Buska den Beibel

1 Huan 1; 1 Huan 2; 1 Huan 3; 1 Huan 4; 1 Huan 5 BSNP Edita

1 Huan 1

1:1 Loke tabata for di prinsipio, loke nos a tende, loke nos a mira ku nos wowo, loke nos a kontemplá i loke nos man a toka, di e Palabra di Bida--

1:2 i e bida a wòrdu manifestá, i nos a mira i ta duna testimonio i ta proklamá na boso e bida etèrno, kual tabata serka e Tata i a wòrdu manifestá na nos--

1:3 loke nos a mira i tende nos ta proklamá na boso tambe, pa boso tambe por tin komunion ku nos; i di bèrdat nos komunion ta ku e Tata i ku Su Yu Jesu-Cristo.

1:4 I e kosnan aki nos ta skirbi, pa nos alegria wòrdu hasí kompleto.

1:5 I esaki ta e mensahe ku nos a tende di djE i ta anunsiá na boso, ku Dios ta lus i den djE no tin nada-nada di skuridat.

1:6 Si nos bisa ku nos tin komunion kunE i sinembargo nos ta kana den skuridat, nos ta gaña i no ta praktiká e bèrdat;

1:7 ma si nos ta kana den lus meskos ku E mes ta den lus, nos tin komunion ku otro, i e sanger di Jesus, Su Yu, ta limpia nos di tur piká.

1:8 Si nos bisa ku nos no tin piká, nos ta gaña nos mes, i e bèrdat no ta den nos.

1:9 Si nos konfesá nos pikánan, E ta fiel i hustu pa pordoná nos nos pikánan i pa limpia nos di tur inhustisia.

1:10 Si nos bisa ku nos no a hasi piká, nos ta hasiE un gañadó, i Su palabra no ta den nos.

1 Huan 2

2:1 Mi yu chikitunan, mi ta skirbi boso e kosnan aki pa boso no hasi piká. I si un hende hasi piká, nos tin un Abogado serka e Tata, Jesu-Cristo, e hustu;

2:2 i E mes ta e propisiashon pa nos pikánan, i no pa di nos so, ma tambe pa esnan di henter mundu.

2:3 I pa medio di esaki nos sa ku nos a konos'E, si nos warda Su mandamentunan.

2:4 Esun ku bisa: "Mi konos'E," i no ta warda Su mandamentunan, ta un gañadó, i e bèrdat no ta den djé;

2:5 ma esun ku warda Su palabra, den djé e amor di Dios a wòrdu perfekshoná bèrdaderamente. Pa medio di esaki nos sa ku nos ta den djE:

2:6 esun ku bisa ku e ta permanesé den djE mester kana na mesun manera ku El a kana.

2:7 Stimánan, no ta un mandamentu nobo mi ta skirbi boso, sino un mandamentu bieu ku boso tabatin for di prinsipio; e mandamentu bieu ta e palabra ku boso a tende.

2:8 Sinembargo, mi ta skirbi boso un mandamentu nobo, kual ta bèrdadero den djE i den boso, pasobra e skuridat ta pasando, i e lus bèrdadero ta briyando kaba.

2:9 Esun ku bisa ku e ta den lus i sinembargo ta odia su ruman ta den skuridat te ainda.

2:10 Esun ku ta stima su ruman ta permanesé den lus i no tin motibu den djé pa trompeká.

2:11 Ma esun ku ta odia su ruman ta den skuridat i ta kana den skuridat, i e no sa unda e ta bai, pasobra e skuridat a siega su wowonan.

2:12 Mi ta skirbi boso, yu chikitunan, pasobra boso pikánan a wòrdu pordoná na boso pa kousa di Su nòmber.

2:13 Mi ta skirbi boso, tatanan, pasobra boso konosé Esun ku ta for di prinsipio. Mi ta skirbi boso, hobennan, pasobra boso a vense e malbado. Mi a skirbi boso, yunan, pasobra boso konosé e Tata.

