Mateo 12

BSNP Edita

Mateo 12

12:1 E tempu ei Jesus tabata pasando dor di e kunukunan di mainshi riba dia di Sabat, i Su disipelnan a haña hamber i a kuminsá kita e tapushinan i kome nan.

12:2 Ma ora ku e fariseonan a mira esaki, nan a bis'E: "Mira, Bo disipelnan ta hasi loke Lei no ta pèrmití pa hasi riba dia di Sabat."

12:3 Ma El a bisa nan: "Boso no a lesa kiko David a hasi ora ku é ku esnan ku tabata huntu kuné a haña hamber?

12:4 Kon el a bai den e kas di Dios, i nan a kome e pan konsagrá, loke ni é ni esnan ku tabata huntu kuné no tabatin mag di kome, sino solamente e saserdotenan?

12:5 Of boso no a lesa den Lei, ku riba dia di Sabat e saserdotenan ta profaná Sabat den tèmpel, i tòg nan ta inosente?

12:6 Ma Ami ta bisa boso ku aki tin mas ku e tèmpel.

12:7 Ma si boso tabata sa kiko esaki ta nifiká: 'Mi ta deseá miserikòrdia i no sakrifisio,' boso lo no a kondená e inosentenan.

12:8 Pasobra e Yu di Hende ta Señor di Sabat."

12:9 I El a sali for di einan i a bai den nan snoa.

12:10 I mira, ayanan tabatin un hòmber, kende tabatin un man seku. I nan a hasiE pregunta, bisando: "Lei ta pèrmití pa kura riba dia di Sabat?"--pa asina nan por a akus'E.

12:11 I El a bisa nan: "Kual di boso, si e tin ún karné i esaki kai den pos riba dia di Sabat, lo no gar'é i sak'é afó?

12:12 Awor, kuantu mas un hende bal kompará ku un karné! Asina anto, Lei ta pèrmití pa hasi bon riba dia di Sabat."

12:13 E ora ei El a bisa e hòmber: "Rèk bo man!" I e hòmber a rèk su man, i su man a bira bon meskos ku e otro.

12:14 Ma e fariseonan a sali bai, i a konsultá huntu kontra djE, kon nan lo por destruiE.

12:15 Ma Jesus, sabiendo esaki, a retirá for di einan. I hopi hende tabata siguiE, i El a kura nan tur,

12:16 i a taha nan pa no laga sa ken E ta,

12:17 pa asina loke a wòrdu papiá dor di profeta Isaias por wòrdu kumplí, bisando:

12:18 "Ata Mi Sirbidó ku Mi a skohe, Mi Stimá, den Kende Mi alma tin goso; lo Mi pone Mi Spiritu riba djE, i E lo proklamá hustisia na e paganonan.

12:19 E lo no pleita, ni halsa bos; i ningun hende lo no tende Su bos den e kayanan.

12:20 Un richi gekrak E lo no kibra, i un mecha ku ta sende flou E lo no paga, te ora ku E hiba hustisia na viktoria.

12:21 I den Su nòmber e paganonan lo spera."

12:22 E ora ei nan a trese serka djE un hòmber poseí pa demoño, kende tabata siegu i mudo, i El a kur'é, asina ku e hòmber mudo i siegu por a papia i mira.

12:23 I tur e multitutnan a keda strañá i a bisa: "Por ta ku esaki ta e Yu di David?"

12:24 Ma ora ku e fariseonan a tende esaki, nan a bisa: "E hòmber aki ta saka demoño solamente pa medio di Beëlzebú, e prens di demoñonan."

12:25 Ma konosiendo nan pensamentunan, El a bisa nan: "Tur reino ku ta dividí kontra su mes ta keda ruiná; i tur stat òf kas ku ta dividí kontra su mes lo no keda para.

12:26 I si Satanás saka Satanás afó, e ta keda dividí kontra su mes; kon su reino lo keda para anto?

12:27 I si Ami ta saka demoño pa medio di Beëlzebú, ta pa medio di ken boso yu hòmbernan ta saka nan? Pesei eseinan lo ta boso huesnan.

