Echonan 16

BSNP Edita

Echonan 16

16:1 I el a bai Derbe i Listra tambe. I mira, tabatin un disipel ayanan ku yama Timoteo, yu hòmber di un muhé hudiu ku tabata un kreyente, ma su tata tabata un griego,

16:2 i e rumannan ku tabata na Listra i Ikonio tabata duna bon testimonio di djé.

16:3 Pablo tabata kier pa e hòmber aki bai kuné; i el a tum'é serka djé i a sirkumsid'é pa motibu di e hudiunan ku tabata na e lugánan ei, pasobra nan tur tabata sa ku su tata tabata griego.

16:4 Awor segun ku nan tabata pasa dor di e statnan, nan tabata duna nan e reglanan ku a wòrdu dekretá dor di e apòstelnan i e ansianonan ku tabata na Jerusalèm, pa nan kumpli ku nan.

16:5 Asina e iglesianan tabata wòrdu fortifiká den fe, i tabata bira kada dia mas hopi.

16:6 I siendo prohibí dor di Spiritu Santu di papia e palabra na Asia, nan a pasa dor di e region di Frigia i Galasia;

16:7 i ora nan a yega Misia, nan a trata di bai Bitinia, ma e Spiritu di Jesus no a pèrmití nan;

16:8 i pasando Misia, nan a baha bai Troas.

16:9 I den anochi Pablo a haña un vishon: un hòmber di Masedonia tabata pará su dilanti i tabata rogu'é, bisando: "Bin Masedonia i yuda nos."

16:10 I ora ku el a mira e vishon, mesora nos a trata di bai Masedonia, pasobra nos a bin na e konklushon ku Dios a yama nos pa prediká evangelio na nan.

16:11 Pesei, nabegando for di Troas, nos a bai largu Samotrasia i su siguiente dia Neápolis;

16:12 i for di einan pa Filipos, kual ta e stat prinsipal di e distrikto di Masedonia, un kolonia romano; i nos a keda algun dia den e stat aki.

16:13 I riba dia di Sabat nos a sali pafó di e porta di stat bai banda di un riu, kaminda nos a suponé ku tabatin un lugá pa hasi orashon; i nos a kai sinta i a kuminsá papia ku e muhénan ku a reuní.

16:14 I un muhé ku yama Lidia, di e stat Tiatira, un bendedó di tela púrpura, un adoradó di Dios, tabata skucha; i Señor a habri su kurason pa paga atenshon na e kosnan ku Pablo tabata bisa.

16:15 I ora ku é i e hendenan di su kas a wòrdu batisá, el a roga nos, bisando: "Si boso a huzga ku mi ta fiel na Señor, bin mi kas i keda serka mi." I el a konvensé nos.

16:16 I a sosodé ku ora nos tabata bai na e lugá di hasi orashon a bin topa nos un mucha muhé esklabu ku tabatin un spiritu di adivinashon, kende tabata duna su shonnan hopi ganashi ku miramentu di destino.

16:17 E tabata sigui Pablo i nos, i tabata grita, bisando: "E hòmbernan aki ta sirbidónan di e Dios Haltísimo, kendenan ta proklamá na boso e kaminda di salbashon."

16:18 I el a sigui hasi esaki hopi dia largu. Ma Pablo, fadá di esei, a bira bisa e spiritu: "Mi ta ordenábo den e nòmber di Jesu-Cristo pa sali for di djé!" I mesora el a sali.

16:19 Ma ora su shonnan a mira ku nan speransa di ganashi a kaba, nan a gara Pablo i Silas i a lastra nan hiba na e plasa dilanti di e outoridatnan,

16:20 i ora nan a hiba nan serka e magistradonan, nan a bisa: "E hòmbernan aki, siendo hudiu, ta pone nos stat arib'abou,

16:21 i ta proklamá kustumbernan ku lei no ta pèrmití nos aseptá ni warda, siendo romano."

16:22 I e multitut a lanta tur huntu kontra nan, i e magistradonan a sker Pablo i Silas nan paña kita for di nan kurpa i a duna òrdu pa suta nan ku bara.

16:23 I despues di a duna nan hopi gòlpi, nan a tira nan den prizon i a duna e wardadó di prizon òrdu pa warda nan bon wardá;

16:24 i esaki, despues di a risibí un òrdu asina, a tira nan den e prizon di mas paden i a sera nan pia na sepa.

16:25 Ma banda di mei anochi Pablo i Silas tabata hasi orashon i tabata kanta himno di alabansa na Dios, i e prezonan tabata skucha nan;

16:26 i direpiente a bin un temblor fuerte, asina ku e fundeshinan di e prizon a wòrdu sakudí; i mesora tur e portanan a habri i e kadenanan di nan tur a lòs.

16:27 I ora ku e wardadó di prizon a lanta for di soño i a mira e portanan di prizon habrí, el a saka su spada i tabata kla pa mata su kurpa, keriendo ku e prezonan a hui.

16:28 Ma Pablo a grita duru, bisando: "No hasi bo mes daño, pasobra nos tur t'aki!"

16:29 I el a pidi pa trese lus i a kore bai paden i, temblando di miedu, el a tira su kurpa abou dilanti di Pablo i Silas,

16:30 i despues ku el a hiba nan pafó, el a bisa: "Señornan, kiko mi mester hasi pa ta salbá?"

16:31 I nan a bisa: "Kere den Señor Jesus i lo bo ta salbá, abo i e hendenan di bo kas."

16:32 I nan a papia e palabra di Señor kuné, i ku tur e hendenan ku tabata den su kas.

16:33 I na e mesun ora di anochi ei el a bai ku nan pa laba nan heridanan, i el a wòrdu batisá mesora, é i tur e hendenan di su kas.

16:34 I el a hiba nan su kas i a pone mesa pa nan, i e tabata regosihá grandemente ku é i tur e hendenan di su kas a kere den Dios.

16:35 I ora dia a habri e magistradonan a manda nan polisnan, bisando: "Pone e hòmbernan ei den libertat."

16:36 I e wardadó di prizon a hiba e mensahe aki pa Pablo, bisando: "E magistradonan a duna òrdu pa pone boso den libertat. Asina, sali awor i bai na pas."

16:37 Ma Pablo a bisa nan: "Nan a suta nos públikamente sin ningun sorto di sentensia, nos ku ta hòmbernan romano, i a tira nos den prizon; i awor nan kier saka nos na sekreto? Esei sí ku nò! Laga nan mes bin saka nos."

16:38 I e polisnan a anunsiá e palabranan aki na e magistradonan. I nan a haña miedu ora nan a tende ku nan tabata romano;

16:39 i nan a bin i a roga nan, i ora nan a saka nan afó, nan a keda roga nan pa sali for di e stat.

16:40 I nan a sali for di prizon bai kas di Lidia, i ora nan a mira e rumannan, nan a enkurashá nan i a bai.

Echonan 15 Echonan 17