Buska den Beibel

Numbernan 18; Numbernan 19; Numbernan 20 BSNP Edita

Numbernan 18

18:1 Asina SEÑOR a bisa Aaron: "Abo, bo yu hòmbernan, i e hendenan di kas di bo tata huntu ku bo, mester karga e kulpa relashoná ku e santuario; i abo, i bo yu hòmbernan huntu ku bo, mester karga e kulpa relashoná ku boso saserdosio.

18:2 Ma trese huntu ku bo tambe bo ruman hòmbernan, e tribu di Leví, e tribu di bo tata, pa nan uni ku bo i sirbibo, mientras ku abo, i bo yu hòmbernan huntu ku bo, ta dilanti di e tènt di testimonio.

18:3 I asina nan mester atendé bo responsabilidat i e responsabilidat di henter e tènt, ma nan no mester yega serka di e artíkulonan-di-uzo di e santuario ni di e altar, pa ni nan ni boso no muri.

18:4 I nan mester ta uní ku bo i atendé ku e responsabilidatnan di e tènt di reunion, pa henter e sirbishi di e tènt; ma un stranhero no mag yega serka di boso.

18:5 "Asina boso mester atendé e responsabilidatnan di e santuario i e responsabilidatnan di e altar, pa no tin furia mas riba e yunan di Israel.

18:6 I mira, Ami mes a tuma boso rumannan, e levitanan, for di meimei di e yunan di Israel; nan ta un regalo pa boso, dediká na SEÑOR, pa hasi e sirbishi di e tènt di reunion.

18:7 Ma abo, i bo yu hòmbernan huntu ku bo, mester atendé boso saserdosio pa tur kos ku ta konserní e altar i paden di e velo, i boso lo hasi sirbishi. Mi ta duna boso e sirbishi saserdotal komo un regalo, ma e stranhero ku yega serka mester wòrdu matá."

18:8 E ora ei SEÑOR a bisa Aaron: "Awor mira, Ami mes a enkargábo ku Mi ofrendanan di halsamentu, tur e regalonan santu di e yunan di Israel; Mi a duna nan na bo komo un porshon, i na bo yu hòmbernan komo un ordenansa perpetuo.

18:9 Esaki mester ta di bo for di e kosnan di mas santu, wardá for di kandela; tur ofrenda di nan, tur ofrenda di mainshi, tur ofrenda pa piká i tur ofrenda pa kulpa ku nan dunaMi, mester ta masha santu mes pa bo i pa bo yu hòmbernan.

18:10 Komo algu ku ta masha santu mes bo mester kom'é, tur hende hòmber lo kom'é. E mester ta santu pa bo.

18:11 "Esaki tambe ta di bo, e ofrenda di nan regalo, tur e ofrendanan di zoyamentu di e yunan di Israel; Mi a duna nan na bo, i na bo yu hòmbernan i yu muhénan huntu ku bo, komo un ordenansa perpetuo. Tur hende di bo kas ku ta limpi mag kom'é.

18:12 "Tur loke ta di mihó di e zeta fresku i tur loke ta di mihó di e biña fresku i di e mainshi, e promé frutanan ku nan ta ofresé na SEÑOR, Mi ta dunabo nan.

18:13 E promé frutanan hechu di tur loke tin den nan tera, ku nan ta hiba pa SEÑOR, lo ta di bo; tur e hendenan di bo kas ku ta limpi mag kom'é.

18:14 "Tur kos dediká den Israel lo ta di bo.

18:15 Tur loke ku ta habri matris--di tur karni, sea di hende òf di bestia--ku nan ofresé na SEÑOR, lo ta di bo. Sinembargo, e primogénito di hende siguramente bo mester redimí, i e primogénito di bestia impuru bo mester redimí.

18:16 I pa loke ta nan preis di redenshon, for di un luna lo bo redimí nan, segun bo baluashon, sinku siklo di plata, segun e siklo di e santuario, ku ta binti gera.

18:17 "Ma e primogénito di baka òf e primogénito di karné òf e primogénito di kabritu bo no mag redimí; nan ta santu. Bo mester sprèngu nan sanger riba altar i lo kima nan vèt komo un ofrenda di kandela, komo un holó dushi na SEÑOR.

18:18 I nan karni mester ta di bo; e lo ta di bo, manera e pechu pa un ofrenda di zoyamentu i manera e pia banda drechi.

18:19 Tur e ofrendanan di e regalonan santu, ku e yunan di Israel ta ofresé na SEÑOR, Mi a duna abo, bo yu hòmbernan i bo yu muhénan huntu ku bo, komo un ordenansa perpetuo. Ta un aliansa etèrno di salu dilanti di SEÑOR pa bo, i bo desendientenan huntu ku bo."

