1 Tesalonisensenan 3

BSNP Edita

1 Tesalonisensenan 3

3:1 Pesei, ora nos no por a soportá mas, nos a haña ku ta mihó pa ked'atras na Atenas nos so;

3:2 i nos a manda Timoteo, nos ruman i kompañero di trabou di Dios den e evangelio di Cristo, pa fortalesé i enkurashá boso tokante di boso fe,

3:3 pa ningun hende no bira intrankil pa motibu di e aflikshonnan aki; pasobra boso mes sa ku nos a wòrdu destiná pa esaki.

3:4 Pasobra di bèrdat tempu nos tabata serka boso, nos a bisa boso di antemano ku nos lo tabata bai sufri aflikshon; i asina a sosodé tambe, manera boso sa.

3:5 Pa e motibu aki, ora mi no por a soportá mas, mi tambe a trata di haña sa tokante di boso fe, pa miedu ku e tentadó por a hinka boso den tentashon, i nos trabou lo a resultá en bano.

3:6 Ma awor ku Timoteo a bolbe for di boso serka nos, i a trese bon notisia pa nos di boso fe i amor, i ku boso semper ta kòrda nos ku kariño, anhelando pa mira nos, meskos ku nos tambe ta anhelá pa mira boso,

3:7 pa e motibu aki, rumannan, den tur nos angustia i aflikshon nos a wòrdu konsolá tokante di boso dor di boso fe,

3:8 pasobra awor nos ta biba, si boso para firme den Señor.

3:9 Pasobra ki gradisimentu nos por duna Dios pa boso pa tur e goso ku kual nos ta regosihá dilanti di nos Dios pa boso motibu?

3:10 Di dia i anochi nos ta sigui hasi orashon pa boso, pa nos por mira boso kara i kompletá loke ta falta den boso fe.

3:11 Awor, ku nos Dios i Tata mes i Jesus nos Señor dirigí nos kaminda serka boso;

3:12 i ku Señor hasi boso oumentá i abundá den amor pa otro, i pa tur hende, meskos ku nos tambe tin pa boso;

3:13 pa E stablesé boso kurason ireprochabel den santidat dilanti di nos Dios i Tata na binida di nos Señor Jesus ku tur Su santunan.

1 Tesalonisensenan 2 1 Tesalonisensenan 4