Galatanan 5

BSNP Edita

Galatanan 5

5:1 Ta pa libertat Cristo a hasi nos liber; pesei, keda para firme i no sea sometí atrobe na un yugo di sklabitut.

5:2 Mira, ami, Pablo, ta bisa boso ku si boso risibí sirkumsishon, Cristo lo no ta di ningun benefisio pa boso.

5:3 I mi ta bolbe duna testimonio na kada hòmber ku risibí sirkumsishon, ku e ta obligá pa warda henter e Lei.

5:4 Boso a wòrdu separá for di Cristo, boso ku ta buska pa wòrdu hustifiká pa medio di lei; boso a kai for di grasia.

5:5 Pasobra nos, dor di Spiritu, pa medio di fe, ta wardando riba e speransa di hustisia.

5:6 Pasobra den Cristo Jesus ni sirkumsishon ni insirkumsishon no ta nifiká nada, ma fe ku ta obra dor di amor.

5:7 Boso tabata kore bon; ken a stroba boso di obedesé e bèrdat?

5:8 E konvikshon aki no a bin di Esun ku ta yama boso.

5:9 Un tiki zürdeg ta hasi henter e mansa bira zür.

5:10 Mi tin konfiansa den boso den Señor, ku boso lo no tuma ningun otro forma di pensa; ma esun ku ta trastorná boso lo karga su kondenashon, ken ku e ta.

5:11 Ma ami, rumannan, si ainda mi ta prediká sirkumsishon, pakiko mi ta wòrdu pèrsiguí ainda? E ora ei e piedra-di-trompeká di e krus a wòrdu abolí.

5:12 Ohalá ku esnan ku ta trastorná boso por a mutilá nan mes.

5:13 Pasobra boso a wòrdu yamá pa libertat, rumannan; solamente, no uza boso libertat komo un oportunidat pa e karni, ma laga un sirbi otro pa medio di amor.

5:14 Pasobra henter e Lei ta keda kumplí den un solo palabra, esta: "Stima bo próhimo manera bo mes."

5:15 Ma si boso ta morde i ta devorá otro, mira pa boso no wòrdu destruí un dor di otro.

5:16 Ma mi ta bisa, kana segun e Spiritu, i boso lo no kumpli ku deseo di e karni.

5:17 Pasobra e karni ta pone su deseo kontra e Spiritu, i e Spiritu kontra e karni; pasobra esakinan ta kontrario na otro, pa boso no hasi e kosnan ku boso kier.

5:18 Ma si boso ta wòrdu guiá pa e Spiritu, boso no ta bou di Lei.

5:19 Awor e obranan di karni ta evidente, kualnan ta: inmoralidat, impuresa, sensualidat,

5:20 idolatria, bruheria, hostilidat, bringamentu, yalursheit, rabiamentu, pleitamentu, desakuèrdo, doktrina falsu,

5:21 envidia, buracheria, parandiamentu, i kosnan asin'aki, di kualnan mi ta spièrta boso di antemano, meskos ku mi a spièrta boso kaba di antemano, ku esnan ku praktiká sorto di kosnan asina lo no eredá e reino di Dios.

5:22 Ma fruta di e Spiritu ta amor, goso, pas, pasenshi, kariño, bondat, fieldat,

5:23 mansedumbre, dominio propio; kontra kosnan asina no tin lei.

5:24 Awor esnan ku ta pertenesé na Cristo Jesus a krusifiká e karni ku su pashonnan i deseonan.

5:25 Si nos ta biba segun e Spiritu, laga nos kana tambe segun e Spiritu.

5:26 No laga nos bira hende gabadó, probokando otro, kudishando otro.

Galatanan 4 Galatanan 6