Salmonan 88

BSNP Edita

88:1 O SEÑOR, e Dios di mi salbashon, di dia i anochi mi a sklama Bo dilanti.

88:2 Laga mi orashon yega Bo dilanti; inkliná Bo orea na mi sklamashon!

88:3 Pasobra mi alma tabata yen di angustia, i mi bida a yega serka di Seol.

88:4 Mi ta wòrdu kontá den esnan ku ta baha den pos; mi a bira manera un hende sin forsa,

88:5 bandoná meimei di e mortonan, manera esnan matá, ku ta drumí den nan graf, kendenan Bo no ta kòrda mas, i nan ta kòrtá kitá for di Bo man.

88:6 Bo a ponemi den e pos di mas hundu, den lugánan skur, den e profundidatnan.

88:7 Bo furia tabata pisá riba mi, i Bo a afligími ku tur Bo olanan.

88:8 Bo a alehá mi konosínan leu for di mi; Bo a hasimi un abominashon pa nan. Mi ta tur enserá, i mi no por sali.

88:9 Mi wowo a bira skur pa motibu di aflikshon. O SEÑOR, tur dia mi a sklama na Bo; mi a ekstendé mi mannan na Bo.

88:10 Akaso Bo ta hasi maraviyanan pa e mortonan? E mortonan ta lanta pa alabáBo?

88:11 Bo miserikòrdia ta wòrdu deklará den graf, Bo fieldat den e lugá di destrukshon?

88:12 Bo maraviyanan lo wòrdu hasí konosí den e skuridat, i Bo hustisia den e tera di olvido?

88:13 Ma ami a sklama na Bo pa yudansa, O SEÑOR, i mainta mi orashon ta yega Bo dilanti.

88:14 O SEÑOR, pakiko Bo ta rechasá mi alma? Pakiko Bo ta skonde Bo kara pa mi?

88:15 For di mi hubentut mi tabata afligí i serka di muri. Mi a padesé Bo terornan, mi no por mas.

88:16 Bo rabia ardiente a pasa riba mi; Bo terornan a destruími.

88:17 Henter dia nan tabata tur rònt di mi manera awa; nan a rondonámi kompletamente.

88:18 Bo a alehá stimánan i amigunan leu for di mi; mi konosínan ta den skuridat.