Marko 3

BSNP Edita

Marko 3

3:1 I El a bolbe bai den snoa; i ayanan tabatin un hòmber ku un man seku.

3:2 I nan tabata ten'E na bista pa mira si E lo a kur'é riba Sabat, pa nan por akus'E.

3:3 I El a bisa e hòmber ku e man seku: "Lanta i bin para meimei aki!"

3:4 I El a bisa nan: "Lei ta pèrmití pa riba dia di Sabat hasi bon òf hasi malu, salba un bida òf mata?" Ma nan a keda ketu.

3:5 I despues di a wak nan tur ku kara rabiá, tristu pa motibu di e duresa di nan kurason, El a bisa e hòmber: "Rèk bo man." I el a rèk su man, i esaki a bira bon atrobe.

3:6 I e fariseonan a sali bai, i mesora nan a konsultá ku e herodianonan kontra djE, kon nan lo por destruiE.

3:7 I Jesus a retirá ku Su disipelnan bai laman; i un multitut grandi for di Galilea a siguiE; i tambe for di Judea,

3:8 i for di Jerusalèm, i for di Idumea, i di e otro banda di Jordan i e besindario di Tiro i Sidon, un multitut grandi a bin serka djE, ora nan a tende kuantu kos E tabata hasi.

3:9 I El a bisa Su disipelnan ku mester tin un boto poní kla p'E pa motibu di e multitut, pa e hendenan no pusha pret'E;

3:10 pasobra El a kura hopi hende, asina ku tur esnan ku tabatin aflikshon tabata pusha bin riba djE pa nan por a mishi kunE.

3:11 I ki ora ku e spiritunan impuru mir'E, nan tabata tira nan mes abou Su dilanti i tabata grita, bisando: "Abo ta e Yu di Dios!"

3:12 I El a taha nan striktamente pa no bisa ken E ta.

3:13 I El a subi bai riba seru i a yama esnan ku E mes tabata kier, i nan a bin serka djE.

3:14 I El a nombra diesdos, pa nan por ta huntu kunE i pa E por manda nan bai prediká,

3:15 i pa tin outoridat pa saka demoño.

3:16 I El a nombra e diesdosnan: Simon, na kende El a duna e nòmber Pedro,

3:17 i Santiago, yu hòmber di Zebedeo, i Juan, ruman hòmber di Santiago, na kendenan El a duna e nòmber Boanerges, ku ta nifiká: "Yunan di Strena";

3:18 i Andres, Felipe, Bartolomé, Mateo, Tomas, Santiago, yu hòmber di Alfeo, Tadeo, i Simon e kananeo;

3:19 i Judas Iskariot, kende a traishon'E tambe.

3:20 I El a bai den un kas, i atrobe e multitut a aglomerá, di tal manera ku ni pida pan nan no por a kome.

3:21 I ora Su mes hendenan a tende di esaki, nan a sali pa busk'E i koh'E bai kunE, pasobra nan tabata bisa: "Su kabes no ta bon!"

3:22 I e eskribanan ku a bin for di Jerusalèm tabata bisa: "E ta poseí pa Beëlzebú," i "E ta saka demoño pa medio di e prens di demoñonan."

3:23 I El a yama nan serka djE i a kuminsá papia ku nan den parábola: "Kon Satanás por saka Satanás afó?

3:24 I si un reino ta dividí kontra su mes, e reino ei no por keda para.

3:25 I si un kas ta dividí kontra su mes, e kas ei lo no por keda para.

3:26 I si Satanás lanta kontra su mes i ta dividí, e no por keda para, ma el a yega na su fin!

3:27 Ma ni un hende no por drenta kas di e hòmber fuerte i plùnder su propiedat, si e no mara e hòmber fuerte promé, i e ora ei e lo plùnder su kas.

3:28 Di bèrdat Mi ta bisa boso, tur piká lo wòrdu pordoná na e yunan di hende, i kualke blasfemia ku nan papia;

3:29 ma ken ku blasfemá kontra Spiritu Santu nunka lo no haña pordon, ma ta kulpabel di un piká etèrno";

3:30 pasobra nan tabata bisa: "E tin un spiritu impuru."

3:31 I Su mama i Su ruman hòmbernan a yega, i pará pafó nan a manda yam'E.

3:32 I un multitut tabata sintá rònt di djE, i nan a bis'E: "Ata Bo mama i Bo ruman hòmbernan ta pafó ta buskaBo."

3:33 I El a kontestá nan, bisando: "Ta ken ta Mi mama i Mi ruman hòmbernan?"

3:34 I El a wak rònt, i a laga Su bista pasa riba esnan ku tabata sintá rònt di djE, i a bisa: "Ata Mi mama i Mi ruman hòmbernan!

3:35 Pasobra ken ku hasi e boluntat di Dios, esei ta Mi ruman hòmber i ruman muhé i mama."

Marko 2 Marko 4