Salmonan 50

BSNP Edita

Salmonan 50

50:1 Esun Poderoso, Dios e SEÑOR, a papia, i a konvoká mundu for di ora solo ta sali te ora ku e ta drenta.

50:2 For di Sion, e perfekshon di bunitesa, Dios a resplandesé.

50:3 Nos Dios ta bin i E lo no keda ketu; kandela ta devorá dilanti di djE, i rònt di djE tin tempestat pisá.

50:4 E ta konvoká e shelunan ariba, i tera, pa E huzga Su pueblo:

50:5 "Reuní Mi santunan serka Mi, esnan ku a sera un aliansa ku Mi pa medio di sakrifisio."

50:6 I e shelunan ta deklará Su hustisia, pasobra Dios mes ta Hues.

50:7 "Tende, O Mi pueblo, i lo Mi papia; O Israel, i lo Mi testifiká kontra bo; Mi ta Dios, bo Dios.

50:8 Mi no ta reprendébo pa bo sakrifisionan, ni pa bo ofrendanan kimá, kualnan ta kontinuamente Mi dilanti.

50:9 Lo Mi no tuma ni un bishé machu for di bo kas, ni ningun kabritu chubatu for di bo krianan di bestia.

50:10 Pasobra tur bestia di mondi ta di Mi, e bakanan riba mil seru.

50:11 Mi konosé tur parha di e serunan; i tur loke ta move den kunuku ta di Mi.

50:12 Si Mi tabatin hamber, lo Mi no a bisabo; pasobra mundu ta di Mi, i tur loke ku e ta kontené.

50:13 Mi mester kome karni di bishé machu, òf bebe sanger di kabritu chubatu?

50:14 Ofresé na Dios un sakrifisio di gradisimentu, i paga bo promesanan na e Haltísimo;

50:15 i sklama na Mi den e dia di angustia; lo Mi reskatábo, i abo lo glorifikáMi."

50:16 Ma na e malbado Dios ta bisa: "Ki derecho bo tin pa deklará Mi statutonan, i pa tuma Mi aliansa den bo boka?

50:17 Pasobra bo ta odia disiplina, i bo ta tira Mi palabranan tras di bo lomba.

50:18 Ora bo mira un ladron, bo ta konsentí kuné, i bo ta asosiá ku adúlteronan.

50:19 Bo ta pèrmití bo boka mete ku maldat, i bo lenga ta komponé engaño.

50:20 Bo ta sinta papia kontra bo ruman; bo ta kalumniá yu di bo mes mama.

50:21 E kosnan aki bo a hasi, i Mi a keda ketu; bo a kere ku Ami ta meskos ku bo; lo Mi reprendébo i konfrontábo ku nan.

50:22 "Awor konsiderá esaki, boso ku ta lubidá Dios, pa Mi no sker boso na pida-pida, sin ku tin un hende pa libra boso.

50:23 Esun ku ofresé sakrifisio di gradisimentu ta onraMi; i na esun ku ordená su kaminda korektamente lo Mi mustra e salbashon di Dios."bin serka djé, despues ku e tabatin relashon ku Bètsabé.

Salmonan 49 Salmonan 51