Buska den Beibel

Job 17; Job 18; Job 19; Job 20 BSNP Edita

Job 17

17:1 "Mi spiritu ta kibrá, mi dianan a wòrdu kòrtá, graf ta prepará pa mi.

17:2 Siguramente hasidónan di bofon ta rondonámi, i mi wowo ta fihá riba nan probokashon.

17:3 "Awor, pone Bo mes komo garantia pa mi. Ken otro lo para bòrg pa mi?

17:4 Pasobra Bo a sera nan kurason pa komprendementu; pesei lo Bo no halsa nan.

17:5 Esun ku labia su amigunan, asta wowo di su yunan lo faya.

17:6 "Ma El a hasimi bira un dicho den pueblo, i ami ta un persona den ken su kara hende ta skupi.

17:7 Mi wowo tambe a bira skur pa motibu di tristesa, i tur e miembronan di mi kurpa ta manera un sombra.

17:8 E hende rekto lo keda babuká di mira esaki, i e inosente lo lanta kontra e hende sin Dios.

17:9 Sinembargo, e hustu lo mantené su kaminda, i esun ku tin mannan limpi lo krese bira mas i mas fuerte.

17:10 "Ma awor, boso tur bin atrobe, pasobra mi no ta haña ni ún hende sabí meimei di boso.

17:11 Mi dianan a pasa, mi plannan ta kibrá, asta e deseonan di mi kurason.

17:12 Nan ta hasi nochi bira dia, bisando: 'Lus ta serka,' den presensia di skuridat.

17:13 Si mi spera Seol komo mi kas, si mi drecha mi kama den skuridat,

17:14 si mi bisa korupshon: 'Bo ta mi tata', i bichi: 'Bo ta mi mama i mi ruman muhé',

17:15 unda mi speransa ta anto? I ken por mira mi speransa?

17:16 Nan lo baha bai ku mi den Seol? Lo nos baha bai huntu den stòf?"

Job 18

18:1 E ora ei Bildad e suhita a kontestá:

18:2 "Kuantu tempu mas lo bo rondia palabra? Sea rasonabel, i e ora ei nos por papia.

18:3 Pakiko nos ta wòrdu mirá komo bestia, i konsiderá bobo den bo bista?

18:4 Abo ku ta sker bo mes den bo rabia-- pa bo motibu tera mester wòrdu bandoná, òf e baranka kitá for di su lugá?

18:5 "Di bèrdat, e lus di e malbado ta paga, i e flam di su kandela no ta duna klaridat.

18:6 E lus den su tènt a bira skur, i su lampi banda di djé ta paga.

18:7 Su pasonan vigoroso a debilitá, i su mes triki ta tir'é abou.

18:8 Pasobra su mes pianan ta tir'é den e reda, i e ta trapa den e knopwèrk.

18:9 Un klèm ta gar'é na su hilchi, i un trampa ta dal sera kuné aden.

18:10 Un laso ta skondí p'é den tera, i tin un trampa p'é riba kaminda.

18:11 Na tur banda terornan ta spant'é, i ta yag é na kada paso.

18:12 Su forsa a kaba pa kousa di hamber, i kalamidat ta pará kla banda di djé.

18:13 Su kueru ta keda destrosá dor di enfermedat; e primogénito di morto ta devorá miembronan di su kurpa.

18:14 E ta wòrdu ranká for di e siguridat di su tènt, i nan ta pon'é marcha dilanti di e rei di terornan.

18:15 Nada di loke e tin den su tènt no ta di djé; swafel ta wòrdu plamá riba su lugá di biba.

18:16 Abou su raisnan a seka, i ariba su taki ta kòrtá kitá afó.

18:17 Rekuèrdo di djé ta peresé for di tera, i e no tin nòmber riba kaya.

18:18 E ta wòrdu pushá for di lus den skuridat, i saká for di mundu.

18:19 E no tin ni desendiente ni posteridat entre su pueblo, ni ningun sobrebibiente na e lugá, kaminda e tabata biba.

18:20 Esnan di oksidente ta keda tur babuká di su destino, i esnan di oriente ta keda yen di horor.

18:21 Siguramente asina e lugánan di biba di e malbado ta, i esaki ta e lugá di esun ku no konosé Dios."

Job 19

19:1 E ora ei Jòb a kontestá:

19:2 "Kuantu tempu mas boso lo tormentámi, i kibrami na pida-pida ku palabra?

19:3 Ya ta dies biaha kaba ku boso a insultámi; boso no tin bèrguensa di tratami na manera inhustu.

19:4 Ounke di bèrdat mi a kometé eror, mi eror ta keda mi asunto.

19:5 Si di bèrdat boso kier halsa boso mes kontra mi, i dunami prueba di mi reproche,

19:6 sabi anto ku Dios a tratami na manera inhustu, i a sera Su reda rònt di mi.

19:7 "Ata, mi ta grita: 'Violensia!' ma mi no ta haña kontesta; mi ta grita pa yudansa, ma no tin hustisia.

19:8 El a sera mi kaminda ku muraya, asina ku mi no por pasa, i El a pone skuridat den mi berehanan.

19:9 El a ranka mi onor kita for di mi, i a kita e korona for di riba mi kabes.

19:10 E ta kibrami na tur banda, i mi no t'ei mas; i mi speransa El a ranka manera ta ranka un palu ku rais ku tur.

19:11 Tambe El a laga Su rabia sende kontra mi, i a konsiderámi komo Su enemigu.