18:20 E ora ei SEÑOR a bisa Aaron: "Lo bo no tin erensia den nan tera, ni poseé ningun porshon meimei di nan; Ami ta bo porshon i bo erensia meimei di e yunan di Israel.

18:21 "I pa e yu hòmbernan di Leví, mira, Mi a duna henter e diesmo den Israel komo un erensia na lugá di nan sirbishi ku nan ta hasi, e sirbishi di e tènt di reunion.

18:22 I e yunan di Israel no mester yega serka di e tènt di reunion mas, pa nan no karga piká i muri.

18:23 Solamente e levitanan mester hasi e sirbishi di e tènt di reunion, i nan mester karga nan inikidat; esaki mester ta un statuto perpetuo durante di tur boso generashonnan, i meimei di e yunan di Israel nan lo no tin erensia.

18:24 Pasobra e diesmo di e yunan di Israel, ku nan ta ofresé komo un ofrenda na SEÑOR, Mi a duna e levitanan komo erensia; pesei Mi a bisa tokante di nan: 'Nan lo no tin erensia meimei di e yunan di Israel.'"

18:25 E ora ei SEÑOR a papia ku Moisés, bisando:

18:26 "Papia ku e levitanan i bisa nan: 'Ora boso tuma for di e yunan di Israel e diesmo ku Mi a duna boso for di nan komo boso erensia, e ora ei boso mester presentá na SEÑOR un ofrenda for di esei, un diesmo di e diesmo.

18:27 I boso ofrenda lo wòrdu kontá pa boso komo e mainshi for di plenchi-di-bati-mainshi òf komo e plenitut di baki-di-pèrs-wendrùif.

18:28 Asina boso mester presentá tambe un ofrenda na SEÑOR for di boso diesmonan ku boso ta risibí di e yunan di Israel; i for di esaki boso mester duna saserdote Aaron e ofrenda di SEÑOR.

18:29 For di tur boso regalonan boso mester presentá tur ofrenda ku ta pertenesé na SEÑOR, for di tur esnan di mas mihó, e parti sagrado di nan.'

18:30 "I bisa e levitanan: 'Ora boso a ofresé e mihó di esaki, e ora ei e sobrá lo wòrdu kontá pa e levitanan komo e produkto di plenchi-di-bati-mainshi i komo e produkto di baki-di-pèrs-wendrùif.

18:31 I boso mag kom'é unda ku ta, boso i e hendenan di boso kas, pasobra e ta boso rekompensa pa boso sirbishi den e tènt di reunion.

18:32 I boso no mester karga piká pa motibu di esaki, ora boso a ofresé e mihó di djé. Ma boso no mester profaná e regalonan santu di e yunan di Israel, pa boso no muri.'"

Numbernan 19

19:1 E ora ei SEÑOR a papia ku Moisés i Aaron, bisando:

19:2 "Esaki ta e statuto di e lei ku SEÑOR a ordená, bisando: 'Papia ku e yunan di Israel pa nan trese pa bo un bishé muhé kòrá sin mancha, ku no tin defekto, i ku nunka no a karga yugo.

19:3 I duna saserdote Eleazar esaki; i esaki mester wòrdu hibá pafó di e kampamentu i wòrdu matá den su presensia.

19:4 Kaba saserdote Eleazar mester kohe un poko di su sanger ku su dede, i sprèngu un poko di su sanger shete biaha den direkshon di e parti dilanti di e tènt di reunion.

19:5 E ora ei e bishé muhé mester wòrdu kimá den su bista; su kueru i su karni i su sanger, ku su mèst, mester wòrdu kimá.

19:6 I e saserdote mester kohe palu di seda, hisòp i hilu skarlata, i tira esaki riba e bishé muhé ku ta kimando.

19:7 E ora ei e saserdote mester laba su pañanan, baña su kurpa den awa i despues bin den e kampamentu, ma e saserdote lo ta impuru te ora nochi sera.

19:8 Esun ku ta kima e bishé muhé tambe mester laba su pañanan den awa i baña su kurpa ku awa, i lo ta impuru te ora nochi sera.

19:9 'Awor un hòmber ku ta limpi lo rekohé e shinishi di e bishé muhé i depositá esaki pafó di e kampamentu na un lugá limpi, i e kongregashon di e yunan di Israel lo warda esaki komo awa pa kita impuresa; ta purifikashon for di piká.

19:10 I esun ku a rekohé e shinishi di e bishé muhé mester laba su pañanan i lo ta impuru te ora nochi sera; i esaki mester ta un statuto perpetuo pa e yunan di Israel i pa e stranhero ku ta keda biba pa un tempu meimei di nan.

19:11 'Esun ku mishi ku kadaver di kualke persona lo ta impuru pa shete dia.

19:12 Esun ei mester purifiká su mes for di impuresa ku e awa riba e di tres dia i riba e di shete dia; e ora ei e lo ta limpi; ma si e no purifiká su mes riba e di tres dia i riba e di shete dia, e lo no ta limpi.