2:14 Mi a skirbi boso, tatanan, pasobra boso konosé Esun ku tabata for di prinsipio. Mi a skirbi boso, hobennan, pasobra boso ta fuerte, i e palabra di Dios ta permanesé den boso, i boso a vense e malbado.

2:15 No stima mundu, ni e kosnan ku tin den mundu. Si un hende ta stima mundu, e amor di e Tata no ta den djé.

2:16 Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu.

2:17 I e mundu ta pasa bai i su deseonan tambe, ma esun ku hasi e boluntat di Dios ta permanesé pa semper.

2:18 Yunan, ta e último ora; i meskos ku boso a tende ku anti-cristo ta bin, asina awor kaba hopi anti-cristo a lanta; na esaki nos sa ku ta e último ora.

2:19 Nan a sali for di nos, ma nan no tabata realmente di nos; pasobra si nan tabata di nos, nan lo a keda serka nos, ma nan a sali bai, pa sali na kla ku nan tur no ta di nos.

2:20 Ma boso tin un unshon di Esun Santu, i boso tur sa.

2:21 Mi no a skirbi boso pasobra boso no konosé e bèrdat, ma pasobra boso konos'é, i pasobra ningun mentira no ta bin for di e bèrdat.

2:22 Ta ken ta e mentiroso, sino esun ku ta nenga ku Jesus ta e Cristo? Esaki ta e anti-cristo, esun ku ta nenga e Tata i e Yu.

2:23 Ken ku nenga e Yu no tin e Tata; esun ku konfesá e Yu tin e Tata tambe.

2:24 Pa loke ta boso, laga loke boso a tende for di prinsipio permanesé den boso. Si loke boso a tende for di prinsipio permanesé den boso, boso tambe lo permanesé den e Yu i den e Tata.

2:25 I esaki ta e promesa ku E mes a hasi na nos: bida etèrno.

2:26 E kosnan aki mi a skirbi boso tokante di esnan ku ta trata di gaña boso.

2:27 I pa loke ta boso, e unshon ku boso a risibí di djE ta permanesé den boso, i boso no tin mester di ningun hende pa siña boso; ma manera Su unshon ta siña boso tokante di tur kos, i ta bèrdadero i no ta un mentira, i meskos ku el a siña boso, boso permanesé den djE.

G5545 -- I pa loke ta boso, e unshon -> As for you, the anointing
G3739 -- ku -> which
G2983 -- boso a risibí -> you received
G3306 -- di djE ta permanesé -> from Him abides
G2192 -- den boso, i boso tin -> in you, and you have
G3756 -- no -> no
G5532 -- mester -> need
G5100 -- di ningun hende -> for anyone
G1321 -- pa siña -> to teach
G5545 -- boso; ma manera Su unshon -> you; but as His anointing
G1321 -- ta siña -> teaches
G4012 -- boso tokante di -> you about
G3956 -- tur -> all
G3956 -- kos -> things
G227 -- , i ta bèrdadero -> and is true
G5579 -- i no ta un mentira -> and is not a lie
G2531a -- , i meskos -> and just
G1321 -- ku el a siña -> as it has taught
G3306 -- boso, boso permanesé -> you, you abide

2:28 I awor, yu chikitunan, permanesé den djE, pa ora ku E paresé, nos por tin konfiansa i no keda brongosá Su dilanti na Su binida.

2:29 Si boso sa ku E ta hustu, boso sa tambe ku ken ku ta praktiká hustisia a nase for di djE.

1 Huan 3

3:1 Mira ki un amor grandi e Tata a duna nos, ku nos por wòrdu yamá yunan di Dios; i esei nos ta. Pesei mundu no konosé nos, pasobra e no a konos'E.

3:2 Stimánan, awor nos ta yunan di Dios, i ainda no a wòrdu revelá kiko nos lo ta. Nos sa sí ku ora E paresé nos lo ta meskos kunE, pasobra nos lo mir'E manera E ta.

