Buska den Beibel

Job 10; Job 11; Job 12; Job 13 BSNP Edita

Job 10

10:1 "Mi ta despresiá mi mes bida; lo mi duna rienda suelta na mi keho; lo mi papia den e amargura di mi alma.

10:2 Lo mi bisa Dios: 'No kondenámi; lagami sa pakiko Bo ta pleita ku mi.

10:3 Ta parseBo bon pa oprimí, pa rechasá e obra di Bo mannan i faboresé konseho di e malbado?

10:4 Bo tin wowo di karni? Of Bo ta mira manera hende ta mira?

10:5 Akaso Bo dianan ta manera dianan di hende mortal, òf Bo añanan ta manera añanan di hende,

10:6 ku Bo mester buska mi inikidat i investigá mi piká--

10:7 maske Bo sa ku mi no ta malbado i ku no tin ningun hende ku por libra for di Bo man?

10:8 'Ta Bo man a trahami i a formami kompletamente; i awor Bo kier destruími?

10:9 Kòrda ku Bo a trahami manera klei; i awor Bo kier hasimi bolbe na stòf atrobe?

10:10 Bo no a bashami manera lechi, i kuahami manera keshi?

10:11 Bo no a bistimi ku kueru i karni, i a wef mi pega na otro ku wesu i spir?

10:12 Bo a dunami bida i miserikòrdia, i Bo kuido a preservá mi spiritu.

10:13 'Ma e kosnan aki Bo a skonde den Bo kurason; mi sa ku esaki ta den Bo:

10:14 si mi a peka, lo Bo a tuma nota di mi, i lo no a librami di mi inikidat.

10:15 Si mi ta malbado, ai di mi! I si mi ta hustu mes, mi no ta tribi halsa mi kabes. Mi ta yen di bèrguensa i konsiente di mi miseria.

10:16 I si mi mester a halsa mi kabes, lo Bo a yag riba mi manera un leon; i atrobe lo Bo a mustra Bo poder kontra mi.

10:17 Bo ta bin ku testigunan nobo kontra mi, i ta oumentá Bo rabia riba mi; mi ta hañami den difikultat tras difikultat.

10:18 'Pakiko anto Bo a sakami for di matris? Mara mi a muri sin ku ningun wowo a mirami!

10:19 Lo mi tabata komo si fuera mi no tabata eksistí, hibá di barika pa graf.'

10:20 Mi dianan no ta poko? Lagami na pas, pa mi por tin un tiki konsuelo

10:21 promé ku mi bai--sin bolbe mas-- na e tera di skuridat i sombra profundo,

10:22 un tera mes skur ku skuridat mes, di sombra profundo sin ningun òrdu, kaminda asta lus ta manera skuridat."

Job 11

11:1 E ora ei Zofar e naamatita a kontestá:

11:2 "Akaso un kantidat grandi di palabra mester keda sin wòrdu kontestá, i un hòmber papiadó wòrdu hustifiká?

11:3 Bo gabamentu lo hasi hende keda ketu? I lo bo hasi bofon sin ku ningun hende reprendébo?

11:4 Pasobra bo a bisa: 'Mi siñansa ta puru, i mi ta inosente den bo bista.'

11:5 Ma ohalá ku Dios lo a papia, i habri Su lepnan kontra bo,

11:6 i mustrabo e sekretonan di sabiduria! Pasobra sabiduria sano tin dos banda. Sabi anto ku Dios ta lubidá un parti di bo inikidat.

11:7 "Bo por deskubrí e profundidatnan di Dios? Bo por deskubrí e límitenan di e Todopoderoso?

11:8 Nan ta mes haltu ku e shelunan, kiko bo por hasi? Mas profundo ku Seol, kiko bo por sa?

11:9 Su midí ta mas largu ku mundu, i mas hanchu ku laman.

11:10 "Si E pasa, kohe prezo, i tene rat, ken por strob'E?

11:11 Pasobra E konosé hende falsu, i E ta mira inikidat sin investigá.

11:12 I un hende kabes bashí lo bira inteligente dia ku un yu di buriku di mondi nase hende.

11:13 "Si bo kier prepará bo kurason, i ekstendé bo man na djE;

11:14 si tin inikidat den bo man, tir'é leu for di bo, i no laga maldat keda biba den bo tèntnan.

11:15 Anto, di bèrdat, bo por hisa bo kara sin ningun bèrguensa, i lo bo para firme i sin miedu.

11:16 Pasobra lo bo lubidá bo miseria, i kòrd'é manera awanan ku a kore pasa kaba.

11:17 I bo bida lo ta mas kla ku mèrdia; skuridat lo ta manera mainta.

11:18 E ora ei lo bo konfia, pasobra tin speransa; i lo bo wak rònt i keda trankil di bo.

11:19 Lo bo kai drumi i ningun hende lo no molestiábo, i hopi lo buska bo fabor.

11:20 Ma wowo di e malbadonan lo faya, i lo no tin skapatorio pa nan; i nan speransa ta pa hala nan último rosea."

Job 12

12:1 E ora ei Jòb a kontestá:

12:2 "Di bèrdat anto boso ta e pueblo, i huntu ku boso sabiduria lo muri!

12:3 Ma mi tin inteligensia meskos ku boso; mi no ta inferior na boso. I ken no sa sorto di kosnan manera esakinan?

12:4 "Mi ta un kos di hari pa mi amigunan, esun ku a yama na Dios, i El a kontest'é; e hòmber hustu i perfekto ta un kos di hari.

