Buska den Beibel

Job 6; Job 7; Job 8; Job 9 BSNP Edita

Job 6

6:1 E ora ei Jòb a kontestá:

6:2 "Mara mi pena por a wòrdu pisá, bèrdè, i poní den balansa huntu ku mi kalamidat!

6:3 Pasobra e ora ei e lo tabata mas pisá ku santu di laman; pesei mi palabranan no tabata kontrolá.

6:4 Pasobra e flechanan di e Todopoderoso ta den mi; mi spiritu ta bebe nan veneno; e terornan di Dios ta para den òrdu di bataya kontra mi.

6:5 Buriku di mondi sa grita ora e tin yerba, òf buey sa grita ora e tin kuminda?

6:6 Un kos sin smak por wòrdu komí sin salu, òf tin smak den blanku di webu?

6:7 Mi alma ta nenga di mishi ku nan; pa mi nan ta manera kuminda ku ta duna rel.

6:8 "Mara mi por a haña mi petishon, i ku Dios lo a dunami loke mi ta anhelá na djé!

6:9 Mara ku lo a agradá Dios pa kibrami na pida-pida, ku E lo a saka Su man i kòrtami kit'afó!

6:10 Ma esaki ta mi konsolashon te awor, i mi ta regosihá den doló ku no tin alivio, ku mi no a nenga e palabranan di Esun Santu.

6:11 "Ki forsa mi tin, ku mi mester spera ainda? I kual ta mi fin, ku mi mester prolongá mi bida?

6:12 Akaso mi forsa ta forsa di piedra? Of ta di bròns mi karni ta?

6:13 No ta asina ku mi yudansa no ta den mi, i ku sabiduria ta kitá for di mi?

6:14 "Pa e hende ku ta desesperá mester tin kompashon di parti di su amigu, pa e no bandoná temor di e Todopoderoso.

6:15 Mi rumannan a aktua ku engaño, manera un roi, manera koridanan di roinan ku ta disparsé,

6:16 ku ta trublá pa motibu di eis, i den kualnan sneu ta dirti bai.

6:17 Den tempu di sekura nan ta stòp di kore, ora ta kayente nan ta disparsé for di nan lugá.

6:18 E berehanan ku nan ta sigui ta yen di lorada, nan ta kaba na nada i ta peresé.

6:19 E karavananan di Tema tabata buska nan, e biaheronan di Seba tabata spera di mira nan.

6:20 Nan a keda desapuntá, pasobra nan tabata konfia; nan a yega ayanan i a keda konfundí.

6:21 Di bèrdat, ta asina boso a para bira awor, boso ta mira un teror i ta haña miedu.

6:22 Akaso mi a bisa: 'Dunami algu,' òf: 'Ofresé plaka pasá bou di mesa pa mi for di boso rikesa,'

6:23 òf: 'Librami for di man di e atversario,' òf: 'Redimími for di man di e opresornan'?

6:24 "Siñami, i lo mi keda ketu; i mustrami kon mi a faya.

6:25 Ki poderoso palabranan onesto ta! Ma kiko bo argumento ta proba?

6:26 Bo tin intenshon di reprendé mi palabranan, ora ku palabra di un hende ku ta desesperá ta manera bientu?

6:27 Asta pa wérfano boso kier tira lòt, i koba un buraku pa boso amigu.

6:28 "Awor sea asina bon di wak mi, i mira si mi ta gaña den bo kara.

6:29 Pensabo bon awor, no laga tin inhustisia; sí, pensabo bon, ainda mi hustisia ta keda para.

6:30 Tin inhustisia riba mi lenga? Mi shel'i boka no por distinguí malisia?

Job 7

7:1 "Hende no ta obligá di traha riba tera? I su dianan no ta manera dianan di un trahadó kontratá?

7:2 Manera un esklabu ku ta anhelá na sombra, òf manera un trahadó kontratá ku ta spera fervientemente riba su pago,

7:3 asina mi ta poní pa eredá lunanan di banidat, i nochinan trabahoso ta stipulá pa mi.

7:4 Ora mi bai drumi mi ta puntra: 'Ki ora lo mi lanta?' Ma nochi ta largu, i kontinuamente mi ta bòlter te ora dia habri.

