Buska den Beibel

Eksodo 30; Eksodo 31; Eksodo 32 BSNP Edita

Eksodo 30

30:1 "Ademas, bo mester traha un altar komo un lugá pa kima sensia; bo mester trah'é di palu di akasia.

30:2 Su largura mester ta un kodo i su hanchura un kodo; e mester ta firkant, i su haltura mester ta dos kodo; su kachunan mester forma un solo pida kuné.

30:3 Anto bo mester fur'é ku oro puru, su parti ariba i su bandanan tur rònt i su kachunan; i traha un leishi di oro tur rònt di djé.

30:4 I bo mester traha dos renchi di oro p'é bou di su leishi; traha nan na su dos bandanan--na e bandanan ku ta keda enfrente di otro--i nan mester ta kosnan pa tene e baranan pa kargu'é kuné.

30:5 Tambe bo mester traha e baranan di palu di akasia i fura nan ku oro.

30:6 I bo mester pone e altar aki dilanti di e velo ku ta keda dilanti di e arka di testimonio, dilanti di e propisiatorio ku ta riba e arka di testimonio, kaminda Mi lo reuní ku boso.

30:7 "I Aaron mester kima sensia aromátiko riba djé; e mester kima esaki tur mainta ora ku e ta kòrta mecha di e lampinan.

30:8 I ora ku Aaron ta kòrta mecha di e lampinan ora nochi ta sera, e mester kima sensia. Mester tin sensia perpetuo dilanti di SEÑOR durante di tur boso generashonnan.

30:9 Boso no mag ofresé sensia straño riba e altar aki, ni ofrenda kimá, ni ofrenda di mainshi; i boso no mag basha ofrenda di bibida riba djé.

30:10 I Aaron mester hasi ekspiashon riba e kachunan di e altar un biaha pa aña; e mester hasi ekspiashon riba djé ku e sanger di e ofrenda pa piká di ekspiashon un biaha pa aña durante di tur boso generashonnan. E ta masha santu mes pa SEÑOR."

30:11 Tambe SEÑOR a papia ku Moisés, bisando:

30:12 "Ora bo ta tuma un senso di e yunan di Israel pa konta nan, e ora ei kada un di nan mester duna plaka di reskate pa su alma na SEÑOR, ora bo ta konta nan, pa no tin plaga entre nan ora bo ta konta nan.

30:13 Esaki ta loke kada un ku wòrdu kontá mester duna: mitar siklo, segun e siklo di e santuario (un siklo ta binti gera), mitar siklo komo un ofrenda na SEÑOR.

30:14 Tur hende ku wòrdu kontá, di binti aña p'ariba, mester duna e ofrenda na SEÑOR.

30:15 E riku no mester paga mas, ni e pober no mester paga menos ku e mitar siklo, ora boso duna e ofrenda na SEÑOR pa hasi ekspiashon pa boso alma.

30:16 I boso mester tuma e plaka di ekspiashon for di e yunan di Israel, i duna esaki pa e sirbishi di e tènt di reunion, pa e por ta un konmemorashon pa e yunan di Israel dilanti di SEÑOR, pa hasi ekspiashon pa boso alma."

30:17 I SEÑOR a papia ku Moisés, bisando:

30:18 "Tambe bo mester traha un labamano di bròns, ku su pia di bròns, pa laba; i pon'é entre e tènt di reunion i e altar, i pone awa aden.

30:19 I Aaron ku su yu hòmbernan mester laba nan man i nan pia for di djé;

30:20 ora nan ta drenta e tènt di reunion nan mester laba nan mes ku awa pa nan no muri; òf ora nan ta aserká e altar pa sirbi dor di kima un ofrenda di kandela na SEÑOR.

30:21 Asina nan mester laba nan man i nan pia pa nan no muri; i esaki mester ta un statuto perpetuo pa nan, pa Aaron ku su desendientenan durante di tur nan generashonnan."

30:22 Ademas, SEÑOR a papia ku Moisés, bisando:

30:23 "Kohe tambe pa bo mes e mihó spesereinan: sinku shen siklo di mirra líkido i mitar di e kantidat ei, esta, dos shent'i sinkuenta siklo di kané aromátiko, i dos shent'i sinkuenta siklo di kaña aromátiko,

H3947 -- Kohe -> Take
H7218 -- tambe pa bo mes e mihó -> also for yourself the finest
H1314 -- spesereinan -> of spices
H1865 -- : sinku shen siklo di mirra líkido -> of flowing
H2568 -- sinku -> five
H3967 -- shen -> hundred
H4753 -- mirra -> myrrh
H1314 -- i mitar di e kantidat ei, esta, dos shent'i sinkuenta siklo di kané aromátiko -> ], and of fragrant
H4276 -- mitar -> half
H4276 -- di e kantidat -> as much
H3967 -- , dos shent'i -> two hundred
H2572 -- sinkuenta -> and fifty
H7076 -- kané -> cinnamon
H1314 -- , i dos shent'i sinkuenta siklo di kaña aromátiko -> and of fragrant
H3967 -- dos shent'i -> two hundred
H2572 -- sinkuenta -> and fifty
H7070 -- kaña -> cane

30:24 i sinku shen siklo di kasia, segun e siklo di e santuario, i un hin di zeta di oleifi.

