Salmonan 55

BSNP Edita

Salmonan 55

55:1 Skucha mi orashon, O Dios, i no skonde Bo mes pa mi súplika;

55:2 paga atenshon na mi i kontestámi. Mi pensamentunan ta molestiámi, i mi ta masha intrankil,

55:3 pa motibu di e bos di e enemigu, pa motibu di e opreshon di e malbado; pasobra nan ta montoná sufrimentu riba mi, i den rabia nan ta odiami.

55:4 Mi kurason ta kremp di doló den mi, i e terornan di morto a kai riba mi.

55:5 Miedu i temblamentu ta bin riba mi; i horor a poderá di mi.

55:6 I mi a bisa: "Mara mi tabatin hala manera palomba! Lo mi a bula bai i lo mi tabatin sosiegu.

55:7 Mira, lo mi a hui bai leu, lo mi a hospedá den desierto.

55:8 Lo mi a pura bai na mi lugá di refugio leu di bientu duru i for di tempestat."

55:9 Destruí, O Señor, konfundí nan lenga, pasobra mi a mira violensia i pleitu den e stat.

55:10 Di dia i anochi nan ta pasa rònt di e stat riba su murayanan; tin inikidat i tròbel meimei di djé.

55:11 Tin destrukshon meimei di djé; opreshon i engaño no ta kita for di su kayanan.

55:12 No ta un enemigu ta reprochámi, pasobra esei lo mi por a soportá; ni no ta esun ku ta odiami ta halsa su mes kontra mi, pasobra lo mi por a skonde p'é.

55:13 Ma ta abo, un hende meskos ku mi, mi kompañero, i un hende ku mi konosé bon.

55:14 Nos ku tabatin dushi komunion huntu, ku tabata kana bai na e kas di Dios ku e multitut.

55:15 Laga morto kohe nan di sorpresa; laga nan baha bibu den Seol, pasobra tin maldat den nan kas, meimei di nan.

55:16 Ma pa loke t'ami, lo mi sklama na Dios, i SEÑOR lo salbami.

55:17 Atardi, mainta i mèrdia lo mi keha i grita yora, i E lo tende mi bos.

55:18 Na pas E lo redimí mi alma for di e bataya ku ta kontra mi, pasobra esnan ku ta lucha kontra mi ta hopi.

55:19 Dios lo tende i afligí nan-- esun ku ta sinta riba trono for di promé aya-- nan no ta kambia nunka, i nan no tin temor pa Dios.

55:20 Mi kompañero a saka su man kontra esnan ku tabata na pas kuné; el a kibra su aliansa.

55:21 E palabranan di su boka tabata mas suave ku manteka, ma den su kurason tabatin guera; su palabranan tabata mas suave ku zeta, sinembargo, nan tabata spadanan saká for di baliña.

55:22 Tira bo karga riba SEÑOR, i E lo sostenébo; nunka E lo no pèrmití pa e hustu wòrdu moví.

55:23 Ma Abo, O Dios, lo hasi nan baha den e pos di destrukshon; hòmbernan dramadó di sanger i engañoso lo no biba ni mitar di nan dianan. Ma ami lo konfia den Bo.un tera leu". Un Miktam di David, tempu ku e filisteonan a gar'é na Gat.

Salmonan 54 Salmonan 56