Salmonan 69

BSNP Edita

Salmonan 69

69:1 Salbami, O Dios, pasobra e awanan a yega te na mi alma.

69:2 Mi a senk den lodo hundu, kaminda no tin lugá pa para; mi a kai den awanan hundu, i un diluvio ta pasa ofer di mi.

69:3 Mi ta kansá di sklama; mi garganta a keda tur seku; mi wowonan ta faya mientras ku mi ta spera riba mi Dios.

69:4 Esnan ku ta odiami sin motibu ta mas ku e kabeinan riba mi kabes; esnan ku kier a destruími ta poderoso; loke mi no a hòrta, mi mester debolbé tòg.

69:5 O Dios, Abo ta Esun ku sa di mi lokura, i mi erornan no ta skondí pa Bo.

69:6 O Señor DIOS di ehérsitonan, no laga esnan ku ta spera riba Bo keda brongosá pa mi motibu; O Dios di Israel, no laga esnan ku ta buskaBo keda konfundí pa mi motibu.

69:7 Pasobra pa Bo motibu mi a sufri reproche; bèrguensa a tapa mi kara.

69:8 Mi a bira un stranhero pa mi ruman hòmbernan, i un deskonosí pa e yunan di mi mama.

69:9 Pasobra zelo pa Bo kas a kaba ku mi, i e reprochenan di esnan ku ta reprocháBo a kai riba mi.

69:10 Ora mi a yora i a umiyá mi alma ku yunamentu, esei a bira mi reproche.

69:11 Ora mi a tapa mi kurpa ku paña-di-saku, mi a bira un proverbio pa nan.

69:12 Esnan ku ta sinta den porta di stat ta papia riba mi, i mi ta e kantika di burachénan.

69:13 Ma pa loke t'ami, mi orashon ta na Bo, O SEÑOR, na un tempu aseptabel; O Dios, den e grandesa di Bo miserikòrdia, kontestámi den e bèrdat di Bo salbashon.

69:14 Librami for di lodo, i no lagami senk; lagami wòrdu librá for di mi enemigunan, i for di awanan hundu.

69:15 No laga diluvio di awa pasa ofer di mi, ni abismo tragami; i no laga e pos sera su boka riba mi.

69:16 Kontestámi, O SEÑOR, pasobra Bo miserikòrdia ta bon; bira wak mi, konforme e grandesa di Bo kompashon,

69:17 i no skonde Bo kara pa Bo sirbidó, pasobra mi ta den angustia; kontestámi lihé.

69:18 Hala serka mi i redimími; librami pa motibu di mi enemigunan!

69:19 Bo konosé mi reproche, mi bèrguensa i mi desonor; tur mi atversarionan ta Bo dilanti.

69:20 Reproche a kibra mi kurason, i mi ta sintimi malu. I mi tabata spera pa kompashon, ma no tabatin, i pa konsoladónan, ma mi no a haña ningun.

69:21 Tambe nan a dunami hal pa kuminda, i pa mi set nan a dunami binager.

69:22 Laga nan mesa bira un laso nan dilanti; i loke tabata pa nan bon, laga esei bira un trampa.

69:23 Laga nan wowo bira skur, pa nan no mira, i hasi nan hep tembla kontinuamente.

69:24 Basha bo indignashon riba nan, i laga Bo rabia ardiente poderá di nan.

69:25 Laga nan kampamentu keda desolá; no laga ningun hende biba den nan tèntnan.

69:26 Pasobra nan a pèrsiguí esun ku Bo mes a afligí, nan ta konta di e doló di esnan ku Bo a heridá.

69:27 Pone inikidat riba nan inikidat, i no laga nan drenta den Bo hustisia.

69:28 Laga nan wòrdu kitá for di e buki di bida, i no laga nan wòrdu inskribí huntu ku e hustunan.

69:29 Ma ami ta afligí i yen di doló; laga Bo salbashon, O Dios, protehámi.

69:30 Lo mi alabá e nòmber di Dios ku kantika, i lo mi engrandes'E ku gradisimentu.

69:31 I esaki lo agradá SEÑOR mas ku un buey òf un bishé machu ku tin kachu i huf.

69:32 E umildenan lo mira esaki i keda kontentu; boso ku ta buska Dios, boso kurason lo biba.

69:33 Pasobra SEÑOR ta tende esnan den nesesidat, i no ta despresiá esnan di djE ku ta prezo.

69:34 Laga shelu i tera alab'E, lamannan i tur loke ta move den nan.

69:35 Pasobra Dios lo salba Sion i konstruí e statnan di Juda, asina ku nan por biba ayanan i bira doño di djé.

69:36 E desendientenan di Su sirbidónan lo ered'é, i esnan ku ta stima Su nòmber lo biba den djé.

Salmonan 68 Salmonan 70