30:25 I ku esakinan bo mester traha un zeta di unshon santu, un meskla di perfume, e obra di un trahadó-di-perfume; e lo ta un zeta santu di unshon.

30:26 I ku esaki bo mester ungi e tènt di reunion i e arka di testimonio,

30:27 i e mesa ku tur su artíkulonan-di-uzo, e kandelá ku su artíkulonan-di-uzo i e altar di sensia,

30:28 i e altar di ofrenda kimá ku tur su artíkulonan-di-uzo i e labamano ku su pia.

30:29 Tambe bo mester konsagrá nan, pa nan por ta masha santu mes; kiko ku bin den kontakto ku nan lo ta santu.

30:30 "I bo mester ungi Aaron ku su yu hòmbernan i konsagrá nan, pa nan sirbiMi komo saserdote.

30:31 Anto bo mester papia ku e yunan di Israel, bisando: 'Esaki mester ta un zeta santu di unshon pa Mi durante di tur boso generashonnan.

30:32 E no mag wòrdu bashá riba kurpa di ningun hende, ni boso no mag traha nada meskos kuné, di e mesun fórmula; e ta santu i e lo ta santu pa boso.

30:33 Ken ku meskla algu paresido, òf ken ku pone algu di djé riba un stranhero, mester wòrdu kòrtá kitá for di su pueblo.'"

30:34 E ora ei SEÑOR a bisa Moisés: "Kohe pa bo mes spesereinan, balsem, onicha i galbanum, spesereinan ku sensia puru; di tur, e mesun kantidat.

30:35 I di esaki bo mester traha sensia, un perfume, e obra di un trahadó-di-perfume, salá, puru i santu.

30:36 I bati poko di djé hasi fini-fini, i pone parti di djé dilanti di e testimonio den e tènt di reunion, kaminda Ami lo reuní ku boso; e lo ta masha santu mes pa boso.

30:37 I e sensia ku bo traha, boso no mester traha di e mesun fórmula pa boso mes; e lo ta santu pa bo pa SEÑOR.

30:38 Ken ku traha algu paresido, pa uza komo perfume, mester wòrdu kòrtá kitá for di su pueblo."

Eksodo 31

31:1 Awor SEÑOR a papia ku Moisés, bisando:

31:2 "Mira, Mi a yama Bezaleel, yu hòmber di Uri, yu hòmber di Hur, di e tribu di Juda, pa nòmber.

31:3 I Mi a yen'é ku e Spiritu di Dios den sabiduria, den komprendementu, den konosementu i den tur sorto di obra,

31:4 pa traha diseñonan pa obra di oro, di plata i di bròns,

31:5 i pa kòrta piedra pa montura, pa graba den palu, pa e traha den tur sorto di obra.

31:6 I mira, Ami mes a nombra huntu kuné Aholiab, yu hòmber di Ahisamak, di e tribu di Dan; i den kurason di tur ku ta eksperto Mi a pone sabiduria, pa nan traha tur loke Mi a ordenábo:

31:7 e tènt di reunion, e arka di testimonio, e propisiatorio riba djé, i tur e artíkulonan-di-uzo di e tènt;

31:8 tambe e mesa ku su artíkulonan-di-uzo, e kandelá di oro puru ku tur su artíkulonan-di-uzo, e altar di sensia;

31:9 tambe e altar di ofrenda kimá ku tur su artíkulonan-di-uzo, e labamano ku su pia;

31:10 tambe e pañanan gewef, e pañanan santu pa saserdote Aaron i e pañanan di su yu hòmbernan, pa nan ehersé e saserdosio aden;

31:11 tambe e zeta di unshon i e sensia aromátiko pa e lugá santu. Nan mester traha esakinan konforme tur loke Mi a ordenábo."

31:12 I SEÑOR a papia ku Moisés, bisando:

31:13 "Ma pa loke t'abo, papia ku e yunan di Israel, bisando: 'Siguramente boso mester warda Mi sabatnan; pasobra esaki ta un señal entre Ami i boso durante di tur boso generashonnan, pa boso sa ku Ami ta SEÑOR, Kende ta santifiká boso.

