata bisa otro: "Boso ta mira ku boso no ta logra nada. Mira, mundu ta bai Su tras."

12:20 Awor tabatin algun griego entre esnan ku tabata bai pa adorá na e Fiesta;

12:21 esakinan anto a bin serka Felipe, kende tabata di Bètsaida di Galilea, i a puntr'é, bisando: "Señor, nos kier mira Jesus."

12:22 Felipe a bin i a bisa Andres; Andres i Felipe a bin, i nan a bisa Jesus.

12:23 I Jesus a kontestá nan, bisando: "E ora a yega pa e Yu di Hende wòrdu glorifiká.

12:24 Di bèrdat, di bèrdat, Mi ta bisa boso, si un pipita di trigo no kai den tera i muri, e ta keda su so; ma si e muri, e ta duna hopi fruta.

12:25 Esun ku stima su bida ta pèrd'é, i esun ku odia su bida den e mundu aki lo ward'é pa bida etèrno.

12:26 Si un hende ta sirbiMi, lagu'é siguiMi; i kaminda Ami ta, einan Mi sirbidó tambe lo ta; si un hende ta sirbiMi, e Tata lo onr'é.

12:27 "Awor Mi alma a bira intrankil, i kiko lo Mi bisa: 'Tata, libraMi di e ora aki'? Ma ta pa e propósito aki Mi a bin na e ora aki.

12:28 Tata, glorifiká Bo nòmber." E ora ei a bin un bos for di shelu, bisando: "Ya Mi a glorifik'é, i lo Mi bolbe glorifik'é."

12:29 Awor e multitut, ku tabata pará einan i a tende esei, a bisa ku ta strena a zona; otronan a bisa: "Un angel a papia kunE."

12:30 Jesus a kontestá i a bisa: "No ta pa Mi motibu e bos aki a bin, sino pa boso motibu.

12:31 Awor ta bin huisio riba e mundu aki; awor e prens di e mundu aki lo wòrdu tirá pafó.

12:32 I Ami, si Mi wòrdu halsá for di tera, lo Mi hala tur hende serka Mi."

12:33 I ta pa indiká e sorto di morto ku E tabata bai muri E tabata bisa esaki.

12:34 Anto e multitut a kontest'E: "For di e Lei nos a tende ku e Cristo lo permanesé pa semper; kon anto Bo por bisa: 'E Yu di Hende mester wòrdu halsá'? Ta ken e Yu di Hende aki ta?"

12:35 E ora ei Jesus a kontestá nan: "Pa un poko tempu mas e lus ta meimei di boso. Kana mientras ku boso tin e lus, pa skuridat no sorprendé boso; esun ku ta kana den skuridat no sa unda e ta bai.

12:36 Mientras ku boso tin e lus, kere den e lus, pa boso por bira yunan di lus." E kosnan aki Jesus a papia i El a bai i a skonde Su mes pa nan.

12:37 Ma apesar ku El a hasi asina tantu milager nan dilanti, tòg nan no tabata kere den djE,

12:38 pa e palabra di profeta Isaias por a keda kumplí, ku el a papia: "SEÑOR, ken a kere nos mensahe? I na ken e brasa di SEÑOR a wòrdu revelá?"

12:39 Pa e motibu aki nan no por a kere, pasobra Isaias a bisa tambe:

12:40 "El a siega nan wowo i a hasi nan kurason duru, pa nan no mira ku nan wowo, komprendé ku nan kurason, repentí, i Ami kura nan."

12:41 E kosnan aki Isaias a bisa, pasobra el a mira Su gloria, i el a papia di djE.

12:42 Sinembargo, asta di e gobernantenan hopi a kere den djE, ma pa motibu di e fariseonan nan no tabata konfesá esaki, pa nan no wòrdu saká for di snoa;

12:43 pasobra nan tabata gusta e aprobashon di hende mas ku e aprobashon di Dios.

12:44 I Jesus a bisa na bos haltu: "Esun ku kere den Mi, no ta den Mi e ta kere, sino den Esun ku a mandaMi.

12:45 I esun ku miraMi ta mira Esun ku a mandaMi.

12:46 Mi a bin komo lus den mundu, pa tur esnan ku kere den Mi no keda den skuridat.

12:47 "I si un hende tende Mi palabranan i no kumpli ku nan, Mi no ta huzgu'é, pasobra Mi no a bin pa huzga mundu, ma pa salba mundu.

12:48 Esun ku rechasáMi i no risibí Mi palabranan, tin ún ku ta huzgu'é; e palabra ku Mi a papia, esei lo huzgu'é den e último dia.

12:49 Pasobra no ta ku Mi mes outoridat Mi a papia, ma e Tata ku a mandaMi a dunaMi mandamentu, kiko pa bisa i kiko pa papia.

12:50 I Mi sa ku Su mandamentu ta bida etèrno; pesei e kosnan ku Mi ta papia, Mi ta papia presis manera e Tata a bisaMi."

Huan 11 Huan 13