3:3 I kada un ku tin e speransa aki den djE ta purifiká su mes, meskos ku E ta puru.

3:4 Ken ku praktiká piká ta praktiká kibramentu di lei tambe; i piká ta kibramentu di lei.

3:5 I boso sa ku El a paresé pa kita piká; i den djE no tin piká.

3:6 Ni un hende ku ta permanesé den djE no ta hasi piká; ni un hende ku ta hasi piká no a mir'E ni konos'E.

3:7 Yu chikitunan, no laga ni un hende gaña boso; esun ku ta praktiká hustisia ta hustu, meskos ku E ta hustu;

3:8 esun ku ta praktiká piká ta di diabel; pasobra diabel a hasi piká for di prinsipio. E Yu di Dios a paresé pa e propósito aki, pa E destruí e obranan di diabel.

3:9 Ni un hende ku a nase di Dios no ta praktiká piká, pasobra Su simia ta permanesé den djé; i e no por hasi piká, pasobra el a nase di Dios.

3:10 Na esaki e yunan di Dios i e yunan di diabel ta konosí: esun ku no ta praktiká hustisia no ta di Dios, ni esun ku no ta stima su ruman.

3:11 Pasobra esaki ta e mensahe ku boso a tende for di prinsipio, ku nos mester stima otro;

3:12 no manera Kain, kende tabata di e malbado, i a mata su ruman. I pa ki motibu el a mat'é? Pasobra su obranan tabata malu, i esnan di su ruman tabata hustu.

3:13 No keda strañá, rumannan, si mundu ta odia boso.

3:14 Nos sa ku nos a pasa di morto pa bida, pasobra nos ta stima e rumannan. Esun ku no ta stima ta permanesé den morto.

3:15 Ken ku odia su ruman ta un matadó; i boso sa ku ningun matadó no tin bida etèrno ta permanesé den djé.

3:16 Na esaki nos konosé amor, ku El a entregá Su bida pa nos; i nos mester entregá nos bida pa e rumannan.

3:17 Ma ken ku tin e biennan di mundu, i ta mira su ruman den nesesidat i ta sera su kurason p'é, ta kon e amor di Dios ta permanesé den djé?

3:18 Yu chikitunan, no laga nos stima ku palabra ni ku lenga, ma ku echo i bèrdat.

3:19 Na esaki nos lo sa ku nos ta di e bèrdat, i lo sigurá nos kurason dilanti di djE,

3:20 den kiko ku nos kurason kondená nos; pasobra Dios ta mas grandi ku nos kurason i sa tur kos.

3:21 Stimánan, si nos kurason no ta kondená nos, nos tin konfiansa dilanti di Dios;

3:22 i kiko ku nos pidi nos ta risibí for di djE, pasobra nos ta warda Su mandamentunan i ta hasi e kosnan ku ta agradabel den Su bista.

3:23 I esaki ta Su mandamentu, pa nos kere den e nòmber di Su Yu Jesu-Cristo, i stima otro, meskos ku El a ordená nos.

3:24 I esun ku warda Su mandamentunan ta permanesé den djE, i E den djé. I na esaki nos sa ku E ta permanesé den nos, pa medio di e Spiritu ku El a duna nos.

1 Huan 4

4:1 Stimánan, no kere tur spiritu, ma pone e spiritunan na prueba pa mira si nan ta bin di Dios, pasobra hopi profeta falsu a sali bai den mundu.

4:2 Na esaki boso ta konosé e Spiritu di Dios: tur spiritu ku ta konfesá ku Jesu-Cristo a bin den karni ta bin di Dios;

4:3 i tur spiritu ku no ta konfesá Jesus no ta di Dios; i esaki ta e spiritu di e anti-cristo, di kual boso a tende ku e ta bin, i awor e ta den mundu kaba.

4:4 Boso ta di Dios, yu chikitunan, i boso a vense nan; pasobra mas grandi ta Esun ku ta den boso ku esun ku ta den mundu.

