Lukas 20

BSNP Edita

Lukas 20

20:1 I a sosodé riba un di e dianan ei, ora ku E tabata siña e pueblo den tèmpel i prediká evangelio, ku e saserdotenan prinsipal i e eskribanan, huntu ku e ansianonan, a bin konfront'E,

20:2 i nan a papia kunE, bisando: "Bisa nos ku ki outoridat Bo ta hasi e kosnan aki, òf ta ken ta esun ku a dunaBo e outoridat aki?"

20:3 I El a kontestá i a bisa nan: "Ami tambe lo hasi boso un pregunta, i boso kontestáMi:

20:4 E boutismo di Juan tabata for di shelu òf for di hende?"

20:5 I nan a deliberá nan ku nan, bisando: "Si nos bisa: 'For di shelu,' E lo bisa: 'Pakiko boso no a ker'é?'

20:6 Ma si nos bisa: 'For di hende,' henter e pueblo lo piedra nos mata, pasobra nan ta konvensí ku Juan tabata un profeta."

20:7 I nan a kontestá ku nan no tabata sa for di unda esaki a bin.

20:8 I Jesus a bisa nan: "Ami tampoko lo no bisa boso ku ki outoridat Mi ta hasi e kosnan aki."

20:9 I El a kuminsá konta e pueblo e parábola aki: "Un hòmber a planta un kunuku di wendrùif i a hür é ku kunukeronan i a bai hasi un biahe pa un tempu largu.

20:10 I ora tempu di kosecha a yega, el a manda un esklabu serka e kunukeronan pa nan dun'é un parti di e frutanan di e kunuku di wendrùif; ma e kunukeronan a batié i a mand'é bai man bashí.

20:11 I el a bolbe manda un otro esklabu, i nan a bati é tambe, a trat'é na un manera bèrgonsoso i a mand'é bai man bashí.

20:12 I el a bolbe manda un di tres; i nan a heridá esaki tambe, i a sak'é afó.

20:13 "I doño di e kunuku di wendrùif a bisa: 'Kiko lo mi hasi? Lo mi manda mi yu stimá; kisas nan lo respet'é.'

20:14 "Ma ora ku e kunukeronan a mir'é, nan a kuminsá deliberá ku otro, bisando: 'Esaki ta e eredero; laga nos mat'é pa e erensia keda pa nos.'

20:15 I nan a tir'é pafó di e kunuku di wendrùif i a mat'é. "Kiko doño di e kunuku di wendrùif lo hasi ku nan anto?

20:16 E lo bin i destruí e kunukeronan aki i lo duna e kunuku di wendrùif na otronan." I ora nan a tende esaki, nan a bisa: "Ku esei no sosodé nunka!"

20:17 Ma El a wak nan i a bisa: "Kiko ta nifiká anto loke ta pará skirbí aki: 'E piedra ku e trahadónan a rechasá, esaki a bira e piedra-di-skina prinsipal'?

20:18 Ken ku kai riba e piedra ei lo wòrdu kibrá na pida-pida, ma esun ku e kai riba djé, esei e lo plama manera stòf."

20:19 I e eskribanan i e saserdotenan prinsipal tabata buska na e mesun ora ei pa tira man riba djE, ma nan tabatin miedu di e pueblo, pasobra nan a komprendé ku E tabata papia e parábola aki kontra nan.

20:20 I nan tabata ten'E na bista, i tabata manda spionnan, kendenan tabata pretendé di ta hustu, pa nan por gar'E den Su palabranan, pa asina entregu'E na e poder i outoridat di gobernadó.

20:21 I nan a hasiE pregunta, bisando: "Maestro, nos sa ku Bo ta papia i siña korektamente i Bo no ta hasi distinshon di persona, ma ta siña e kaminda di Dios den bèrdat.

20:22 Lei ta pèrmití nos paga belasting na Cesar, sí òf nò?"

20:23 Ma El a komprendé nan triki i a bisa nan:

20:24 "MustraMi un denario. Ken su imagen i inskripshon tin riba djé?" I nan a bisa: "Di Cesar."

20:25 I El a bisa nan: "Anto duna Cesar loke ta di Cesar, i Dios loke ta di Dios."

20:26 I nan no por a gar'E den Su palabranan den presensia di e pueblo; i nan a keda strañá di Su kontesta i a keda ketu.

20:27 Awor algun di e saduseonan, ku ta bisa ku no tin resurekshon, a bin serka djE,

20:28 i nan a hasiE pregunta, bisando: "Maestro, Moisés a skirbi pa nos ku si un hòmber su ruman muri, i esaki tin un esposa, ma ni un yu, su ruman hòmber mester tuma e esposa i lanta desendiente pa su ruman.

20:29 Awor tabatin shete ruman hòmber; i e di promé a tuma un esposa i a muri sin laga ni un yu.

20:30 I e di dos

20:31 i e di tres a tum'é; i di e mesun manera tur shete a muri, sin laga ni un yu.

20:32 Por último e muhé tambe a muri.

20:33 Anto den e resurekshon, esposa di kual di nan lo e ta? Pasobra tur shete tabatin é komo esposa."

20:34 I Jesus a bisa nan: "E yunan di e siglo aki ta kasa i ta wòrdu duná pa kasa,

20:35 ma esnan ku wòrdu konsiderá digno pa tin parti den e siglo ei i den e resurekshon for di e mortonan no ta kasa, ni ta wòrdu duná pa kasa;

20:36 pasobra nan no por muri mas tampoko, pasobra nan ta manera angel, i ta yunan di Dios, siendo yunan di resurekshon.

20:37 Ma ku e mortonan ta wòrdu lantá, esei Moisés tambe a mustra den e Skritura tokante di e mata, kaminda e ta yama Señor e Dios di Abraham, i e Dios di Isaak, i e Dios di Jakòb.

20:38 Awor E no ta e Dios di e mortonan, sino di e bibunan, pasobra pa E tur ta biba."

20:39 I algun di e eskribanan a kontestá i a bisa: "Maestro, Bo a papia bon."

20:40 Pasobra nan no tabata tribi hasiE pregunta tokante di nada mas.

20:41 I El a bisa nan: "Di kon nan ta bisa ku e Cristo ta yu di David?

20:42 Pasobra David mes ta bisa den e buki di Salmonan: 'SEÑOR a bisa mi Señor: "Sinta na Mi man drechi,

20:43 te ora Mi hasi Bo enemigunan un banki pa Bo pianan."'

20:44 Pesei, David ta yam'E 'Señor,' i di kon E por ta su yu?"

20:45 I mientras ku henter e pueblo tabata skucha, El a bisa e disipelnan:

20:46 "Warda boso di e eskribanan ku ta gusta kana rònt ku paña largu bistí, i ku ta gusta saludonan di rèspèt riba plasa, i e mihó asientonan den snoa i e lugánan di onor na bankete,

20:47 ku ta devorá kas di biuda i ta hasi orashonnan largu pa bista di hende; esakinan lo risibí kondenashon mas pisá."

Lukas 19 Lukas 21