19:13 Ken ku mishi ku un kadaver, kurpa di un hende ku a muri, i no purifiká su mes, ta kontaminá e tabernakel di SEÑOR; i e persona ei mester wòrdu kòrtá kitá for di Israel. Komo ku no a sprèngu e awa di purifikashon riba djé, e lo ta impuru; ainda su impuresa ta riba djé.

19:14 'Esaki ta e lei ora ku un hende muri den un tènt: tur hende ku bin den e tènt i tur hende ku ta den e tènt lo ta impuru pa shete dia.

19:15 I tur wea habrí ku no tin tapadera mará riba djé lo ta impuru.

19:16 'Tambe, ken ku den kunuku habrí mishi ku un hende ku a wòrdu matá ku spada, òf ku a muri un morto natural, òf ku mishi ku wesu di hende, òf ku graf, lo ta impuru pa shete dia.

19:17 'E ora ei pa e hende impuru nan mester kohe un poko di e shinishi di e bishé ku a wòrdu kimá pa purifikashon for di piká, i basha awa ku ta kore riba djé den un wea.

19:18 I un persona limpi mester kohe hisòp i dòp esaki den e awa i sprèngu esaki riba e tènt i riba tur e artíkulonan-di-uzo i riba e personanan ku tabata ayanan, i riba esun ku a mishi ku e wesu, òf riba esun ku a wòrdu matá, òf riba esun ku a muri un morto natural, òf riba e graf.

19:19 E ora ei e persona limpi mester sprèngu esun impuru riba e di tres dia i riba e di shete dia; i riba e di shete dia e mester purifik'é di impuresa; i e mester laba su pañanan i baña su kurpa den awa i lo ta limpi ora nochi sera.

19:20 Ma e hòmber ku ta impuru i no ta purifiká su mes di impuresa, e persona ei mester wòrdu kòrtá kitá for di meimei di e asamblea, pasobra el a profaná e santuario di SEÑOR; nan no a sprèngu e awa di purifikashon riba djé, e ta impuru.

19:21 Asina esaki mester ta un statuto perpetuo pa nan. 'I esun ku sprèngu e awa di purifikashon mester laba su pañanan, i esun ku mishi ku e awa di purifikashon lo ta impuru te ora nochi sera.

19:22 Ademas, tur loke e persona impuru mishi kuné lo ta impuru, i e persona ku mishi kuné lo ta impuru te ora nochi sera.'"

Numbernan 20

20:1 E ora ei e yunan di Israel, henter e kongregashon, a yega na e desierto di Zin, den e promé luna, i e pueblo a keda na Kades. Awor ayanan Miriam a muri i ayanan nan a der'é.

20:2 I no tabatin awa pa e kongregashon, i konhuntamente nan a lanta kontra Moisés i Aaron.

20:3 Asina e pueblo a pleita ku Moisés i a papia, bisando: "Mara nos tambe a peresé dia nos rumannan a peresé dilanti di SEÑOR!

20:4 Pakiko anto bo a trese e asamblea di SEÑOR den e desierto aki pa nos i nos bestianan muri akinan?

20:5 I pakiko bo a hasi nos sali for di Egipto pa trese nos den e lugá malísimo aki? E no ta un lugá di mainshi ni di figo ni di mata di wendrùif ni di granatapel, ni no tin awa pa bebe tampoko."

20:6 E ora ei Moisés i Aaron a sali for di presensia di e asamblea bai na entrada di e tènt di reunion, i a tira nan kurpa abou ku nan kara te na suela. Anto e gloria di SEÑOR a paresé na nan.

20:7 I SEÑOR a papia ku Moisés, bisando:

20:8 "Kohe e bara, i abo i bo ruman hòmber Aaron reuní e kongregashon i papia ku e baranka dilanti di nan bista, pa e baranka duna su awa. Asina lo bo hasi awa sali for di e baranka pa nan, i laga e kongregashon i nan bestianan bebe."

H3947 -- "Kohe -> Take
H4294 -- e bara -> the rod
H251 -- , i abo i bo ruman hòmber -> and you and your brother
H175 -- Aaron -> Aaron
H6950 -- reuní -> assemble
H5712 -- e kongregashon -> the congregation
H1696 -- i papia -> and speak
H5553 -- ku e baranka -> to the rock
H5869 -- dilanti di nan bista -> before their eyes
H5414 -- , pa e baranka duna -> that it may yield
H4325 -- su awa -> its water
H3318 -- . Asina lo bo hasi -> . You shall thus bring
H3318 -- awa sali -> forth
H4325 -- awa -> water
H5553 -- for di e baranka -> for them out of the rock
H5712 -- pa nan, i laga e kongregashon -> and let the congregation
H1165 -- i nan bestianan -> and their beasts
H8248 -- bebe -> drink

20:9 Asina Moisés a kohe e bara for di dilanti di SEÑOR, meskos ku El a orden'é.

