Numbernan 34

BSNP Edita

Numbernan 34

34:1 E ora ei SEÑOR a papia ku Moisés, bisando:

34:2 "Ordená e yunan di Israel i bisa nan: 'Ora boso drenta tera di Kanaan, esaki ta e tera ku boso lo haña komo erensia, esta, tera di Kanaan, segun su fronteranan.

34:3 'Boso parti pasùit lo ekstendé for di e desierto di Zin, banda di Edòm, i boso frontera pasùit lo ekstendé for di kaminda Laman Salu ta kaba, den direkshon pariba.

34:4 E ora ei boso frontera lo bira for di sùit bai te na e subida di Akrabim, sigui bai Zin, i lo tèrminá pasùit di Kades-barnea, i lo yega te na Hazar-adar, sigui bai Asmon.

34:5 I e frontera lo bira for di Asmon bai na e riu di Egipto i tèrminá na laman.

34:6 'Pa loke ta e frontera pabou, boso lo tin Laman Grandi komo frontera; esaki lo ta boso frontera pabou.

34:7 'I esaki lo ta boso frontera panòrt: boso mester hala boso liña di frontera for di Laman Grandi te na Seru Hor.

34:8 I hala un liña for di Seru Hor te na e entrada di Hamat i e frontera lo tèrminá na Zedad;

34:9 i e frontera lo yega te na Zifron i tèrminá na Hazar-enan. Esaki lo ta boso frontera panòrt.

34:10 'Pa boso frontera pariba boso mester hala un liña for di Hazar-enan te na Sefam,

34:11 i e frontera lo baha bai di Sefam te na Ribla banda pariba di Ain; i e frontera lo baha i yega na e bahada banda pariba di Laman Kineret.

34:12 I e frontera lo baha bai na Jordan i tèrminá na Laman Salu. 'Esaki lo ta boso tera, konforme su fronteranan tur rònt.'"

34:13 Asina Moisés a ordená e yunan di Israel, bisando: "Esaki ta e tera ku boso mester parti pa medio di lòt entre boso komo un propiedat ku SEÑOR a ordená pa duna e nuebe tribunan i mitar.

34:14 Pasobra e tribu di e yu hòmbernan di Ruben a risibí esun di nan, segun e hendenan di e kasnan di nan tatanan, i e tribu di e yu hòmbernan di Gad, segun e hendenan di e kasnan di nan tatanan, i e mitar tribu di Manasés a risibí nan propiedat.

34:15 E dos tribunan i mitar a risibí nan propiedat na e otro banda di Jordan enfrente di Jeriko, bai pariba, den direkshon di kaminda solo ta sali."

34:16 E ora ei SEÑOR a papia ku Moisés, bisando:

34:17 "Esakinan ta e nòmbernan di e hòmbernan ku mester parti e tera pa boso komo erensia: saserdote Eleazar i Josué, yu hòmber di Nun.

34:18 I tuma un lider di kada tribu pa parti e tera komo erensia.

34:19 I esakinan ta e nòmbernan di e hòmbernan: di e tribu di Juda, Kalèb, yu hòmber di Jefone.

34:20 I di e tribu di e yu hòmbernan di Simeon, Semuel, yu hòmber di Amiud.

34:21 Di e tribu di Benjamin, Elidad, yu hòmber di Kislon.

34:22 I di e tribu di e yu hòmbernan di Dan un lider, Buki, yu hòmber di Jogli.

34:23 Di e yu hòmbernan di Jose: di e tribu di e yu hòmbernan di Manasés un lider, Haniel, yu hòmber di Efòd.

34:24 I di e tribu di e yu hòmbernan di Efrain un lider, Kemuel, yu hòmber di Siftan.

34:25 I di e tribu di e yu hòmbernan di Zabulon un lider, Elizafan, yu hòmber di Parnak.

34:26 I di e tribu di e yu hòmbernan di Isakar un lider, Paltiel, yu hòmber di Azan.

34:27 I di e tribu di e yu hòmbernan di Aser un lider, Ahiud, yu hòmber di Selomi.

34:28 I di e tribu di e yu hòmbernan di Nèftalí un lider, Pedael, yu hòmber di Amiud."

34:29 Esakinan ta esnan ku SEÑOR a ordená pa parti e erensia pa e yunan di Israel na tera di Kanaan.

Numbernan 33 Numbernan 35