Salmonan 73

BSNP Edita

73:1 Siguramente Dios ta bon pa Israel, pa esnan ku ta di kurason puru!

73:2 Ma pa loke t'ami, mi pia a hera di trompeká; parumpinga mi pasonan a slep.

73:3 Pasobra mi tabata envidioso di e arogantenan, ora mi a mira e prosperidat di e malbadonan.

73:4 Pasobra nan no konosé doló na ora di morto, i nan kurpa ta salú i fuerte.

73:5 Nan no ta pasa trabou manera otro hende; ni nan no ta wòrdu afligí manera otro hende.

73:6 Pesei orguyo ta nan koyar; violensia ta tapa nan manera un bistí.

73:7 Nan wowo ta bul'afó di vèt; e imaginashonnan di nan kurason no tin límite.

73:8 Nan ta hasi bofon, i ku maldat nan ta papia di opreshon; nan ta papia ku arogansia.

73:9 Nan a habri nan boka kontra e shelunan; i nan lenga ta keiru tur rònt di mundu.

73:10 Pesei su pueblo ta bolbe na e lugá aki; i nan ta bebe awanan di abundansia.

73:11 I nan ta puntra: "Ta kon Dios por sa? E Haltísimo tin konosementu?"

73:12 Mira, esakinan ta e malbadonan, ku semper ta trankil; nan rikesa ta oumentá.

73:13 Siguramente ta en bano mi a tene mi kurason puru, i a laba mi mannan den inosensia;

73:14 pasobra henter dia mi a wòrdu afligí, i tur mainta mi a wòrdu kastigá.

73:15 Si mi a bisa: "Lo mi papia asina", mira, lo mi a traishoná e generashon di Bo yunan.

73:16 Ora mi a purba komprendé esaki, el a resultá masha trabahoso pa mi,

73:17 te ora ku mi a drenta den e santuario di Dios; e ora ei mi a bin komprendé nan fin.

73:18 Siguramente Bo ta pone nan den lugánan ku ta slep; Bo ta tira nan abou den destrukshon.

73:19 Mira kon nan a wòrdu destruí den ún momento, kompletamente kitá, eliminá dor di teror!

73:20 Manera un soño ora ku un hende spièrta, asina, O Señor, ora Abo spièrta, lo Bo despresiá nan aparensia.

73:21 Tempu ku mi kurason tabata yen di amargura, i mi tabata kunsumí te den mi higra,

73:22 mi tabata bobo i ignorante; mi tabata manera un bestia Bo dilanti.

73:23 Sinembargo, mi ta konstantemente serka Bo; Bo a kohe mi man drechi tene.

73:24 Ku Bo konseho lo Bo guiami, i despues risibími den gloria.

73:25 Ta ken mi tin den shelu fuera di Bo? I fuera di Bo mi no ta deseá nada riba tera.

73:26 Mi karni i mi kurason por faya, ma Dios ta e fortalesa di mi kurason i mi porshon pa semper.

73:27 Pasobra mira, esnan ku ta leu for di Bo lo peresé; Bo a destruí tur esnan ku ta infiel na Bo.

73:28 Ma pa loke t'ami, ta bon pa mi keda serka di Dios; mi a hasi Señor DIOS mi refugio, pa mi por konta di tur Bo obranan.