31:14 'Pesei boso mester warda dia di sabat, pasobra e ta santu pa boso. Esun ku profan'é mester wòrdu matá sigur; pasobra ken ku hasi kualke trabou riba dia di sabat mester wòrdu kòrtá kitá for di meimei di su pueblo.

31:15 Seis dia trabou mag wòrdu hasí, ma e di shete dia tin un sabat di sosiegu kompleto, santu na SEÑOR; ken ku hasi kualke trabou riba dia di sabat mester wòrdu matá sigur.

H8337a -- Seis -> ‘For six
H3117 -- dia -> days
H3117 -- dia -> day
H3117 -- dia -> day
H4399 -- trabou -> work
H6213a -- mag wòrdu hasí -> may be done
H7637 -- , ma e di shete -> but on the seventh
H7676 -- dia tin un sabat -> there is a sabbath
H7677 -- di sosiegu kompleto -> of complete
H7677 -- di sosiegu kompleto -> rest
H6944 -- , santu -> holy
H3605 -- ; ken -> whoever
H6213a -- ku hasi -> does
H3605 -- kualke -> any
H4399 -- trabou -> work
H7676 -- riba dia di sabat -> on the sabbath
H4191 -- mester wòrdu -> shall surely
H4191 -- matá -> be put
H4191 -- matá -> to death

31:16 Pesei e yunan di Israel mester warda sabat, pa selebrá sabat durante di tur nan generashonnan komo un aliansa perpetuo.'

31:17 E ta un señal entre Ami i e yunan di Israel pa semper; pasobra den seis dia SEÑOR a traha shelu i tera, ma riba e di shete dia El a sosegá i a keda refreská."

31:18 I ora ku El a kaba di papia ku Moisés riba Seru Sinaí, El a dun'é e dos tablanan di testimonio, tablanan di piedra, skirbí ku e dede di Dios.

Eksodo 32

32:1 Awor ora ku e pueblo a mira ku Moisés a tarda pa baha for di e seru, e pueblo a reuní rònt di Aaron i a bis'é: "Ban mira, traha pa nos un dios ku lo bai nos dilanti, pasobra e Moisés aki, e hòmber ku a saka nos for di tera di Egipto, nos no sa kiko a para di djé."

32:2 I Aaron a bisa nan: "Kita e renchinan di oro ku tin na orea di boso esposanan, boso yu hòmbernan i boso yu muhénan, i trese nan pa mi."

32:3 E ora ei henter e pueblo a kita e renchinan di oro ku nan tabatin na nan orea i a hiba nan pa Aaron.

32:4 I el a tuma e oro for di nan man, a duna esaki forma ku un hèrmènt pa graba i a traha un bishé bashá kuné. Anto nan a bisa: "Esaki ta bo dios, O Israel, ku a sakabo for di tera di Egipto."

32:5 Awor ora Aaron a mira esaki, el a traha un altar dilanti di e bishé; i Aaron a hasi un proklamashon i a bisa: "Mañan lo tin un fiesta na SEÑOR."

32:6 I su manisé nan a lanta tempran i a ofresé ofrendanan kimá i a trese ofrendanan di pas; i e pueblo a sinta pa kome i bebe i a lanta pa gosa.

32:7 E ora ei SEÑOR a bisa Moisés: "Baha bai mesora, pasobra bo pueblo ku bo a saka for di tera di Egipto a korumpí su mes.

32:8 Masha lihé nan a bandoná e kaminda ku Mi a ordená nan. Nan a traha pa nan mes un bishé bashá, a adorá esaki, a ofresé sakrifisio na djé i a bisa: 'Esaki ta bo dios, O Israel, ku a sakabo for di tera di Egipto!'"

32:9 I SEÑOR a bisa Moisés: "Mi a mira e pueblo aki, i ata, nan ta un pueblo kabesura.

32:10 Pesei awor, lagaMi ketu, pa Mi rabia kima kontra nan i pa Mi destruí nan; i di bo lo Mi traha un nashon grandi."

32:11 E ora ei Moisés a supliká SEÑOR su Dios, i a bisa: "O SEÑOR, pakiko Bo rabia ta kima kontra Bo pueblo ku Bo a saka for di tera di Egipto ku gran poder i ku un man poderoso?

32:12 Pakiko e egipsionan mester bisa: 'Ku mal intenshon El a saka nan pa mata nan den e serunan i pa destruí nan for di riba superfisio di tera'? Bira for di Bo rabia ardiente i kambia Bo idea di hasi daño na Bo pueblo.