20:10 Anto Moisés i Aaron a yama e asamblea huntu dilanti di e baranka. I Moisés a bisa nan: "Skucha awor, boso rebeldenan; nos mester hasi awa sali for di e baranka aki pa boso?"

20:11 E ora ei Moisés a hisa su man dal e baranka dos biaha ku su bara i a sali awa na abundansia, i e kongregashon i nan bestianan a bebe.

20:12 Ma SEÑOR a bisa Moisés i Aaron: "Pasobra boso no a kereMi pa santifikáMi den bista di e yunan di Israel, pesei boso lo no hiba e asamblea aki na e tera ku Mi a duna nan."

20:13 Esei tabata e awanan di Meriba, pasobra e yunan di Israel a pleita ku SEÑOR, i El a mustra Su mes santu meimei di nan.

20:14 E ora ei for di Kades Moisés a manda mensaheronan serka rei di Edòm, bisando: "Asina bo ruman Israel ta bisa: 'Bo sa di tur e kontratiempo ku nos a haña nos aden,

20:15 ku nos tatanan a bai Egipto i nos a keda Egipto pa un tempu largu, i e egipsionan a trata malu ku nos i ku nos tatanan.

20:16 Ma ora nos a sklama na SEÑOR, El a tende nos bos i a manda un Angel i a saka nos for di Egipto; ata awor, nos ta na Kades, un stat na frontera di bo teritorio.

20:17 'Pa fabor, laga nos pasa dor di bo tera. Nos no ta bai pasa dor di kunuku ni dor di plantashon di wendrùif; ni nos lo no bebe awa for di pos. Nos ta bai pasa pa e kaminda grandi di rei, sin bira na man drechi ni na man robes, te ora nos pasa bo teritorio.'"

H4994 -- 'Pa fabor -> ‘Please
H5674a -- laga nos pasa -> let us pass
H776 -- dor di bo tera -> through your land
H5674a -- . Nos no ta bai pasa -> . We will not pass
H5674a -- dor di -> through
H7704 -- kunuku -> field
H3754 -- ni dor di plantashon di wendrùif -> or through vineyard
H8354 -- ; ni nos lo no bebe -> we will not even drink
H4325 -- awa -> water
H875 -- for di pos -> from a well
H1980 -- . Nos ta bai pasa -> . We will go
H4428 -- pa e kaminda -> along the king’s
H1870 -- grandi di rei -> highway
H5186 -- , sin bira -> not turning
H3225 -- na man drechi -> to the right
H8040 -- ni na man robes -> or left
H5704 -- , te ora -> until
H5674a -- nos pasa -> we pass
H5674a -- bo teritorio -> through
H1366 -- bo teritorio -> your territory

20:18 Sinembargo, Edòm a bis'é: "Lo bo no pasa den nos teritorio, pa mi no sali ku spada kontra bo."

20:19 Atrobe e yunan di Israel a bis'é: "Nos lo pasa pa e kaminda grandi, i si ami i mi bestianan bebe di bo awa, e ora ei lo mi paga pa esei. Solamente, pèrmitími pasa na pia, nada mas."

20:20 Ma el a bisa: "Lo bo no pasa." I Edòm a sali kontra djé ku hopi hende i ku man fuerte.

20:21 Asina Edòm a nenga di laga Israel pasa den su teritorio; pesei Israel a bira bai lagu'é.

20:22 Awor ora nan a sali bai for di Kades, e yunan di Israel, esta, henter e kongregashon, a yega Seru Hor.

20:23 E ora ei SEÑOR a papia ku Moisés i Aaron na Seru Hor, na frontera di tera di Edòm, bisando:

20:24 "Aaron lo wòrdu reuní ku su pueblo, pasobra e lo no drenta e tera ku Mi a duna e yunan di Israel, pasobra boso a rebeldiá kontra Mi òrdu na e awanan di Meriba.

20:25 Tuma Aaron ku su yu hòmber Eleazar i hasi nan subi bai Seru Hor,

20:26 i kita Aaron su pañanan, i bisti su yu hòmber Eleazar nan. Asina Aaron lo wòrdu reuní ku su pueblo i lo muri ayanan."

20:27 Asina Moisés a hasi meskos ku SEÑOR a ordená, i nan a subi bai Seru Hor den bista di henter e kongregashon.

20:28 I despues ku Moisés a kita Aaron su pañanan bisti su yu hòmber Eleazar nan, Aaron a muri ayanan riba kabes di e seru. E ora ei Moisés i Eleazar a baha for di e seru.

20:29 I ora henter e kongregashon a mira ku Aaron a muri, henter kas di Israel a yora Aaron trinta dia largu.