Salmonan 37

BSNP Edita

Salmonan 37

37:1 No kunsumí pa motibu di malbadonan, ni sea envidioso di e hasidónan di inikidat.

37:2 Pasobra pronto nan lo wòrdu kòrtá manera yerba, i nan lo marchitá manera yerba bèrdè.

37:3 Konfia den SEÑOR i hasi loke ta bon; biba den e tera i alimentá bo mes ku Su fieldat.

37:4 Deleitá bo mes den SEÑOR, i E lo dunabo e deseonan di bo kurason.

37:5 Enkomendá bo kaminda na SEÑOR, konfia tambe den djE, i E lo hasié.

37:6 I E lo laga bo hustisia briya manera lus, i bo derecho manera mèrdia.

37:7 Sosegá den SEÑOR, i warda ku pasenshi riba djE; no kunsumí pa motibu di esun ku ta prosperá den su kaminda, pa motibu di e hende ku ta ehekutá plan di maldat.

37:8 Stòp di rabia i laga furia para; no kunsumí--esei ta kondusí na maldat so.

37:9 Pasobra hasidónan di maldat lo wòrdu kòrtá kitá afó; ma esnan ku spera riba SEÑOR lo eredá e tera.

37:10 Pasobra aki poko tempu e malbado lo no t'ei mas; maske kuantu bo buska su lugá, e lo no t'ei.

37:11 Ma e umildenan lo eredá e tera, i lo deleitá nan mes den pas abundante.

37:12 E malbado ta traha kòmplòt kontra e hustu, i ta sera djente kontra djé.

37:13 Señor ta harié, pasobra E ta mira ku su dia ta yegando.

37:14 E malbadonan a saka spada i a span nan bog, pa tira e afligínan abou, i esnan den nesesidat, pa mata esnan ku ta kana den rektitut.

37:15 Nan spada lo drenta nan mes kurason, i nan bognan lo wòrdu kibrá.

37:16 E poko ku e hustu tin ta mihó ku e abundansia di hopi malbado.

37:17 Pasobra brasa di e malbado lo wòrdu kibrá, ma SEÑOR ta sostené e hustu.

37:18 SEÑOR konosé e dianan di e perfektonan; i nan erensia lo keda pa semper.

37:19 Nan lo no keda brongosá den tempu malu; i den dianan di hamber nan lo tin abundansia.

37:20 Ma e malbado lo peresé, i e enemigunan di SEÑOR lo ta manera flor di sabana: nan ta disparsé--manera huma nan ta disparsé.

37:21 E malbado ta fia i no ta paga bèk, ma e hustu tin miserikòrdia i ta duna.

37:22 Pasobra esnan ku E bendishoná lo eredá e tera; ma esnan ku E maldishoná lo wòrdu kòrtá kitá afó.

37:23 E pasonan di un hende ta stablesí dor di SEÑOR, i E tin delisia den su kaminda.

37:24 Maske e trompeká, e lo no kai; pasobra SEÑOR ta sosten'é ku Su man.

37:25 Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.

37:26 Semper e ta miserikòrdioso i ta fia; i su desendientenan lo ta bendishoná.

37:27 Apartá bo mes for di maldat i hasi loke ta bon; asina lo bo biba pa semper.

37:28 Pasobra SEÑOR ta stima hustisia i no ta bandoná Su santunan. Nan ta keda preservá pa semper; ma e desendientenan di e malbado lo wòrdu kòrtá kitá afó.

37:29 E hustunan lo eredá e tera, i lo biba den djé pa semper.

37:30 For di boka di e hustu ta sali sabiduria, i su lenga ta papia hustisia.

37:31 E lei di su Dios ta den su kurason; su pianan no ta slep.

37:32 E malbado ta spioná e hustu, i ta busk'é pa mata.

37:33 SEÑOR no ta lagu'é den su man, ni ta lagu'é keda kondená ora ku e wòrdu huzgá.

37:34 Spera riba SEÑOR i sigui Su kaminda, i E lo halsabo pa eredá e tera; ora ku e malbadonan wòrdu kòrta kitá afó, abo lo mira esaki.

37:35 Mi a mira un hòmber violento i malbado, ku a ekstendé su mes manera un palu nativo, bèrdè bunita.

37:36 Anto el a muri, i ata, e no tabat'ei mas; mi a busk'é, ma e no por a wòrdu hañá.

37:37 Tuma nota di e hende perfekto, i opservá esun ku ta rekto; pasobra e hende di pas lo tin desendiente.

37:38 Ma transgresornan konhuntamente lo wòrdu destruí; e desendientenan di e malbado lo wòrdu kòrtá kitá afó.

37:39 Ma salbashon di e hustunan ta bin for di SEÑOR; E ta nan fortalesa den tempu di angustia.

37:40 I SEÑOR ta yuda nan i ta libra nan; E ta libra nan for di e malbadonan i ta salba nan, pasobra nan ta tuma refugio den djE.

Salmonan 36 Salmonan 38