Yonas 2

BSNP Edita

Yonas 2

2:1 E ora ei Jonas a hasi orashon na SEÑOR su Dios for di den barika di e piská.

2:2 I el a bisa: "Den mi angustia mi a sklama na SEÑOR, i El a kontestámi. For di e profundidat di Seol mi a sklama pa yudansa, i Bo a tende mi bos.

2:3 Pasobra Bo a tirami den profundidat, te den kurason di e lamannan, i e awanan a rondonámi. Tur Bo ondanan i Bo olanan a pasa riba mi.

2:4 Pesei mi a bisa: 'Mi a wòrdu tirá for di Bo bista. Sinembargo, lo mi hisa mi kara atrobe mira den direkshon di Bo tèmpel santu.'

2:5 Awa a rondonámi te menasá mi bida; e profundidat a sera rònt di mi; yerba di laman tabata tur lorá rònt di mi kabes.

2:6 Mi a baha yega te na e raisnan di e serunan. Tera ku su trankanan a rondonámi pa semper; ma Abo a saka mi bida for di pos, O SEÑOR mi Dios.

2:7 "Ora ku mi a sintimi ta desmayá, mi a kòrda riba SEÑOR; i mi orashon a yega serka Bo, te den Bo tèmpel santu.

2:8 "Esnan ku ta venerá ídolonan sin balor ta bandoná Esun ku tin miserikòrdia ku nan.

2:9 Ma ami lo ofresé sakrifisio na Bo ku bos di gradisimentu. Lo mi kumpli ku mi promesa. Salbashon ta di SEÑOR."

2:10 E ora ei SEÑOR a papia ku e piská, i e piská a saka Jonas bent'é riba tera seku.

Yonas 1 Yonas 3