32:13 Kòrda riba Abraham, Isaak i Israel, Bo sirbidónan, na kendenan Bo a hura pa Bo mes i kendenan Bo a bisa: 'Lo Mi multipliká boso desendientenan manera e streanan di e shelunan, i henter e tera aki, di kual Mi a papia, lo Mi duna bo desendientenan, i nan lo ered'é pa semper.'"

32:14 Asina SEÑOR a kambia Su idea enkuanto e daño ku El a bisa ku E lo a hasi na Su pueblo.

32:15 E ora ei Moisés a bira baha for di e seru ku e dos tablanan di testimonio den su man, tablanan ku tabata skirbí na tur dos banda; nan tabata skirbí na esun banda i na e otro banda.

32:16 I e tablanan tabata Dios Su obra, i e skirbimentu tabata Dios Su skirbimentu, grabá riba e tablanan.

32:17 Awor ora Josué a tende e zonidu di e pueblo ku tabata grita, el a bisa Moisés: "Tin un zonidu di guera den e kampamentu."

32:18 Ma Moisés a bisa: "No ta zonidu di gritu di viktoria, ni zonidu di gritu di derota; ma ta zonidu di kantamentu mi ta tende."

32:19 I a sosodé ku asina Moisés a yega serka di e kampamentu, el a mira e bishé i e baliamentu; i Moisés su rabia a kima, i el a tira e tablanan for di su man i a kibra nan na pida-pida na pia di e seru.

32:20 I el a kohe e bishé ku nan a traha, a kim'é ku kandela i a mul'é hasié fini-fini, i a stroi e riba superfisio di e awa. I el a hasi e yunan di Israel bebe esaki.

32:21 E ora ei Moisés a bisa Aaron: "Kiko e pueblo aki a hasibo ku bo a trese un piká asina grandi riba nan?"

32:22 I Aaron a bisa: "No laga e rabia di mi señor kima; bo mes konosé e pueblo, ku nan ta lihé pa hasi maldat.

32:23 Pasobra nan a bisami: 'Traha un dios pa nos ku lo bai nos dilanti, pasobra e Moisés aki, e hòmber ku a saka nos for di tera di Egipto, nos no sa kiko a para di djé.'

32:24 I mi a bisa nan: 'Ken ku tin oro, laga nan kit'é.' Asina nan a dunamié, i mi a tir'é den kandela, i ata e bishé aki a sali for di djé."

32:25 Awor ora Moisés a mira ku e pueblo tabata for di kontrol--pasobra Aaron a laga nan sali for di kontrol pa ta un bèrguensa entre nan enemigunan--

32:26 Moisés a bai para den entrada di e kampamentu i a bisa: "Ken ku ta pa SEÑOR, bin serka mi!" I tur e yu hòmbernan di Leví a reuní serka djé.

32:27 I el a bisa nan: "Asina SEÑOR, e Dios di Israel, ta bisa: 'Kada hòmber pone su spada na su kustia, i kana bai bin di entrada pa entrada den e kampamentu, i kada hòmber mata su ruman hòmber i kada hòmber su amigu i kada hòmber su próhimo.'"

32:28 Asina e yu hòmbernan di Leví a hasi konforme e palabra di Moisés, i mas o menos tres mil hòmber di e pueblo a muri e dia ei.

32:29 E ora ei Moisés a bisa: "Konsagrá boso mes awe na SEÑOR--pasobra kada hòmber tabata kontra su yu hòmber i kontra su ruman hòmber--pa E por basha un bendishon riba boso awe."

32:30 I a sosodé ku su manisé Moisés a bisa e pueblo: "Boso a kometé un piká grandi, i awor mi ta bai serka SEÑOR; podisé mi por hasi ekspiashon pa boso piká."

32:31 E ora ei Moisés a bolbe serka SEÑOR i a bisa: "Ai, e pueblo aki a kometé un piká grandi, i nan a traha un dios di oro pa nan mes.

32:32 Ma awor, si ta Bo boluntat, pordoná nan piká--i si no, pa fabor, kitami for di Bo buki ku Bo a skirbi!"

32:33 I SEÑOR a bisa Moisés: "Esun ku a peka kontra Mi, esei lo Mi kita for di Mi buki.

32:34 Ma bai awor, hiba e pueblo kaminda Mi a bisabo. Mira, Mi Angel lo bai bo dilanti; sinembargo, den e dia ku Mi kastigá, lo Mi kastigá nan pa nan piká."

32:35 Asina SEÑOR a kastigá e pueblo pa motibu di loke nan a hasi ku e bishé ku Aaron a traha.