Marko 7

BSNP Edita

Marko 7

7:1 I e fariseonan i algun di e eskribanan, kendenan a bin for di Jerusalèm, a bin para rònt di djE

7:2 i a mira ku algun di Su disipelnan tabata kome nan pan ku man impuru, esta, sin laba.

7:3 (Pasobra e fariseonan i tur e hudiunan no ta kome sin ku nan laba nan man kuidadosamente promé, kumpliendo asina ku e tradishon di e ansianonan;

7:4 i ora nan bin for di plasa nan no ta kome sin ku nan a laba nan mes promé; i tin hopi otro kos di tradishon ku nan a risibí pa nan kumpli kuné, manera labamentu di kopa i kanika i wea di bròns.)

7:5 I e fariseonan i e eskribanan a puntr'E: "Pakiko Bo disipelnan no ta kana segun tradishon di e ansianonan, ma ta kome nan pan ku man impuru?"

7:6 I El a bisa nan: "Ku rason Isaias a profetisá di boso, hipokrítnan, manera ta pará skirbí: 'E pueblo aki ta onraMi ku nan lepnan, ma nan kurason ta leu for di Mi.

7:7 Ma en bano nan ta adoráMi, siñando komo doktrina e preseptonan di hende.'

7:8 Neglishando e mandamentu di Dios, boso ta tene boso mes na e tradishon di hende."

7:9 Tambe El a bisa nan: "Bunita asina boso ta pone e mandamentu di Dios un banda pa kumpli ku boso tradishon.

7:10 Pasobra Moisés a bisa: 'Onra bo tata i bo mama'; i 'Esun ku papia malu di tata òf mama, laga mat'é';

7:11 ma boso ta bisa: 'Si un hende bisa su tata òf su mama: Tur loke ku mi tin, ku mi por a yuda boso kuné, ta Korban (es desir, duná na Dios),'

7:12 anto boso no ta pèrmitié mas pa hasi nada ni pa su tata ni pa su mama,

7:13 hasiendo asina e palabra di Dios bira sin balor dor di boso tradishon ku boso a pasa ofer pa otronan; i hopi kosnan asina boso ta hasi."

7:14 I ora ku El a yama e multitut serka djE atrobe, El a bisa nan: "Boso tur skuchaMi i komprendé:

7:15 no tin nada pafó di hende, ku ta bai den hende, ku por hasié impuru; ma e kosnan ku ta sali for di hende ta loke ta kontaminá hende.

7:16 [Si un hende tin orea pa tende, lagu'é tende."]

7:17 I ora ku El a laga e multitut i a bai den e kas, Su disipelnan a hasiE pregunta tokante di e parábola.

7:18 I El a bisa nan: "Boso tambe ta asina sin komprendementu? Boso no ta komprendé ku tur loke ta drenta di pafó den un hende no por kontamin'é;

7:19 pasobra esei no ta bai den su kurason, ma den su barika i ta wòrdu eliminá?" Asina El a deklará tur kuminda puru.

7:20 I El a bisa: "Loke ta sali for di hende, ta esei ta loke ta kontaminá hende.

7:21 Pasobra for di paden, for di kurason di hende, ta sali mal pensamentu, fornikashon, ladronisia, matamentu, adulterio,

7:22 echonan di kudishi i maldat, tambe engaño, sensualidat, envidia, kalumnia, orguyo i bobedat.

7:23 Tur e maldatnan aki ta sali for di paden i ta kontaminá hende."

7:24 I for di einan El a lanta bai na e region di Tiro i Sidon. I ora ku El a bai den un kas, E no tabata kier pa ni un hende sa esaki; ma E no por a keda skondí.

7:25 Pasobra un muhé, kende su yu muhé chikitu tabatin un spiritu impuru, ora ku el a tende di djE, mesora a bin i a tira su kurpa abou na Su pia.

7:26 Awor e muhé tabata un pagano, nasí na Sirofenisia. I e tabata keda pidiE pa saka e demoño for di su yu muhé.

7:27 I El a bis'é: "Laga e yunan kome nan barika yen promé, pasobra no ta pas pa kohe pan di e yunan tir'é pa e kachónan."

7:28 Ma el a kontestá i a bis'E: "Sí, Señor, ma asta e kachónan bou di mesa ta kome e garnachinan di pan di e yunan."

7:29 I El a bis'é: "Pa motibu di e palabra aki, bai numa; e demoño a sali for di bo yu muhé."

7:30 I ora ku el a bai su kas bèk, el a haña su yu drumí riba kama; i e demoño a sali for di djé.

7:31 I El a sali atrobe for di e region di Tiro, i pasando dor di Sidon El a yega na Laman di Galilea, denter di e region di Dekápolis.

7:32 I nan a trese serka djE un hende ku tabata sordo i ku tabatin lenga pegá; i nan a rogu'E pa E pone Su man riba djé.

7:33 I El a hal'é un banda, apartá for di e multitut, i a hinka Su dede den su orea, i El a skupi i a mishi ku su lenga,

7:34 i El a hisa Su kara wak na shelu, a hala un rosea profundo i a bis'é: "Efata!" esta: "Sea habrí!"

7:35 I su oreanan a habri mesora, i e kuèrdè di su lenga a lòs, i el a kuminsá papia kla-kla.

7:36 I El a ordená nan pa no konta ningun hende; ma mas E ordená nan pa no konta, mas nan tabata proklamá e notisia.

7:37 I nan a keda masha asombrá mes, bisando: "El a hasi tur kos asina bon; E ta hasi sordo tende i mudo papia."

Marko 6 Marko 8