Salmonan 49

BSNP Edita

Salmonan 49

49:1 Tende esaki, tur pueblo; skucha, tur habitante di mundu,

49:2 tantu hende umilde komo hende di posishon haltu, riku i pober tur huntu.

49:3 Mi boka lo papia sabiduria; i e meditashon di mi kurason lo ta komprendementu.

49:4 Lo mi inkliná mi orea na un proverbio; lo mi hasi mi charada konosí riba arpa.

49:5 Pakiko lo mi tin miedu den e dianan di atversidat, ora ku e inikidat di mi opresornan ta rondonámi,

49:6 esnan ku ta konfia den nan rikesa, i ta gaba di e abundansia di nan biennan?

49:7 Di ningun manera un hende por redimí su ruman, ni paga Dios plaka di reskate p'é--

49:8 pasobra e redenshon di su alma ta kostoso; e lo no por paga p'é nunka--

49:9 pa e por a sigui biba pa semper i no mira korupshon.

49:10 Pasobra e ta mira ku asta hende sabí ta muri; e bobo i esnan sin sintí ta peresé na e mesun manera, i ta laga nan rikesa pa otronan.

49:11 Nan pensamentu íntimo ta ku nan kasnan t'ei pa semper, nan lugánan di biba pa tur generashon; nan a duna nan terenonan nan mes nòmber.

49:12 Ma hende ku tur su onor no ta permanesé; e ta meskos ku bestia ku ta peresé.

49:13 T'asina ta bai ku e bobonan, i ku nan desendientenan ku ta aprobá nan palabranan.

49:14 Manera karné nan ta destiná pa Seol; morto lo ta nan wardadó; i e rektonan lo goberná riba nan den mainta; Seol lo kaba ku nan aparensia bunita, asina ku nan no tin habitashon.

49:15 Ma Dios lo redimí mi alma for di e poder di Seol, pasobra E lo tumami serka djE.

49:16 No tene miedu ora ku un hende bira riku, ora ku e gloria di su kas oumentá;

49:17 pasobra ora ku e muri, e lo no bai ku nada; su gloria lo no baha su tras.

49:18 Maske e ta bendishoná su alma mientras ku e ta na bida, i maske hende gababo ora bo ta hasi bon na bo mes,

49:19 e lo bai serka e generashon di su tatanan; nunka nan lo no mira e lus.

49:20 Hende ku tur su onor, i tòg sin komprendementu, ta meskos ku bestia ku ta peresé.

Salmonan 48 Salmonan 50