Eksodo 39

BSNP Edita

Eksodo 39

39:1 Ademas, di e hilu blou, púrpura i skarlata nan a traha paña fini gewef pa sirbi den e lugá santu, i a traha e pañanan santu pa Aaron, meskos ku SEÑOR a ordená Moisés.

39:2 I el a traha e efòd di oro, i di hilu blou, púrpura i skarlata, i lino fini trosí.

39:3 E ora ei ku martiu nan a bati plachinan di oro i a kòrta nan na drachi-drachi, pa wef nan huntu ku e hilu blou, púrpura i skarlata, i e lino fini, e obra di un trahadó eksperto.

39:4 Nan a traha strèp-di-skouder pa e efòd; e tabata pegá na su dos puntanan ariba.

39:5 I e banchi masha fini gewef ku tabata na djé tabata di e mesun kalidat di obra, di e mesun material: di oro, di hilu blou, púrpura i skarlata, i lino fini trosí, meskos ku SEÑOR a ordená Moisés.

39:6 I nan a traha e piedranan di òneks, pegá den montura di oro filigrana; nan tabata grabá manera ta graba un seyo, segun e nòmbernan di e yunan di Israel.

39:7 I el a pone nan riba e strèpnan-di-skouder di e efòd, komo piedra di konmemorashon pa e yunan di Israel, meskos ku SEÑOR a ordená Moisés.

39:8 I el a traha e pechero, e obra di un trahadó eksperto, manera e obra di e efòd: di oro, di hilu blou, púrpura i skarlata, i lino fini trosí.

39:9 E tabata firkant; nan a traha e pechero dòbel, un span largu i un span hanchu, ora ku e ta doblá na dos.

39:10 I nan a pega kuater kareda di piedra na djé. E promé kareda tabata un kareda di rubí, topasio i esmeralda;

39:11 i e di dos kareda: un turkesa, un safiro i un djamanta;

39:12 i e di tres kareda: un yasinto, un ágata i un amatista;

39:13 i e di kuater kareda: un berilo, un òneks i un yaspe. Nan a wòrdu pegá den montura di oro filigrana.

39:14 I e piedranan tabata konforme e nòmbernan di e yunan di Israel; nan tabata diesdos, konforme nan nòmbernan, grabá manera ta graba seyo, kada un ku su nòmber pa e diesdos tribunan.

39:15 I riba e pechero nan a traha kadenanan manera kordon di obra di kordon trosí, di oro puru.

39:16 I nan a traha dos montura di oro filigrana i dos renchi di oro i a pone e dos renchinan na e dos puntanan di e pechero.

39:17 E ora ei nan a pasa e dos kordonnan di oro den e dos renchinan na e puntanan di e pechero.

39:18 I nan a pega e dos otro puntanan di e dos kordonnan na e dos monturanan di filigrana i a pone nan riba e strèpnan-di-skouder di e efòd, na su parti dilanti.

39:19 I nan a traha dos renchi di oro i a pone nan na e dos puntanan di e pechero, na su rant parti paden di e efòd.

39:20 Tambe nan a traha dos renchi di oro i a pone nan na e parti abou di e dos strèpnan-di-skouder di e efòd, na su parti dilanti, serka di e lugá kaminda e ta pegá na otro, riba e banchi gewef di e efòd.

H6213a -- Tambe nan a traha -> Furthermore, they made
H2091 -- dos renchi di oro -> gold
H8147 -- dos -> two
H2885 -- i -> rings
H5414 -- a pone -> and placed
H4295 -- nan na e parti abou -> them on the bottom
H8147 -- di e dos -> of the two
H3802 -- strèpnan-di-skouder -> shoulder
H646 -- di e efòd -> pieces of the ephod
H6440 -- , na su parti dilanti -> on the front
H5980 -- , serka -> of it, close
H4225 -- di e lugá -> to the place
H4225 -- kaminda -> where
H4225 -- e ta pegá -> it joined
H4480 -- na otro, riba -> above
H2805 -- e banchi gewef -> the woven
H2805 -- di -> band
H646 -- e efòd -> of the ephod

39:21 I ku un kordon blou nan a mara e pechero ku su renchinan na e renchinan di e efòd, pa e keda na e banchi gewef di e efòd, i pa e pechero no lòs for di e efòd, meskos ku SEÑOR a ordená Moisés.

39:22 I el a traha e mantel di e efòd di obra gewef, tur blou;

39:23 i e habrí di e mantel tabata na e parti ariba meimei, manera e habrí di un bistí di guera, ku un rant gewef tur rònt di e habrí, pa e no tòrnu.

39:24 I nan a traha granatapel di hilu blou, púrpura i skarlata i lino fini trosí na zòm di e mantel.

39:25 Tambe nan a traha bèlnan di oro puru i a pone e bèlnan entre e granatapelnan tur rònt na zòm di e mantel:

39:26 un bèl i un granatapel, un bèl i un granatapel, tur rònt na zòm di e mantel, pa sirbi aden, meskos ku SEÑOR a ordená Moisés.

39:27 I nan a traha e túnikanan di lino fini gewef pa Aaron ku su yu hòmbernan,

39:28 i e tùlban di lino fini, e adornonan di e pañanan di lino fini pa mara kabes, i e karsonnan kòrtiku di lino fini trosí,

39:29 i e faha di lino fini trosí i hilu blou, púrpura i skarlata, obra di e wefdó-di-tela, meskos ku SEÑOR a ordená Moisés.

39:30 I nan a traha e plachi di e korona santu di oro puru, i a skirbi riba djé un grabashon manera ta graba seyo: "Santu pa SEÑOR."

39:31 I nan a pega un kordon blou na djé pa pegu'é na e parti ariba di e tùlban, meskos ku SEÑOR a ordená Moisés.

39:32 Asina henter e obra di e tabernakel di e tènt di reunion a keda kompletá; i e yunan di Israel a hasi konforme tur loke SEÑOR a ordená Moisés; asina nan a hasié.

39:33 I nan a hiba e tabernakel pa Moisés, e tènt ku tur su artíkulonan-di-uzo: su haknan, su tablanan, su baranan, su pilarnan i su pianan;

39:34 e kapa di kueru di karné chubatu tiñá kòrá, e kapa di kueru di dòlfein i e velo di e skèrm;

39:35 e arka di testimonio ku su baranan i e propisiatorio;

39:36 e mesa, tur su artíkulonan-di-uzo i e pan di e Presensia;

39:37 e kandelá di oro puru ku su lampinan poní na òrdu, ku tur su artíkulonan-di-uzo i e zeta pa e lus;

39:38 i e altar di oro, e zeta di unshon i e sensia aromátiko, i e kortina pa entrada di e tènt;

39:39 e altar di bròns ku su roster di bròns, su baranan i tur su artíkulonan-di-uzo, e labamano ku su pia;

39:40 e kortinanan pa e plenchi, su pilarnan ku su pianan, i e skèrm pa entrada di e plenchi, su kordonnan, su stakanan i tur e artíkulonan-di-uzo pa e sirbishi di e tabernakel, pa e tènt di reunion;

39:41 e pañanan gewef pa sirbi den e lugá santu i e pañanan santu pa saserdote Aaron i e pañanan di su yu hòmbernan, pa sirbi komo saserdote.

39:42 Asina e yunan di Israel a hasi tur e trabou konforme tur loke SEÑOR a ordená Moisés.

39:43 I Moisés a inspektá tur e trabou, i mira, nan a hasié; meskos ku SEÑOR a ordená, asina nan a hasié. I Moisés a bendishoná nan.

Eksodo 38 Eksodo 40