2 Korintionan 1

BSNP Edita

2 Korintionan 1

1:1 Pablo, un apòstel di Cristo Jesus pa e boluntat di Dios, i Timoteo nos ruman. Na e iglesia di Dios ku ta na Korinto, huntu ku tur e santunan ku ta den henter Akaya:

1:2 Grasia sea ku boso i pas di Dios nos Tata i di Señor Jesu-Cristo.

1:3 Bendishoná sea e Dios i Tata di nos Señor Jesu-Cristo, e Tata di miserikòrdianan i Dios di tur konsuelo,

1:4 Kende ta konsolá nos den tur nos aflikshon, pa asina nos tambe por konsolá esnan ku ta den kualke aflikshon ku e mesun konsuelo ku Dios a konsolá nos kuné.

1:5 Pasobra meskos ku e sufrimentunan di Cristo ta abundá den nos, asina nos konsuelo tambe ta abundá dor di Cristo.

1:6 Ma si nos ta wòrdu afligí, ta pa boso konsuelo i salbashon; òf si nos ta wòrdu konsolá, ta pa boso konsuelo, kual ta efektivo pa soportá e mesun sufrimentunan ku nos tambe ta sufri;

1:7 i nos speransa pa boso ta firmemente fundá, sabiendo ku meskos ku boso tin parti den nos sufrimentunan, boso tin parti tambe den nos konsuelo.

1:8 Pasobra, rumannan, nos no kier pa boso keda sin sa di nos aflikshon ku a bin riba nos na Asia, ku nos tabatin un karga masha pisá mes, mas ku nos por a soportá, asina ku asta nos tabata desesperá di nos bida;

1:9 sí, nos tabatin e sentensia di morto den nos mes, pa nos no konfia den nos mes, sino den Dios, Kende ta lanta e mortonan,

1:10 Kende a libra nos di un peliger di morto asina grandi, i lo libra nos, Esun den Kende nos a pone nos speransa. I E lo sigui libra nos,

1:11 mientras ku boso tambe ta yuda nos ku boso orashonnan, pa hopi hende por duna gradisimentu pa nos, pa e bendishon duná na nos pa medio di e orashonnan di hopi hende.

1:12 Pasobra nos gloria ta esaki, e testimonio di nos konsenshi, ku den santidat i sinseridat di Dios, no den e sabiduria di hende, sino den e grasia di Dios, nos a komportá nos mes den mundu, i spesialmente pa ku boso.

1:13 Pasobra nos no ta skirbi boso nada otro sino loke boso ta lesa i komprendé, i mi ta spera ku boso lo komprendé te na fin,

1:14 meskos ku boso tambe a komprendé nos pa un parti, ku nos ta boso motibu pa gloria, meskos ku boso tambe ta di nos, den e dia di nos Señor Jesus.

1:15 I den e konfiansa aki mi tabatin intenshon di bin serka boso promé, pa un biaha mas boso risibí un bendishon,

1:16 esta, pa mi pasa via boso bai Masedonia, i bolbe pasa serka boso ora mi bin for di Masedonia, i pa boso yudami riba mi biahe pa Judea.

1:17 Pesei, ora mi a plania esaki, ta ariba-ariba mi a hasié anto? Of loke mi plania, ta segun karni mi ta plania, ku na e mesun momento mi ta bisa: sí, sí, i nò, nò?

1:18 Ma meskos ku Dios ta fiel, nos palabra na boso no ta sí i nò.

1:19 Pasobra e Yu di Dios, Cristo Jesus, Kende a wòrdu prediká meimei di boso dor di nos--dor di mi, Silvano i Timoteo--no tabata sí i nò, sino sí den djE.

1:20 Pasobra tur e promesanan di Dios den djE ta sí, i den djE ta Amèn, pa e gloria di Dios dor di nos.

1:21 Awor Esun ku ta stablesé nos huntu ku boso den Cristo i a ungi nos ta Dios,

1:22 Kende tambe a seya nos i a duna nos e Spiritu den nos kurason komo garantia.

1:23 Ma mi ta yama Dios komo testigu di mi alma, ku pa spar boso mi no a bin Korinto mas.

1:24 No ku nos tin dominio riba boso fe, ma nos ta trahadó huntu ku boso pa boso goso; pasobra den boso fe boso ta para firme.

1 Korintionan 16 2 Korintionan 2