2 Korintionan 2

BSNP Edita

2 Korintionan 2

2:1 Ma mi a determiná esaki pa mi mes bon, ku lo mi no bin serka boso den tristesa atrobe.

2:2 Pasobra si mi hasi boso tristu, ken anto lo hasimi kontentu sino esun ku mi a hasi tristu?

2:3 I esaki ta presisamente loke mi a skirbi boso, pa ora mi yega mi no haña tristesa for di esnan ku mester a hasimi regosihá, teniendo konfiansa den boso tur, ku mi goso lo tabata e goso di boso tur.

2:4 Pasobra for di den hopi aflikshon i angustia di kurason mi a skirbi boso ku hopi lágrima; no pa hasi boso bira tristu, ma pa boso por sa di e amor ku mi tin spesialmente pa boso.

2:5 Ma si un hende a kousa tristesa, e no a kousa tristesa na ami, ma den sierto sentido--pa mi no eksagerá--na boso tur.

2:6 Pa un hende asina e kastigu aki ku el a haña di e mayoria ta sufisiente,

2:7 asina ku, alkontrario, mas bien boso mester pordon'é i konsol'é, pa di un òf otro manera un hende asina no keda desesperá dor di demasiado tristesa.

2:8 Pesei mi ta roga boso pa konfirmá boso amor p'é.

2:9 Pasobra ta ku e propósito aki tambe mi a skirbi pa mi por pone boso na prueba, pa mira si boso ta obedesido den tur kos.

2:10 Ma ken ku boso pordoná algu, mi tambe ta pordoná; pasobra di bèrdat loke mi a pordoná, si mi a pordoná algu, mi a hasié pa boso motibu den e presensia di Cristo,

2:11 pa Satanás no tuma bentaha riba nos; pasobra su trikinan no ta deskonosí pa nos.

2:12 Awor ora mi a yega Troas pa e evangelio di Cristo, i ora un porta a wòrdu habrí pa mi den Señor,

2:13 mi no tabatin sosiegu den mi spiritu, pasobra mi no a haña mi ruman Tito; ma despues di a despedí di nan, mi a bin Masedonia.

2:14 Ma grasia sea na Dios, Kende semper ta guia nos den Su triunfo den Cristo, i ta manifestá dor di nos e holó dushi di e konosementu di djE na tur kaminda.

2:15 Pasobra nos ta un holó dushi di Cristo pa Dios meimei di esnan ku ta wòrdu salbá i meimei di esnan ku ta peresé;

2:16 pa esun un holó di morto pa morto, pa e otro un holó di bida pa bida. I ken ta kompetente pa e kosnan aki?

2:17 Pasobra nos no ta manera asina hopi hende, kendenan ta kana hasi negoshi ku e palabra di Dios. Alkontrario, den Cristo nos ta papia dilanti di Dios ku tur sinseridat, manera hòmbernan mandá dor di Dios.

2 Korintionan 1 2 Korintionan 3