Mateo 19

BSNP Edita

Mateo 19

19:1 I a sosodé ku ora Jesus a kaba di papia e palabranan aki, El a sali bai for di Galilea i a yega na e region di Judea, na e otro banda di Jordan.

19:2 I multitutnan grandi tabata siguiE, i E tabata kura nan ayanan.

19:3 I algun fariseo a bin serka djE pa pon'E na prueba, bisando: "Lei ta pèrmití pa un hòmber diborsiá su esposa pa kualkier motibu?"

19:4 I El a kontestá i a bisa: "Boso no a lesa ku Esun ku a krea hende for di prinsipio 'a traha nan hòmber i muhé,'

19:5 i a bisa: 'Pa e motibu aki un hòmber lo bandoná su tata i mama i lo uni ku su esposa; i nan dos lo bira ún karni'?

19:6 Asina anto nan no ta dos mas, sino ún karni. Pesei loke Dios a uni, no laga ningun hende separá."

19:7 Nan a bis'E: "Pakiko anto Moisés a ordená pa dun'é un karta di diborsio i pa mand'é bai?"

19:8 El a bisa nan: "Pa motibu di e duresa di boso kurason Moisés a pèrmití boso diborsiá boso esposanan; ma for di prinsipio no tabata asina.

19:9 I Mi ta bisa boso, ken ku diborsiá su esposa, si no ta pa motibu di inmoralidat seksual, i kasa ku otro muhé, ta kometé adulterio."

19:10 E disipelnan a bis'E: "Si ta asin'aki e relashon di un hòmber ta ku su esposa, anto ta mihó pa no kasa."

19:11 Ma El a bisa nan: "No ta tur hende por aseptá e palabra aki, ma solamente esnan na kendenan el a wòrdu duná.

19:12 Pasobra tin eunuko ku a nase asina for di barika di nan mama; i tin eunuko ku a wòrdu hasí eunuko dor di hende; i tambe tin eunuko ku a hasi nan mes eunuko pa kousa di e reino di shelu. Esun ku por aseptá esaki, lagu'é asept'é."

19:13 E ora ei algun mucha a wòrdu tresí serka djE, pa E pone Su mannan riba nan i hasi orashon; i e disipelnan a reprendé nan.

19:14 Ma Jesus a bisa: "Laga e muchanan, i no stroba nan di bin serka Mi, pasobra e reino di shelu ta pertenesé na esnan manera esakinan."

19:15 I despues di a pone Su mannan riba nan, El a bai for di einan.

19:16 I mira, a bin un hende serka djE ku a bisa: "Maestro, kiko ta e kos bon ku mi mester hasi pa mi por haña bida etèrno?"

19:17 I El a kontest'é: "Pakiko bo ta puntra Ami kiko ta bon? Tin solamente Un ku ta bon; ma si bo kier drenta bida, warda e mandamentunan."

19:18 El a puntr'E: "Kualnan?" I Jesus a kontestá: "'No mata; no kometé adulterio; no hòrta; no duna testimonio falsu;

19:19 onra bo tata i bo mama,' i 'stima bo próhimo manera bo mes.'"

19:20 E hoben a bis'E: "Tur e kosnan aki mi a warda. Kiko mas mi falta?"

19:21 Jesus a bis'é: "Si bo kier ta perfekto, bai i bende bo propiedatnan i duna na hende pober, i lo bo tin tesoro den shelu; i bin, siguiMi."

19:22 Ma ora ku e hoben a tende e palabranan aki, el a bai tur tristu, pasobra e tabata doño di hopi propiedat.

19:23 Anto Jesus a bisa Su disipelnan: "Di bèrdat Mi ta bisa boso, ta difisil pa un hende riku drenta e reino di shelu.

19:24 I atrobe Mi ta bisa boso, ta mas fasil pa un kamel pasa dor di wowo di un angua, ku pa un hende riku drenta e reino di Dios."

19:25 Ora ku e disipelnan a tende esaki, nan a keda masha asombrá i a puntra: "Ta ken por wòrdu salbá anto?"

19:26 I Jesus a keda wak nan i a bisa nan: "Serka hende esaki ta imposibel, ma serka Dios tur kos ta posibel."

19:27 E ora ei Pedro a kontestá i a bis'E: "Ata nos a bandoná tur kos i a siguiBo; kiko anto nos lo haña?"

19:28 I Jesus a bisa nan: "Di bèrdat Mi ta bisa boso, ku den e regenerashon, ora ku e Yu di Hende lo sinta riba e trono di Su gloria, boso ku a siguiMi tambe lo sinta riba diesdos trono i huzga e diesdos tribunan di Israel.

19:29 I tur hende ku a bandoná kasnan òf ruman hòmbernan òf ruman muhénan òf tata òf mama òf yunan òf kunukunan pa kousa di Mi nòmber, lo risibí hopi bes mas tantu, i lo eredá bida etèrno.

19:30 Ma hopi ku ta promé lo ta último, i e últimonan lo ta promé.

Mateo 18 Mateo 20