Salmonan 68

BSNP Edita

Salmonan 68

68:1 Laga Dios lanta, laga Su enemigunan wòrdu plamá; laga esnan ku ta odi'E hui Su dilanti.

68:2 Meskos ku huma ta wòrdu plamá, plama nan tambe; meskos ku was ta dirti dilanti di kandela, asina laga e malbadonan peresé dilanti di Dios.

68:3 Ma laga e hustunan ta kontentu; laga nan regosihá dilanti di Dios; sí, laga nan gosa di alegria.

68:4 Kanta na Dios, kanta alabansa na Su nòmber; prepará un kaminda grandi pa Esun ku ta kabalgá riba e nubianan, Kende Su nòmber ta SEÑOR, i regosihá Su dilanti.

68:5 Un tata di wérfano i un hues pa biuda, ta Dios den Su habitashon santu.

68:6 Dios ta proveé un kas pa e solitario; E ta saka e prezonan guia nan na prosperidat, ma e rebeldenan ta biba na un tera seku-seku.

68:7 O Dios, tempu ku Bo tabata sali dilanti di Bo pueblo, tempu ku Bo tabata marcha dor di e desierto,

68:8 tera tabata tembla; shelunan tambe tabata gotia awa, den e presensia di Dios, Sinaí mes tabata tembla den e presensia di Dios, e Dios di Israel.

68:9 Bo a laga awaseru abundante basha tur kaminda, O Dios; Bo a konfirmá Bo erensia, tempu ku e tera tabata seku-seku.

68:10 Bo pueblo a bai biba den djé; den Bo bondat, O Dios, Bo a proveé pa e pobernan.

68:11 Señor ta duna e palabra; i esnan ku ta proklamá esaki ta un ehérsito grandi:

68:12 "Reinan di ehérsitonan ta hui, nan ta hui, i esun ku ta keda kas lo parti e botín!"

68:13 Ora boso kai drumi den kuránan di karné, boso ta manera hala di palomba, furá ku plata, i su plumanan ku oro ku ta lombra.

68:14 Tempu ku e Haltísimo a plama e reinan ayanan, sneu tabata kai riba Seru Salmon.

68:15 Un seru di Dios e seru di Basan ta, un seru di hopi kabes e seru di Basan ta.

68:16 O serunan di hopi kabes, pakiko boso ta mira ku envidia na e seru ku Dios a deseá komo Su lugá di biba? Siguramente SEÑOR lo biba ayanan pa semper.

68:17 E garoshinan di Dios ta binti mil, sí, miles i miles; Señor ta meimei di nan, meskos ku na Sinaí, den e lugá santu.

68:18 Bo a subi bai den haltura, Bo a hiba koutiverio komo katibu; Bo a risibí donnan entre hende, sí, entre e rebeldenan tambe, pa SEÑOR Dios por biba ayanan.

68:19 Bendishoná sea Señor, e Dios di nos salbashon, Kende dia tras dia ta karga nos karganan.

68:20 Dios ta un Dios di liberashonnan pa nos; i serka DIOS e Señor tin skapatorio for di morto.

68:21 Siguramente Dios lo plècha kabes di Su enemigunan, e korona di kabes yen di kabei di esun ku ainda ta sigui den su transgreshonnan.

68:22 Señor a bisa: "Lo Mi trese nan bèk for di Basan. Lo Mi trese nan bèk for di e profundidatnan di laman,

68:23 pa bo pia por baña den sanger di bo enemigunan, mientras ku e lenganan di bo kachónan por haña nan porshon for di esei."

68:24 Nan a mira Bo proseshon, O Dios, e proseshon di mi Dios, mi Rei, den e santuario.

68:25 E kantadónan a bai dilanti, tras di nan e músikonan, meimei di nan e birgennan ku tabata toka tamburein.

68:26 Bendishoná Dios den e kongregashonnan, bendishoná SEÑOR, boso ku ta di e fuente di Israel.

68:27 Ata Benjamin, esun di mas chikitu, ta goberná nan, e prensnan di Juda ku nan trupa, e prensnan di Zabulon, e prensnan di Nèftalí.

68:28 Bo Dios a ordená bo forsa; mustra Bo mes fuerte, O Dios, Kende a obra pa nos.

68:29 Pa motibu di Bo tèmpel na Jerusalèm reinan lo trese regalo pa Bo.

68:30 Reprendé e bestianan ku ta den e richinan, e trupa di toro, huntu ku e bishénan di e pueblonan, te ora nan tur someté nan mes ku pidanan di plata; El a plama e pueblonan ku tin delisia den guera.

68:31 Prensnan lo sali for di Egipto; pronto Etiopia lo ekstendé su mannan na Dios.

68:32 Kanta na Dios, O reinonan di tera; kanta alabansa na Señor,

68:33 na Esun ku ta kabalgá riba e shelu di shelunan, kualnan ta for di tempunan antiguo; at'E ta laga Su bos resoná, un bos poderoso.

68:34 Atribuí poder na Dios; Su mahestat ta riba Israel, i Su poder ta den e nubianan.

68:35 O Dios, Bo ta temibel for di Bo santuario. E Dios di Israel, E mes ta duna e pueblonan forsa i poder. Bendishoná sea Dios!David.

Salmonan 67 Salmonan 69