Tito 1

BSNP Edita

Tito 1

1:1 Pablo, un sirbidó di Dios i apòstel di Jesu-Cristo, konforme e fe di e skohínan di Dios i e konosementu di e bèrdat ku ta segun santidat,

1:2 den e speransa di bida etèrno, ku Dios, Kende no por gaña, a primintí hopi siglonan pasá,

1:3 ma na Su debido tempu a manifestá Su palabra, den e proklamashon ku a wòrdu konfiá na mi segun e mandamentu di Dios nos Salbador;

1:4 Na Tito, mi yu bèrdadero den nos fe komun: Grasia i pas di Dios Tata i di Cristo Jesus nos Salbador.

1:5 Pa e motibu aki mi a lagabo na Kreta, pa bo regla loke ta falta, i nombra ansianonan na tur stat, manera mi a ordenábo.

1:6 Un ansiano mester ta un hòmber ku ta sin reproche, ku ta esposo di ún esposa, ku tin yu ku ta kere, ku no ta wòrdu akusá di libertinahe òf rebeldia.

1:7 Pasobra e ansiano mester ta sin reproche komo mayordomo di Dios, no kabesura, no lihé pa rabia, no bisiá na biña, no violento, no golos pa plaka,

1:8 sino un hende ku ta praktiká hospitalidat, ku ta stima loke ta bon, ku ta sobrio, hustu, santu, disipliná,

1:9 ku ta tene firme na e palabra fiel ku ta segun e siñansa, pa e por eksortá ku doktrina sano i refutá esnan ku ta kontradisí.

1:10 Pasobra tin hopi hende rebelde, hende ku ta papia pa papia, i gañadónan, spesialmente esnan di e sirkumsishon,

1:11 kendenan mester wòrdu silensiá, pasobra nan ta trastorná famianan kompleto, siñando hende kosnan ku nan no mag siña nan, djis pa nan haña ganashi desonesto.

1:12 Un di nan, kende ta un profeta di nan mes, a bisa: "Kretensenan semper ta gañadó, mal bestia, golosnan floho."

1:13 E testimonio aki ta bèrdat. Pesei, reprendé nan severamente pa nan por ta sano den fe,

1:14 sin paga atenshon na fábulanan hudiu i mandamentunan di hendenan ku ta desviá for di e bèrdat.

1:15 Pa esnan ku ta puru, tur kos ta puru; ma pa esnan ku ta kontaminá i ku ta inkrédulo, nada no ta puru, ma tantu nan mente komo nan konsenshi ta kontaminá.

1:16 Nan ta profesá ku nan konosé Dios, ma ku nan echonan nan ta nengu'E, pasobra nan ta abominabel i desobedesido, i nan no ta sirbi pa nada bon.

2 Timoteo 4 Tito 2