Lukas 21

BSNP Edita

Lukas 21

21:1 I El a hisa kara i a mira e rikunan ta tira nan ofrendanan den e kaha di ofrenda.

21:2 I El a mira un biuda pober ta tira dos plaka di koper aden.

21:3 I El a bisa: "Di bèrdat Mi ta bisa boso, e biuda pober aki a tira mas tantu aden ku nan tur;

21:4 pasobra nan tur a tira pa e ofrenda for di nan abundansia, ma el a tir'aden for di su pobresa tur loke ku e tabatin pa biba di djé."

21:5 I ora ku algun hende tabata papia di e tèmpel, ku e tabata dòrná ku bunita piedra i regalo sagrado, El a bisa:

21:6 "Pa loke ta e kosnan aki ku boso ta wak, e dianan lo bin den kual ni un piedra lo no keda riba otro ku lo no wòrdu bashá abou."

21:7 I nan a hasiE pregunta, bisando: "Maestro, ki tempu anto e kosnan aki lo sosodé? I kiko lo ta e señal ora ku e kosnan aki ta bai tuma lugá?"

21:8 I El a bisa: "Mira pa boso no wòrdu gañá, pasobra hopi lo bin den Mi nòmber, bisando: 'Ta ami t'E,' i: 'E tempu ta serka'; no bai nan tras.

21:9 I ora boso tende di gueranan i revolushonnan, no spanta; pasobra e kosnan aki mester tuma lugá promé, ma e fin no ta sigui mesora."

21:10 E ora ei El a sigui bisa nan: "Nashon lo lanta kontra nashon, i reino kontra reino,

21:11 i lo tin temblornan grandi, i pestilensia i hamber na varios lugá; i lo tin terornan i señalnan grandi for di shelu.

21:12 "Ma promé ku tur e kosnan aki nan lo tira man riba boso i lo pèrsiguí boso, i entregá boso na e snoanan i prizonnan, i lo hiba boso dilanti di reinan i gobernadónan pa kousa di Mi nòmber.

21:13 Esaki lo ta un oportunidat pa boso duna testimonio.

21:14 Proponé anto den boso kurason pa no prepará padilanti kon boso lo defendé boso mes,

21:15 pasobra lo Mi duna boso boka i sabiduria ku ningun di boso oponentenan lo no por resistí ni refutá.

21:16 Ma boso lo wòrdu entregá asta dor di boso mayornan i rumannan i famianan i amigunan, i nan lo mata algun di boso,

21:17 i tur hende lo odia boso pa kousa di Mi nòmber.

21:18 Ma ni un drachi di kabei riba boso kabes lo no bai pèrdí.

21:19 Dor di boso pèrseveransia boso lo gana boso alma.

21:20 "Ma ora boso mira Jerusalèm rondoná dor di ehérsitonan, rekonosé anto ku su desolashon ta serka.

21:21 E ora ei laga esnan ku ta na Judea hui bai na e serunan, i laga esnan ku ta meimei di e stat sali bai, i no laga esnan ku ta den kunuku bai den stat;

21:22 pasobra esakinan ta dianan di vengansa, pa tur kos ku ta pará skirbí keda kumplí.

21:23 Ai di esnan ku ta na estado i esnan ku ta kria yu na pechu den e dianan ei; pasobra lo tin gran kalamidat den e tera, i furia riba e pueblo aki,

21:24 i nan lo kai pa medio di filo di spada, i lo wòrdu hibá komo prezo na tur e nashonnan; i Jerusalèm lo wòrdu trapá dor di e paganonan te ora ku e tempunan di e paganonan keda kumplí.

21:25 "I lo tin señalnan den solo i luna i streanan, i riba tera angustia entre e nashonnan, i desesperashon pa motibu di e ronkamentu di laman i olanan;

21:26 hendenan ta desmayá di miedu i den e ekspektativa di e kosnan ku ta bin riba mundu, pasobra e podernan di e shelunan lo wòrdu sakudí.

21:27 I e ora ei nan lo mira e Yu di Hende ta bin den un nubia ku poder i gran gloria.

21:28 Ma ora ku e kosnan aki kuminsá tuma lugá, wak ariba i lanta boso kabes, pasobra boso redenshon ta yegando serka."

21:29 I El a konta nan un parábola: "Wak e palu di figo i tur e palunan;

21:30 asina ku nan ta saka blachi, boso ta mira esei i lo sa pa boso mes ku awor zomer ta serka.

21:31 Asina boso tambe, ora boso mira e kosnan aki ta sosodé, sabi ku e reino di Dios ta serka.

21:32 "Di bèrdat Mi ta bisa boso, e generashon aki lo no pasa promé ku tur kos tuma lugá.

21:33 Shelu i tera lo pasa, ma Mi palabranan lo no pasa.

21:34 "Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin direpiente riba boso manera un trampa;

21:35 pasobra e lo bin riba tur esnan ku ta biba riba superfisio di henter mundu.

21:36 Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá, i pa para dilanti di e Yu di Hende."

21:37 Awor den dia E tabata siña hende den tèmpel, ma anochi E tabata sali i pasa nochi riba e seru ku yama Seru di Oleifi.

21:38 I henter e pueblo tabata lanta mainta tempran pa bin serka djE den tèmpel pa tend'E.

Lukas 20 Lukas 22