Buska den Beibel

Salmo 106; Salmo 107 BSNP Edita

Salmonan 106

106:1 Alabá SEÑOR! Duna gradisimentu na SEÑOR, pasobra E ta bon; pasobra Su miserikòrdia ta pa semper.

106:2 Ta ken por ekspresá e obranan poderoso di SEÑOR, òf deklará tur Su alabansa?

106:3 Bendishoná ta esnan ku ta mantené huisio, kendenan ta praktiká hustisia tur ora.

106:4 Kòrda riba mi, O SEÑOR, segun Bo bondat pa ku Bo pueblo; bishitámi ku Bo salbashon,

106:5 pa mi por mira e prosperidat di Bo skohínan, pa mi por regosihá den e alegria di Bo nashon, pa mi por gloria huntu ku Bo erensia.

106:6 Nos a peka meskos ku nos tatanan, nos a kometé inikidat, nos a hasi maldat.

106:7 Nos tatanan na Egipto no a komprendé Bo maraviyanan; nan no a kòrda riba e multitut di Bo miserikòrdianan, ma a rebeldiá na laman, na Laman Kòrá.

106:8 Sinembargo, El a salba nan pa kousa di Su nòmber, pa hasi Su poder konosí.

106:9 Asina El a reprendé Laman Kòrá, i esei a seka; El a guia nan dor di e profundidatnan, manera dor di desierto.

106:10 Asina El a salba nan for di man di esun ku tabata odia nan, i a redimí nan for di man di e enemigu.

106:11 I e awanan a tapa nan atversarionan; ni un di nan no a sobrebibí.

106:12 E ora ei nan a kere Su palabranan; nan a kanta Su alabansa.

106:13 Masha lihé nan a lubidá Su obranan; nan no a spera riba Su konseho.

106:14 Den e tera seku nan a entregá nan mes kompletamente na golosidat, i a tenta Dios den desierto.

106:15 Asina El a duna nan loke nan a pidi, ma a manda flakesa den nan alma.

106:16 Tempu ku nan tabata envidiá Moisés den e kampamentu, i Aaron, esun santu di SEÑOR,

106:17 tera a habri i a traga Datan, i a tapa e asamblea di Abiram.

106:18 I un kandela a sende den nan asamblea; e flam a kaba ku e malbadonan.

106:19 Nan a traha un bishé na Horèb, i a adorá un imagen bashá.

106:20 Asina nan a kambia nan gloria pa e imagen di un baka ku ta kome yerba.

106:21 Nan a lubidá Dios, nan Salbador, Kende a hasi kosnan grandi na Egipto,

106:22 maraviyanan na tera di Kam, i kosnan temibel na Laman Kòrá.

106:23 Pesei El a bisa ku E lo a destruí nan, si Moisés, Su skohí, no a intervení pa kita Su furia for di riba nan, pa E no destruí nan.

106:24 E ora ei nan a despresiá e dushi tera; nan no a kere Su palabra,

106:25 ma nan tabata murmurá den nan tèntnan; nan no a skucha na e bos di SEÑOR.

106:26 Pesei El a hura nan, ku E lo benta nan abou den desierto,

106:27 i ku E lo tira nan desendientenan meimei di e nashonnan, i plama nan den e teranan.

106:28 Tambe nan a uni nan mes ku Baal-peor, i tabata kome sakrifisionan ofresí na e mortonan.

106:29 Asina nan a probok'E na rabia ku nan echonan, i a lanta un plaga meimei di nan.

106:30 E ora ei Finees a lanta i a intervení; i asina e plaga a para.

106:31 I esei a wòrdu kontá komo hustisia p'é, pa tur generashon, pa semper.

106:32 Tambe nan a probok'E na rabia na e awanan di Meriba, i pa nan motibu a bai malu ku Moisés;

106:33 pasobra nan a rebeldiá kontra Su Spiritu, i sin pensa mes el a papia ku su lepnan.

106:34 Nan no a destruí e pueblonan, manera SEÑOR a ordená nan,

106:35 ma nan a meskla ku e nashonnan i a siña nan práktikanan,

106:36 i a sirbi nan ídolonan, kualnan a bira un trampa pa nan.

106:37 Asta nan tabata sakrifiká nan yu hòmbernan i nan yu muhénan na demoñonan,

106:38 i tabata drama sanger inosente, e sanger di nan yu hòmbernan i nan yu muhénan, ku nan tabata sakrifiká na e ídolonan di Kanaan; i e tera a keda kontaminá ku sanger.

106:39 Asina nan a wòrdu kontaminá dor di nan mes práktikanan, i ku nan mes echonan nan a prostituí nan mes.

106:40 Pesei e rabia di SEÑOR a sende kontra Su pueblo, i El a aboresé Su erensia.

106:41 E ora ei El a entregá nan den man di e nashonnan, i esnan ku tabata odia nan tabata goberná riba nan.

106:42 Tambe nan enemigunan tabata oprimí nan, i nan a keda umiyá bou di nan poder.

106:43 Hopi biaha E kier a libra nan, ma nan tabata desidido den nan rebeldia, i asina a hundi den nan inikidat.

106:44 Apesar di esei El a wak nan aflikshon, ora ku El a tende nan sklamashon;

106:45 i pa nan kousa El a kòrda riba Su aliansa ku nan, i a repentí konforme e grandesa di Su miserikòrdia.

106:46 Tambe El a hasi ku nan a haña kompashon serka tur esnan ku a hiba nan komo katibu.

