1 Tesalonisensenan 5

BSNP Edita

1 Tesalonisensenan 5

5:1 Awor tokante di e tempunan i e épokanan, rumannan, no tin mester di skirbi boso nada.

5:2 Pasobra boso mes sa masha bon ku e dia di Señor lo bin meskos ku un ladron den anochi.

5:3 Mientras ku nan ta bisa: "Pas i siguridat!" pèrdishon lo bin riba nan direpiente, manera doló di parto riba un muhé na estado; i nan lo no skapa.

5:4 Ma boso, rumannan, no ta den skuridat, ku e dia ei lo a sorprendé boso manera un ladron;

5:5 pasobra boso tur ta yunan di lus i yunan di dia. Nos no ta di anochi ni di skuridat;

5:6 asina anto, no laga nos drumi manera otronan ta hasi, ma laga nos ta alerta i sobrio.

5:7 Pasobra esnan ku ta drumi, ta anochi nan ta drumi, i esnan ku ta bira burachi, ta anochi nan ta bira burachi.

5:8 Ma komo ku nos ta di dia, laga nos ta sobrio, despues di a bisti e korasa di fe i amor, i komo hèlm e speransa di salbashon.

5:9 Pasobra Dios no a destiná nos pa furia, ma pa optené salbashon pa medio di nos Señor Jesu-Cristo,

5:10 Kende a muri pa nos, pa sea nos ta lantá òf drumí, nos biba huntu kunE.

5:11 Pesei, enkurashá otro i edifiká otro, meskos ku boso ta hasiendo tambe.

5:12 Ma nos ta pidi boso, rumannan, pa boso apresiá esnan ku ta traha diligentemente meimei di boso, i ku ta guia boso den Señor i ta spièrta boso,

5:13 i pa boso tin masha hopi apresio pa nan den amor, pa motibu di nan trabou. Biba na pas ku otro.

5:14 I nos ta roga boso, rumannan, spièrta esnan ku ta hiba un bida desordená, enkurashá esnan ku ta falta ánimo, yuda e debilnan, tene pasenshi ku tur hende.

5:15 Mira pa ni un hende no paga otro malu ku malu, ma semper buska loke ta bon pa otro i pa tur hende.

5:16 Regosihá semper;

5:17 hasi orashon sin stòp;

5:18 sea gradisido den tur kos; pasobra esaki ta e boluntat di Dios pa boso den Cristo Jesus.

5:19 No paga e Spiritu;

5:20 no despresiá profesia.

5:21 Saminá tur kos; tene duru na loke ta bon;

5:22 apstené di tur forma di maldat.

5:23 Awor, ku e Dios di pas mes santifiká boso kompletamente; i ku boso spiritu i alma i kurpa sea preservá kompleto, sin kulpa na e binida di nos Señor Jesu-Cristo.

5:24 Fiel ta Esun ku ta yama boso, i E lo hasi esaki sosodé tambe.

5:25 Rumannan, hasi orashon pa nos.

5:26 Saludá tur e rumannan ku un sunchi santu.

5:27 Mi ta ordená boso bou di huramentu den nòmber di Señor pa laga e karta aki wòrdu lesá pa tur e rumannan.

5:28 Grasia di nos Señor Jesu-Cristo sea ku boso. Amèn.

1 Tesalonisensenan 4 2 Tesalonisensenan 1