19:12 Su trupanan ta bin huntu, i ta traha nan baluarte kontra mi, i ta pone nan kampamentu rònt di mi tènt.

19:13 "El a alehá mi rumannan leu for di mi, i mi konosínan a bira kompletamente straño pa mi.

19:14 Mi famianan a faya, i mi amigunan íntimo a lubidámi.

19:15 Esnan ku ta biba den mi kas i mi sirbientenan ta konsiderámi komo un hende straño. Mi ta un stranhero den nan bista.

19:16 Mi ta yama mi sirbidó, ma e no ta kontestá; mi mester rogu'é ku mi boka.

19:17 Mi esposa tin tegi di mi rosea, i mi mes rumannan tin asko di mi.

19:18 Asta mucha chikitu ta despresiámi; ora mi lanta para, nan ta papia kontra mi.

19:19 Tur mi amigunan íntimo ta aboresémi, i esnan ku mi ta stima a bira kontra mi.

19:20 Mi wesunan ta pega na mi kueru i na mi karni, solamente mi karn'i djente a keda.

19:21 "Tene duele di mi, tene duele di mi, O boso, mi amigunan, pasobra e man di Dios a dal mi.

19:22 Pakiko boso ta pèrsiguími manera Dios ta hasi, i no ta keda satisfecho ku mi karni?

19:23 "Mara mi palabranan por a wòrdu skirbí! Mara nan por a wòrdu skirbí den un buki!

19:24 Ku nan por a wòrdu grabá ku pèn di heru i chumbu den baranka pa semper!

19:25 Pasobra mi sa ku mi Redentor ta biba, i ku na final E lo para riba tera.

19:26 I despues ku mi kueru keda destruí, mi sa esaki, ku den mi karni lo mi mira Dios,

19:27 Kende ami mes lo mira, i mi mes wowo lo mira i ningun otro hende. Mi kurason ta anhelá den mi.

19:28 "Si boso bisa: 'Kon nos lo pèrsiguié?' I 'Ki preteksto pa un kaso nos por haña kontra djé?'

19:29 Anto boso mes tene miedu di e spada, pasobra furia ta trese e kastigu di spada, pa boso por sa ku tin huisio."

Job 20

20:1 E ora ei Zofar e naamatita a kontestá:

20:2 "Pesei mi pensamentunan preokupá ta hasimi kontestá, pa motibu di e inkietut ku tin den mi.

20:3 Mi a skucha e reprendementu ku ta insultámi, i e spiritu di mi komprendementu ta hasimi kontestá.

20:4 "Bo no sa esaki for di promé aya, desde ku hende a wòrdu poní riba mundu,

20:5 ku e triunfo di e malbado ta kòrtiku, i e alegria di e hende sin Dios ta pa un momento so?

20:6 Maske su orguyo yega te den e shelunan, i su kabes ta mishi ku e nubianan,

20:7 e ta peresé pa semper meskos ku su sushi; esnan ku a mir'é lo puntra: 'Unda e ta?'

20:8 E ta bula bai manera un soño, i nan no por hañ'é; manera un vishon di anochi nan ta kore kuné.

20:9 E wowo ku tabata mir'é no ta mir'é mas, i su lugá no ta mir'é mas.

20:10 Su yunan ta buska fabor serka e pobernan, i su mannan ta debolbé su rikesa.

20:11 Su wesunan ta yen di e vigor di su hubentut, ma e ta keda huntu kuné, drumí abou den stòf.

20:12 "Maske maldat ta dushi den su boka, i e ta skond'é bou di su lenga,

20:13 maske e ta ward'é i no kier lagu'é bai, ma ta ten'é den su boka,

20:14 tòg e kuminda den su stoma ta kambia bira veneno di kobra den djé.

20:15 E ta guli rikesanan, ma lo saka nan bèk; Dios lo saka nan for di su barika.

20:16 E ta chupa veneno di kobra; lenga di víbora ta mat'é.

20:17 E no ta mira e koridanan di awa, e riunan di miel i manteka di lechi.

20:18 E ta debolbé loke el a traha duru p'é, i no por gulié; pa loke ta e rikesanan di su negoshi, e no por ni gosa di nan.

20:19 Pasobra el a oprimí i a bandoná e pobernan; ku violensia el a tuma un kas ku e no a traha.

20:20 "Pasobra e no tabatin trankilidat den su kurason, e no ta keda ku nada di loke e ta deseá.

20:21 No ta keda nada pa e devorá; pesei su prosperidat no ta dura.

20:22 Den tur su abundansia e lo pasa nesesidat; man di tur esnan ku ta sufri lo bin kontra djé.

20:23 Ora ku e yena su barika, Dios lo manda Su rabia furioso riba djé, i lo laga esei yobe riba djé mientras ku e ta kome.

20:24 E por hui pa e arma di heru, ma e bog di bròns lo traspas'é.

20:25 E ta sak'é for di su lomba, e punta ku ta lombra e ta saka for di su nir. Teror ta poderá di djé,

20:26 skuridat kompleto ta wòrdu reservá pa su tesoronan, i kandela ku hende no a waya lo destruié; esei lo kaba ku e sobrebibiente den su tènt.

20:27 E shelunan lo revelá su inikidat, i tera lo lanta kontra djé.

20:28 Loke el a akumulá den su kas lo bai lagu'é; su biennan lo kaba na nada den e dia di Su rabia.

20:29 Esaki ta e porshon di Dios pa e hòmber malbado, e erensia ku Dios a apuntá p'é."