7:5 Mi kurpa ta tur na bichi i kaska di stòf; mi kueru ta habri i ta basha pus.

7:6 "Mi dianan ta bai mas lihé ku spul di un wefdó-di-tela, i ta yega na un fin sin speransa.

7:7 Kòrda ku mi bida ta djis un rosea; mi wowo lo no mira mas loke ta bon.

7:8 Wowo di esun ku ta mirami lo no mirami mas; bo wowonan lo ta riba mi, ma lo mi no t'ei.

7:9 Ora ku un nubia disparsé, e no t'ei mas, asina esun ku ta baha den Seol no ta subi bin ariba mas.

7:10 E no ta bolbe su kas mas, ni su lugá di biba lo no konos'é mas.

7:11 "Pesei lo mi no frena mi boka; lo mi papia den e angustia di mi spiritu, lo mi reklamá den e amargura di mi alma.

7:12 Akaso mi ta laman, òf mònster di laman, ku Bo ta pone guardia riba mi?

7:13 Si mi bisa: 'Mi kama lo konsolámi, mi sofá lo aliviá mi keho,'

7:14 e ora ei Bo ta spantami ku soñonan i ta terorisámi ku vishonnan,

7:15 di manera ku mi alma lo a preferá sofokashon, i morto na lugá di mi dolónan.

7:16 Mi ta kaba na nada; lo mi no biba pa semper. Lagami na pas, pasobra mi dianan ta djis un rosea.

7:17 "Kiko hende ta, ku Bo ta engrandes'é, i ku Bo ta preokupá p'é,

7:18 ku Bo ta samin'é tur mainta, i ta pon'é na prueba tur momento?

7:19 Lo Bo no kita Bo bista nunka mas for di mi, ni lagami na pas te ora ku mi guli mi skupi?

7:20 Mi a hasi piká? Kiko mi a hasiBo, O wardadó di hende? Pakiko Bo a ponemi komo algu pa Bo mek riba djé, asina ku mi ta un karga pa mi mes?

7:21 Pakiko anto Bo no ta pordoná mi transgreshon i kita mi inikidat? Pasobra awor lo mi drumi den stòf, i Abo lo buskami, ma lo mi no t'ei."

Job 8

8:1 E ora ei Bildad e suhita a kontestá:

8:2 "Kuantu tempu mas lo bo papia e kosnan aki, i e palabranan di bo boka ta manera un bientu fuerte?

8:3 Dios ta pèrvèrtí hustisia? Of e Todopoderoso ta pèrvèrtí loke ta korekto?

8:4 Si bo yunan a peka kontra djE, e ora ei El a entregá nan na e poder di nan transgreshon.

8:5 Si bo kier a buska Dios i roga pa kompashon serka e Todopoderoso,

8:6 si bo ta puru i rekto, siguramente awor E lo a lanta pa bo i lo a restorá bo estado hustu.

8:7 Maske bo prinsipio tabata insignifikante, tòg bo último dianan lo oumentá grandemente.

8:8 "Pa fabor, informá tokante di e generashonnan ku a pasa, i konsiderá e kosnan ku nan tatanan a investigá.

8:9 Pasobra nos ta solamente di ayera i no sa nada, pasobra nos dianan riba tera ta manera un sombra.

8:10 Lo nan no siñabo i kontabo, i saka palabra for di nan kurason?

8:11 Papirus por krese sin muras? Richi por krese sin awa?

8:12 Siendo bèrdè ainda i no kòrtá, e ta marchitá promé ku kualke otro mata.

8:13 Asina e berehanan di tur esnan ku ta lubidá Dios ta, i e speransa di e hende sin Dios lo peresé,

8:14 kende su speransa ta frágil, i kende su konfiansa ta kas di araña.

8:15 E ta konfia den su kas, ma e kas no ta keda para; e ta tene duru na djé, ma e kas no ta wanta.

8:16 E ta krese bon den solo, i su spreitnan ta plama tur kaminda den su hòfi.

8:17 Su raisnan ta lora rònt di un monton di piedra, i ta buska un lugá den e piedranan.

8:18 Si e wòrdu kitá for di su lugá, e ora ei su lugá lo nengu'é, bisando: 'Nunka mi no a mirabo.'

8:19 Mira, esaki ta e goso di Su kaminda; i for di stòf otronan lo nase.