106:47 Salba nos, O SEÑOR nos Dios, i rekohé nos for di meimei di e nashonnan, pa nos duna gradisimentu na Bo nòmber santu, i pa nos gloria den Bo alabansa.

106:48 Bendishoná sea SEÑOR, e Dios di Israel, for di etèrnidat i te na etèrnidat. I laga henter e pueblo bisa: "Amèn." Alabá SEÑOR!n BUKI Vr Salmo 107-150

Salmonan 107

107:1 Duna gradisimentu na SEÑOR, pasobra E ta bon; pasobra Su miserikòrdia ta pa semper.

107:2 Laga esnan ku SEÑOR a redimí bisa asina, esnan ku El a redimí for di man di e atversario,

107:3 i ku El a rekohé for di e paisnan, for di pariba i for di pabou, for di nòrt i for di sùit.

107:4 Nan a kana dwal den desierto den un region desolá, sin haña un stat pa biba aden.

107:5 Yen di hamber i set nan alma a desmayá den nan.

107:6 E ora ei nan a sklama na SEÑOR den nan angustia, i El a libra nan for di nan aflikshonnan.

107:7 Tambe El a guia nan riba un kaminda stret, pa bai na un stat habitá.

107:8 Laga nan duna gradisimentu na SEÑOR pa Su miserikòrdia, i pa Su maraviyanan na e yunan di hende!

107:9 Pasobra E ta satisfasé e alma ku tin set, i e alma ku tin hamber E ta yena ku loke ta bon.

107:10 Algun tabata biba den skuridat i den e sombra di morto, prezonan den miseria i na kadena,

107:11 pasobra nan a rebeldiá kontra e palabranan di Dios, i a despresiá e konseho di e Haltísimo.

107:12 Pesei El a umiyá nan kurason ku trabou duru; nan a trompeká i no tabatin ningun hende pa yuda nan.

107:13 E ora ei nan a sklama na SEÑOR den nan angustia, i El a salba nan for di nan aflikshonnan.

107:14 El a saka nan for di skuridat i for di e sombra di morto, i a kibra nan kadenanan na pida-pida.

107:15 Laga nan duna gradisimentu na SEÑOR pa Su miserikòrdia, i pa Su maraviyanan na e yunan di hende!

107:16 Pasobra El a kibra e portanan di bròns, i a kòrta e grèndelnan di heru na pida-pida.

107:17 Bobonan a wòrdu afligí pa motibu di nan komportashon rebelde i pa motibu di nan inikidatnan.

107:18 Nan alma a aboresé tur sorto di kuminda, i nan a yega te na e portanan di morto.

107:19 E ora ei nan a sklama na SEÑOR den nan angustia, i El a salba nan for di nan aflikshonnan.

107:20 El a manda Su palabra i a kura nan, i a libra nan for di nan destrukshonnan.

107:21 Laga nan duna gradisimentu na SEÑOR pa Su miserikòrdia, i pa Su maraviyanan na e yunan di hende!

107:22 Tambe, laga nan ofresé sakrifisionan di gradisimentu, i konta di Su obranan ku kantamentu gososo.

107:23 Esnan ku ta baha bai laman den barku, ku ta hasi negoshi riba awanan grandi,

107:24 eseinan a mira e obranan di SEÑOR, i Su maraviyanan den e profundidat.

107:25 Pasobra El a papia i a lanta un bientu di tempestat ku a lanta e olanan di laman.

107:26 Nan a subi na e shelunan, nan a baha den e profundidatnan; nan alma a dirti bai pa motibu di miseria.

107:27 Nan tabata tembla i zeilu manera hòmber burachi, i a keda man na kabes.

107:28 E ora ei nan a sklama na SEÑOR den nan angustia, i El a saka nan for di nan aflikshonnan.

107:29 El a hasi e tempestat bira bientu suave, asina ku e olanan di laman a kalma.

107:30 E ora ei nan a keda kontentu, pasobra e olanan a kalma. Asina El a guia nan na nan haf deseá.

107:31 Laga nan duna gradisimentu na SEÑOR pa Su miserikòrdia, i pa Su maraviyanan na e yunan di hende!

107:32 Laga nan hals'E tambe den e kongregashon di e pueblo, i alab'E den e konseho di ansianonan.

107:33 E ta hasi riunan bira desierto, fuentenan di awa bira tera seku,

107:34 i tera fértil bira saliña, pa motibu di e maldat di esnan ku ta biba den djé.

107:35 E ta hasi desierto bira tanki di awa, i tera seku, fuentenan di awa.

107:36 I ayanan E ta duna esnan ku tin hamber lugá pa biba aden, pa nan por stablesé un stat habitá,

107:37 i sembra kunukunan, i planta hòfinan di wendrùif ku ta produsí un kosecha abundante.

107:38 Tambe E ta bendishoná nan, i nan ta multipliká masha hopi mes; i E no ta laga nan bestianan mengua.

107:39 Ora nan bira poko i abatí pa motibu di opreshon, miseria i pena,

107:40 E ta drama despresio riba prensnan, i ta hasi nan kana dwal den un lugá desolá sin kaminda.

107:41 Ma E ta lanta esnan den nesesidat, saka nan for di aflikshon, i ta hasi famianan multipliká manera tou di karné.

107:42 E hustunan ta mira esaki i ta keda kontentu, ma tur inikidat ta sera boka.

107:43 Ken ta sabí? Lagu'é paga bon tino na e kosnan aki, i konsiderá e miserikòrdia di SEÑOR.