4:5 Nan ta di mundu; pesei nan ta papia di mundu, i mundu ta skucha nan.

4:6 Nos ta di Dios; esun ku konosé Dios ta skucha nos; esun ku no ta di Dios no ta skucha nos. Na esaki nos ta konosé e spiritu di bèrdat i e spiritu di eror.

4:7 Stimánan, laga nos stima otro, pasobra amor ta bin di Dios; i tur ku ta stima ta nasí di Dios i konosé Dios.

4:8 Esun ku no ta stima no konosé Dios, pasobra Dios ta amor.

4:9 Pa medio di esaki e amor di Dios a wòrdu manifestá den nos, ku Dios a manda Su Yu unigénito den mundu pa nos por a biba pa medio di djE.

4:10 Den esaki amor ta konsistí, no ku ta nos a stima Dios, ma ku ta El a stima nos i a manda Su Yu pa ta e propisiashon pa nos pikánan.

4:11 Stimánan, si Dios a stima nos asina tantu, nos tambe mester stima otro.

4:12 Ningun hende no a mira Dios nunka; si nos stima otro, Dios ta permanesé den nos, i Su amor ta wòrdu hasí perfekto den nos.

4:13 Pa medio di esaki nos sa ku nos ta permanesé den djE i E den nos, pasobra El a duna nos di Su Spiritu.

4:14 I nos a mira i ta duna testimonio, ku e Tata a manda e Yu pa E ta e Salbador di mundu.

4:15 Ken ku konfesá ku Jesus ta e Yu di Dios, Dios ta permanesé den djé, i e den Dios.

4:16 I nos a konosé i a kere e amor ku Dios tin pa nos. Dios ta amor, i esun ku ta permanesé den amor ta permanesé den Dios, i Dios ta permanesé den djé.

4:17 Pa medio di esaki amor a wòrdu perfekshoná den nos, pa nos por tin konfiansa den e dia di huisio; pasobra manera E ta, asina tambe nos ta den e mundu aki.

4:18 Amor no konosé miedu; ma amor perfekto ta kore ku miedu, pasobra miedu tin di hasi ku kastigu, i esun ku tin miedu no a wòrdu hasí perfekto den amor.

4:19 Nos ta stima, pasobra El a stima nos promé.

4:20 Si un hende bisa: "Mi ta stima Dios," i ta odia su ruman, e ta un gañadó; pasobra esun ku no ta stima su ruman ku el a mira, no por stima Dios, Kende e no a mira.

4:21 I e mandamentu aki nos tin di djE, ku esun ku ta stima Dios mester stima su ruman tambe.

1 Huan 5

5:1 Ken ku ta kere ku Jesus ta e Cristo ta nasí di Dios; i ken ku ta stima e Tata ta stima e Yu nasí di djE.

5:2 Pa medio di esaki nos sa ku nos ta stima e yunan di Dios, ora nos ta stima Dios i ta kumpli ku Su mandamentunan.

5:3 Pasobra esaki ta e amor di Dios, ku nos ta warda Su mandamentunan; i Su mandamentunan no ta pisá.

5:4 Pasobra tur loke ta nasí di Dios ta vense mundu; i esaki ta e viktoria ku a vense mundu--nos fe.

5:5 I ta ken ta esun ku ta vense mundu, si no ta esun ku ta kere ku Jesus ta e Yu di Dios?

5:6 Esaki ta Esun ku a bin pa medio di awa i sanger, Jesu-Cristo; no ku e awa so, ma ku e awa i ku e sanger.

5:7 I ta e Spiritu ta Esun ku ta duna testimonio, pasobra e Spiritu ta e bèrdat.

5:8 Pasobra tin tres ku ta duna testimonio, e Spiritu i e awa i e sanger; i e tresnan ta di ún akuèrdo.