12:28 Ma si Ami ta saka demoño pa medio di e Spiritu di Dios, anto e reino di Dios a yega serka boso.

12:29 "Of kon un hende ta hasi drenta kas di e hòmber fuerte i hòrta su propiedat bai kuné, si e no mara e hòmber fuerte promé? I e ora ei e lo plùnder su kas.

12:30 "Esun ku no ta ku Mi ta kontra Mi; i esun ku no ta rekohé huntu ku Mi ta plama.

12:31 Pesei Mi ta bisa boso, tur piká i blasfemia lo wòrdu pordoná na hende, ma blasfemia kontra e Spiritu lo no wòrdu pordoná.

12:32 I ken ku papia un palabra kontra e Yu di Hende, esei lo wòrdu pordoná na djé; ma ken ku papia kontra Spiritu Santu, esei lo no wòrdu pordoná na djé, ni den e siglo aki, ni den e siglo ku ta bin.

12:33 "Of hasi e palu bon i su fruta bon, òf hasi e palu malu i su fruta malu, pasobra na su fruta bo ta konosé e palu.

12:34 Boso, generashon di víbora, kon boso, siendo malu, por papia loke ta bon? Pasobra for di abundansia di kurason boka ta papia.

12:35 E bon hende, for di su bon tesoro, ta saka loke ta bon; i e mal hende, for di su mal tesoro, ta saka loke ta malu.

12:36 I Ami ta bisa boso, ku hende lo duna kuenta riba e dia di huisio di kada palabra bano ku nan papia.

12:37 Pasobra segun bo palabranan lo bo wòrdu hustifiká, i segun bo palabranan lo bo wòrdu kondená."

12:38 E ora ei algun di e eskribanan i fariseonan a kontest'E, bisando: "Maestro, nos kier mira un señal for di Bo."

12:39 Ma El a kontestá i a bisa nan: "Un generashon malbado i adúltero ta buska un señal; ma ningun señal lo no wòrdu duná na djé, sino solamente e señal di profeta Jonas;

12:40 pasobra meskos ku Jonas tabata tres dia i tres anochi den barika di e mònster di laman, asina e Yu di Hende lo ta tres dia i tres anochi den kurason di tera.

12:41 E hòmbernan di Nínive lo lanta den e huisio huntu ku e generashon aki, i lo konden'é, pasobra nan a repentí dor di e predikashi di Jonas; i mira, mas ku Jonas t'aki.

12:42 E Reina di Sùit lo lanta den e huisio huntu ku e generashon aki i lo konden'é, pasobra el a bin for di e finnan di mundu pa tende e sabiduria di Salomon; i mira, mas ku Salomon t'aki.

12:43 "Awor ora ku e spiritu impuru sali for di un hende, e ta pasa dor di lugánan seku, buskando sosiegu, i e no ta haña sosiegu.

12:44 E ora ei e ta bisa: 'Lo mi bolbe na mi kas for di kaminda mi a sali'; i ora ku e bin e ta haña e kas bashí, barí, i tur na òrdu.

12:45 E ora ei e ta bai i ta hiba huntu kuné shete otro spiritu mas malbado kuné, i nan ta drenta paden i ta keda biba einan; i e último estado di e hende ei ta bai bira pió ku esun promé. Asina lo ta tambe ku e generashon malbado aki."

12:46 Mientras ku E tabata papia ainda ku e multitutnan, ata Su mama i Su ruman hòmbernan tabata pará pafó i tabata kier a papia kunE.

12:47 I un hende a bis'E: "Ata Bo mama i Bo ruman hòmbernan pará pafó i nan kier papia ku Bo."

12:48 Ma El a kontestá esun ku tabata bis'E esei: "Ta ken ta Mi mama i ta ken ta Mi ruman hòmbernan?"

12:49 I mustrando ku Su man riba Su disipelnan, El a bisa: "Ata Mi mama i Mi ruman hòmbernan!

12:50 Pasobra ken ku hasi e boluntat di Mi Tata ku ta den shelu, esei ta Mi ruman hòmber i ruman muhé i mama."

Mateo 11 Mateo 13