Efesionan 6

BSNP Edita

Efesionan 6

6:1 Yunan, obedesé boso mayornan den Señor, pasobra esaki ta hustu.

6:2 Onra bo tata i bo mama (ku ta e promé mandamentu ku un promesa),

6:3 pa bai bo bon i pa bo tin bida largu riba tera.

6:4 I boso, tatanan, no proboká boso yunan na rabia, ma lanta nan den e disiplina i instrukshon di Señor.

6:5 Esklabunan, sea obedesido na esnan ku ta boso shon segun karni, ku temor i temblamentu, den e sinseridat di boso kurason, manera na Cristo,

6:6 no sirbiendo pa bista, manera esnan ku kier agradá hende, ma manera esklabunan di Cristo, hasiendo e boluntat di Dios di kurason.

6:7 Sirbi ku bon boluntat, manera na Señor, i no na hende,

6:8 sabiendo ku ki kos bon ku kada un hasi, esaki é lo risibí bèk di Señor, sea esklabu òf liber.

6:9 I boso, shonnan, hasi meskos ku nan, i laga amenasa para, sabiendo ku e Shon, tantu di nan komo di boso, ta den shelu, i p'E no tin distinshon di persona.

6:10 Finalmente, sea fuerte den Señor, i den e forsa di Su poder.

6:11 Bisti e armadura kompleto di Dios, pa boso por para firme kontra e trampanan di diabel.

6:12 Pasobra nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial.

6:13 Pesei, tuma e armadura kompleto di Dios, pa boso por resistí den e dia malu, i despues di a hasi tur kos, para firme.

6:14 Para firme anto, ku boso hep fahá ku bèrdat, i ku e korasa di hustisia bistí,

6:15 i ku boso pianan bistí ku e preparashon di e evangelio di pas;

6:16 i riba tur kos, tumando e eskudo di fe, ku kual boso lo por paga tur e flechanan sendí di e malbado.

6:17 I tuma e hèlm di salbashon, i e spada di e Spiritu, kual ta e Palabra di Dios.

6:18 Ku tur orashon i súplika pidi tur ora bai den Spiritu, i ku esaki na bista, sea alerta ku tur pèrseveransia i súplika pa tur e santunan.

6:19 I hasi orashon pa mi, pa e palabra por wòrdu duná na mi, pa mi por habri mi boka pa hasi konosí ku tur frankesa e misterio di e evangelio,

6:20 pa kual mi ta un embahador na kadena; di manera ku mi por papia di djé ku tur frankesa, manera mi mester papia.

6:21 Ma pa boso tambe por sa di mi sirkumstansianan, kon ta bai ku mi, e ruman stimá i sirbidó fiel den Señor, Tikiko, lo hasi tur kos konosí na boso.

6:22 I mi a mand'é serka boso ku e propósito aki, pa boso por sa di nos, i pa é por konsolá boso kurason.

6:23 Pas sea ku e rumannan, i amor ku fe, di Dios Tata i di Señor Jesu-Cristo.

6:24 Grasia sea ku tur esnan ku ta stima nos Señor Jesu-Cristo ku un amor inkoruptibel. Amèn.

Efesionan 5 Filipensenan 1