8:20 "Ata, Dios no ta rechasá un hende perfekto, ni E no ta duna sosten na e hasidónan di maldat.

8:21 Ta yega un dia ku E lo yena bo boka ku harimentu, i bo lepnan ku gritu di alegria.

8:22 Esnan ku ta odiabo lo wòrdu bistí ku bèrguensa; i tènt di e malbado lo no t'ei mas."

Job 9

9:1 E ora ei Jòb a kontestá:

9:2 "Di bèrdat, mi sa ku t'asina, ma kon un hende por ta hustu dilanti di Dios?

9:3 Si un hende kier a diskutí kunE, e lo no por a kontest'E un bes den mil biaha.

9:4 Sabí di kurason i poderoso den forsa, ken a resistí kontra djE sin sufri daño?

9:5 E ta kita e serunan, nan no sa kon, ora ku E bòlter nan den Su rabia;

9:6 E ta sakudí tera kit'é for di su lugá, i su pilarnan ta tembla;

9:7 E ta ordená solo i e no ta sali, i ta seya e streanan;

9:8 E so ta span e shelunan, i ta kana riba e olanan di laman;

9:9 E ta traha Oso, Orion i Pleyades, i e kambernan pasùit;

9:10 E ta hasi kosnan grandi i insondabel, i obranan maraviyoso ku no por wòrdu kontá.

9:11 Si E pasa banda di mi, mi no ta mir'E; si E pasa forbei, mi no ta ripar'E.

9:12 Si E ranka kita algu, ken por strob'E? Ken por puntr'E: 'Ta kiko Bo ta hasi?'

9:13 Dios no ta kita Su rabia; e yudadónan di Rahab ta kremp bou di djE.

9:14 "Kon anto mi por kontest'E, i skohe mi palabranan pa rasoná kunE?

9:15 Pasobra maske mi tabatin rason, lo mi no por a kontestá; lo mi mester a roga pa miserikòrdia serka mi Hues.

9:16 Si mi a yama i El a kontestámi, lo mi no por a kere ku E tabata skucha mi bos.

9:17 Pasobra E ta kibrami ku un tempestat, i ta multipliká mi heridanan sin motibu.

9:18 E no ta lagami kohe rosea, ma ta saturámi ku amargura.

9:19 Si ta un asunto di poder, mira, ta E ta Esun poderoso! I si ta un asunto di hustisia, ken por eksigí di djE pa duna kuenta?

9:20 Maske mi ta hustu, mi boka lo kondenámi; maske mi ta sin kulpa, E lo deklarámi kulpabel.

9:21 "Mi ta sin kulpa; mi no ta hasi kaso di mi mes; mi ta despresiá mi bida.

9:22 Tur ta mesun kos; pesei mi ta bisa: 'E ta destruí tantu esun sin kulpa komo e malbado.'

9:23 Si zwip mata direpiente, e ta hasi bofon di e desesperashon di e inosente.

9:24 Tera ta keda entregá den man di e malbadonan; E ta tapa kara di su huesnan. Si no t'E, ta ken anto?

9:25 "Awor mi dianan ta pasa mas lihé ku un koredó; nan ta hui bai, nan no ta mira nada bon.

9:26 Nan ta pasa bai manera barku trahá di richi, manera un águila ku ta baha riba su proi.

9:27 Maske mi bisa: 'Lo mi lubidá mi keho, lo mi kita mi kara tristu i bisti un sonrisa,'

9:28 tòg mi tin miedu di tur mi dolónan, mi sa ku lo Bo no tenemi pa inosente.

9:29 Mi ta wòrdu konsiderá kulpabel; pakiko anto mi mester traha mata kurpa pòrnada?

9:30 Si mi laba mi mes ku sneu i limpia mi mannan ku soda brabu,

9:31 tòg lo Bo tirami den pos, i mi mes pañanan lo tin fis di mi.

9:32 "Pasobra E no ta un hende manera ami, ku mi por kontest'E, ku nos por bai huntu dilanti di hues.

9:33 No tin rèfri entre nos, ku por pone su man riba nos tur dos.

9:34 Lagu'E kita Su bara for di mi, i no laga miedu p'E terorisámi.

9:35 E ora ei lo mi papia sin tin miedu di djE; ma di mi mes mi no ta asina.