2 Korintionan 9

BSNP Edita

2 Korintionan 9

9:1 Pasobra ta inesesario pa mi skirbi boso tokante di e ministerio aki pa e santunan;

9:2 pasobra mi sa ku boso ta di bon boluntat, pa kual motibu mi ta gaba boso serka e masedonionan, esta, ku Akaya tabata prepará for di aña pasá, i boso zelo a animá mayoria di nan.

9:3 Ma mi a manda e rumannan, pa nos gabamentu di boso den e kaso aki no ta en bano, pa, manera mi tabata bisa, boso por ta prepará,

9:4 pa no sosodé ku si algun masedonio bin ku mi i no haña boso prepará, nos--pa mi no bisa: boso tambe--wòrdu brongosá pa e konfiansa aki.

9:5 Pesei mi a haña nesesario pa enkurashá e rumannan pa bai serka boso promé ku ami bai i prepará di antemano boso ofrenda generoso ku boso a primintí, pa esaki por ta prepará komo un ofrenda generoso, i no duná ku avarisia.

9:6 Awor esaki mi ta bisa; esun ku sembra skars lo kosechá skars tambe; i esun ku sembra generosamente lo kosechá generosamente tambe.

9:7 Laga kada un hasi manera el a proponé den su kurason; no kontra su gustu òf obligá; pasobra Dios ta stima esun ku ta duna ku alegria.

9:8 I Dios ta poderoso pa hasi tur grasia abundá pa boso, asina ku teniendo semper sufisiente di tur kos, boso por tin abundansia pa tur bon obra;

9:9 manera ta pará skirbí: "Tur kaminda el a parti, el a duna e pobernan, Su hustisia ta permanesé pa semper."

9:10 Awor Esun ku ta proveé simia pa e sembradó i pan pa kuminda lo proveé i multipliká boso simia pa sembra, i lo oumentá e kosecha di boso hustisia;

9:11 boso lo wòrdu enrikesí den tur kos pa ta generoso na tur okashon, lokual pa medio di nos ta produsiendo gradisimentu na Dios.

9:12 Pasobra e ministerio di e sirbishi aki no solamente ta proveé kompletamente pa e nesesidatnan di e santunan, ma ta abundá tambe dor di hopi gradisimentu na Dios.

9:13 Pa motibu di e prueba duná dor di e ministerio aki nan lo glorifiká Dios pa e obedensia di boso konfeshon di e evangelio di Cristo, i pa e generosidat di boso kontribushon na nan i na tur,

9:14 mientras ku, den nan orashon pa boso, nan kurason ta anhelá na boso pa motibu di e grasia sobreabundante di Dios den boso.

9:15 Grasia sea na Dios pa Su don ineksplikabel!

2 Korintionan 8 2 Korintionan 10