2 Korintionan 6

BSNP Edita

2 Korintionan 6

6:1 I trahando huntu kunE nos tambe ta roga boso pa no risibí e grasia di Dios en bano--

6:2 pasobra E ta bisa: "Den e tempu aseptabel Mi a skuchabo, i riba e dia di salbashon Mi a yudabo"; mira, awor ta "e tempu aseptabel," mira, awor ta "e dia di salbashon."

6:3 Nos no ta duna motibu di ofensa den nada, pa e ministerio no wòrdu desakreditá,

6:4 ma den tur kos nos ta rekomendá nos mes komo sirbidónan di Dios, den hopi pèrseveransia, den aflikshon, den fatiga, den angustia,

6:5 den sota, den prizon, den lantamentunan di pueblo, den trabou duru, den pèrdèmentu di soño, den hamber,

6:6 den puresa, den konosementu, den pasenshi, den kariño, den Spiritu Santu, den amor bèrdadero,

6:7 den e palabra di bèrdat, den e poder di Dios; pa medio di e armanan di hustisia pa e man drechi i pa e man robes,

6:8 pa medio di gloria i desonor, pa medio di mal fama i bon fama; komo gañadónan i tòg bèrdadero;

6:9 komo deskonosí i tòg bon konosí, komo muriendo i tòg, ata nos ta biba; komo kastigá i tòg nos no a wòrdu matá,

6:10 komo tristu i tòg semper regosihando, komo pober i tòg hasiendo hopi hende bira riku, komo teniendo nada i tòg teniendo tur kos.

6:11 Nos boka a papia frankamente ku boso, O korintionan, nos kurason ta hanchu habrí.

6:12 Boso no ta wòrdu limitá dor di nos, ma boso ta wòrdu limitá dor di boso mes sintimentunan.

6:13 Awor di e mesun manera--mi ta papia manera ku mucha--habri boso kurason hanchu pa nos tambe.

6:14 No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat?

6:15 Of ki harmonia Cristo tin ku Belial, òf kiko un kreyente tin komun ku un inkrédulo?

6:16 Of ki kombenio e tèmpel di Dios tin ku ídolo? Pasobra nos ta e tèmpel di e Dios bibu, manera Dios a bisa: "Lo mi biba den nan i kana meimei di nan; I lo Mi ta nan Dios, i nan lo ta Mi pueblo."

6:17 "Pesei, sali for di meimei di nan i separá boso mes, SEÑOR ta bisa. I no mishi ku loke ta impuru; i lo Mi risibí boso."

6:18 "I lo Mi ta un Tata pa boso, i boso lo ta yu hòmbernan i yu muhénan pa Mi, e SEÑOR Todopoderoso ta bisa."

2 Korintionan 5 2 Korintionan 7