12:5 Pensamentu di un hende ku ta trankil di djé ta menospresiá kalamidat, komo algu ku a wòrdu prepará pa esnan ku nan pianan ta slep.

12:6 E tèntnan di e destruidónan ta prosperá, i esnan ku ta proboká Dios ta biba den siguridat, den kende nan mannan Dios ta pone abundansia.

12:7 "Ma awor, puntra e bestianan, i laga nan siñabo; i e parhanan di shelu, i laga nan kontabo.

12:8 Of papia ku tera, i lagu'é siñabo; i laga e piskánan di laman splikabo.

12:9 Ken den tur esakinan no sa ku ta e man di SEÑOR a hasi esaki,

12:10 den Kende Su man bida di tur loke ta bibu ta, i e rosea di henter humanidat?

12:11 No ta orea ta tèst palabra, manera shel'i boka ta purba su kuminda?

12:12 Sabiduria ta wòrdu hañá serka e ansianonan, i den bida largu tin komprendementu.

12:13 "Serka Dios tin sabiduria i poder; konseho i komprendementu ta pertenesé na djE.

12:14 Mira, E ta basha abou, i esei no por wòrdu lantá mas; E ta kohe un hende prezo, i no por tin liberashon p'é.

12:15 Mira, E ta wanta e awanan, i nan ta para seka; i E ta laga nan bai, i nan ta inundá tera.

12:16 Serka djE tin forsa i sabiduria sano, esun engañá i e gañadó ta pertenesé na djE.

12:17 E ta hasi konseheronan kana pia abou, i ta hasi huesnan bira hende bobo.

12:18 E ta lòs kadena di reinan, i ta mara un faha na nan hep.

12:19 E ta hasi saserdotenan kana pia abou, i ta tumba e poderosonan.

12:20 E ta kita palabra for di esnan ku ta wòrdu konfiá, i ta kita disernimentu for di e ansianonan.

12:21 E ta drama despresio riba nobelnan, i ta lòs faha di e poderosonan.

12:22 For di skuridat E ta revelá misterionan, i ta trese skuridat profundo na lus.

12:23 E ta engrandesé nashonnan, anto ta destruí nan; E ta hasi nashonnan bira mas grandi, anto ta plama nan.

12:24 E ta kita inteligensia for di e kabesantenan di e pueblonan di tera, i ta hasi nan kana dwal den un lugá desolá, unda no tin kaminda.

12:25 Nan ta kana fula den skuridat sin lus, i E ta hasi nan kana zeilu manera hòmber burachi.

Job 13

13:1 "Ata, mi wowo a mira tur esaki, mi orea a tende i a komprendé esei.

13:2 Loke boso sa mi tambe sa. Mi no ta inferior na boso.

13:3 Ma ami lo kier a papia ku e Todopoderoso, i mi ta deseá di rasoná ku Dios.

13:4 Ma boso ta tapa e bèrdat ku boso mentiranan; boso tur ta dòkternan ku no bal nada.

13:5 Mara boso por a keda ketu, i ku esei lo a bira boso sabiduria!

13:6 Awor tende mi argumento, i skucha e rogamentu di mi lepnan.

13:7 Boso kier papia loke ta inhustu na fabor di Dios, i papia loke ta engañoso na Su fabor?

13:8 Boso kier tuma parti p'E? Boso kier pleita pa Dios?

13:9 Lo ta bon si E skudriñá boso? Boso kier gañ'E, manera boso ta gaña hende?

13:10 E lo reprendé boso sigur, si na sekreto boso mustra parsialidat.

13:11 Su mahestat lo no terorisá boso? I temor di djE lo no kai riba boso?

13:12 Boso dichonan memorabel ta proverbionan di shinishi, boso defensanan ta defensanan di klei.

13:13 "Keda ketu mi dilanti pa mi por papia; anto laga bin riba mi loke mester bin.

13:14 Pakiko mi mester kita mi karni ku mi djentenan, i tuma mi bida den mi man?

13:15 Maske E matami, tòg lo mi konfia den djE. Sinembargo, lo mi defendé mi kamindanan Su dilanti.

13:16 Esaki tambe lo ta mi salbashon, pasobra un hende sin Dios no mag bin den Su presensia.

13:17 Skucha mi palabranan ku atenshon, i laga mi deklarashon yena boso orea.

13:18 At'awor, mi a prepará mi kaso; mi sa ku lo mi wòrdu hustifiká.

13:19 Ken ta esun ku lo pleita ku mi? Pasobra e ora ei lo mi keda ketu i muri.

13:20 "Solamente dos kos no hasi ku mi, e ora ei lo mi no skonde pa Bo:

13:21 kita Bo man for di mi, i no laga temor pa Bo terorisámi.

13:22 E ora ei yama, i lo mi kontestá; òf lagami papia, e ora ei Abo kontestámi.

13:23 Kuantu mi inikidatnan i mi pikánan ta? Hasimi konosé mi transgreshon i mi piká.

13:24 Pakiko Bo ta skonde Bo kara, i ta konsiderámi Bo enemigu?

13:25 Lo Bo spanta un blachi ku a bula bai? Of lo Bo pèrsiguí bagas seku?

13:26 Pasobra Bo ta skirbi kosnan amargo kontra mi, i ta hasimi eredá e inikidatnan di mi hubentut.

13:27 Bo ta pone mi pianan na sepa, i ta opservá tur mi berehanan; Bo ta pone un límite pa mi plant'i pia,

13:28 mientras ku mi ta kabando manera kos putrí, manera un bistí ku mòt a kome.