5:9 Si nos risibí e testimonio di hende, e testimonio di Dios ta mas grandi; pasobra e testimonio di Dios ta esaki, ku El a duna testimonio tokante di Su Yu.

5:10 Esun ku kere den e Yu di Dios tin e testimonio den su mes; esun ku no ta kere Dios a hasiE un gañadó, pasobra e no a kere den e testimonio ku Dios a duna tokante di Su Yu.

5:11 I e testimonio ta esaki, ku Dios a duna nos bida etèrno, i e bida aki ta den Su Yu.

5:12 Esun ku tin e Yu tin e bida; esun ku no tin e Yu di Dios no tin e bida.

5:13 E kosnan aki mi a skirbi boso ku ta kere den e nòmber di e Yu di Dios, pa boso por sa ku boso tin bida etèrno.

5:14 I esaki ta e konfiansa ku nos tin Su dilanti, ku si nos pidi kualkier kos konforme Su boluntat, E ta tende nos.

5:15 I si nos sa ku E ta tende nos den tur loke nos pidi, nos sa ku nos tin e petishonnan ku nos a pidi di djE.

5:16 Si un hende mira su ruman ta kometé un piká ku no ta hiba na morto, e mester pidi Dios, i Dios, pa su motibu, lo duna bida na esnan ku ta kometé piká ku no ta hiba na morto. Tin un piká ku ta hiba na morto; mi no ta bisa ku e mester pidi pa esaki.

G1437 -- Si -> If
G5100 -- un hende -> anyone
G3708 -- mira -> sees
G80 -- su ruman -> his brother
G264 -- ta kometé -> committing
G266 -- un piká -> a sin
G2288 -- ku no ta hiba na morto -> ] to death
G154 -- , e mester pidi -> he shall ask
G1325 -- , i Dios, pa su motibu, lo duna -> ] will for him give
G2222 -- bida -> life
G3588 -- na esnan -> to those
G264 -- ku ta kometé -> who commit
G264 -- piká -> sin
G2288 -- ku no ta hiba na morto -> ] to death
G266 -- . Tin un piká -> . There is a sin
G2288 -- ku ta hiba na morto -> ] to death
G3004 -- ; mi no ta bisa -> I do not say
G2065 -- ku e mester pidi -> that he should make
G2065 -- pidi -> request
G1565 -- pa esaki -> for this

5:17 Tur inhustisia ta piká, i tin un piká ku no ta hiba na morto.

5:18 Nos sa ku ni un hende ku ta nasí di Dios no ta hasi piká; ma Esun ku a nase di Dios ta ward'é, i e malbado no ta mishi kuné.

5:19 Nos sa ku nos ta di Dios, i henter mundu ta bou di kontrol di e malbado.

5:20 I nos sa ku e Yu di Dios a bin, i a duna nos komprendementu, pa nos konosé Esun ku ta bèrdadero, i nos ta den Esun ku ta bèrdadero, den Su Yu Jesu-Cristo. Esaki ta e Dios bèrdadero i bida etèrno.

G3609a -- I nos sa -> And we know
G5207 -- ku e Yu -> that the Son
G2316 -- di Dios -> of God
G2240 -- a -> has
G2240 -- bin -> come
G1325 -- , i a duna -> and has given
G1271 -- nos komprendementu -> us understanding
G2443 -- , pa -> so
G1097 -- nos konosé -> that we may know
G228 -- Esun ku -> Him who
G228 -- ta bèrdadero -> is true
G228 -- , i nos ta den Esun ku -> and we are in Him who
G228 -- ta bèrdadero -> is true
G5207 -- , den Su Yu -> in His Son
G2424 -- Jesu-Cristo -> Jesus
G5547 -- Jesu-Cristo -> Christ
G3778 -- . Esaki -> . This
G228 -- ta e Dios bèrdadero -> is the true
G2316 -- Dios -> God
G166 -- i bida etèrno -> and eternal
G2222 -- bida -> life

5:21 Yu chikitunan, warda boso di ídolonan.