Job 41

BSNP Edita

41:1 "Bo por hala leviatan trese ariba ku un anzué? Of primi su lenga abou ku un liña?

41:2 Bo por pasa un kabuya den su nanishi? Of traspasá su kakumbein ku un hak?

41:3 Lo e hasi hopi súplika na bo? Of lo e papia palabranan suave ku bo?

41:4 Lo e sera un aliansa ku bo? Lo bo tum'é komo un sirbidó pa semper?

41:5 Lo bo hunga kuné manera ku un parha? Of lo bo mar'é pa bo mucha muhénan?

41:6 E kompañeronan lo negoshá ofer di djé? Nan lo partié entre e komersiantenan?

41:7 Bo por yena su kueru ku harpun, òf su kabes ku lansa di piskadó?

41:8 Pone bo man riba djé; kòrda e bataya; lo bo no hasié mas!

41:9 Mira, bo speransa ta en bano. Lo bo no desmayá djis di wak e so?

41:10 Ningun hende no tin asina un kurashi ku e ta tribi molesti'é; ken anto ta esun ku por para Mi dilanti?

41:11 Ken a dunaMi, ku Mi mester pagu'é bèk? Tur loke tin bou di henter shelu ta di Mi.

41:12 "Lo Mi no keda ketu tokante di e miembronan di su kurpa, ni tokante di su forsa poderoso, ni su kurpa bon formá.

41:13 Ken por kita su bachi? Ken por penetrá su armadura dòbel?

41:14 Ken por habri e portanan di su kara? Rònt di su djentenan tin teror.

41:15 Su skamanan fuerte ta su orguyo, bon será na otro, manera ta ku seyo nan ta será na otro.

41:16 Esun ta asina serka di e otro, ku aire no por pasa meimei di nan.

41:17 Nan ta pegá un na otro; nan ta wantá na otro, i no por wòrdu separá.

41:18 Su nisternan ta saka chispa di lus, i su wowonan ta manera e klèpnan di wowo di mainta.

41:19 For di su boka ta sali flambeunan sendí; chispa di kandela ta spat.

41:20 For di su burakunan di nanishi ta sali huma, manera for di un wea ku ta herebé i richi ku ta kima.

41:21 Su rosea ta sende karbon, i un flam ta sali for di su boka.

41:22 Den su nèk tin forsa, i sustu ta bula su dilanti.

41:23 E ploinan di su karni ta será na otro, firme na su kurpa i inmovibel.

41:24 Su kurason ta duru manera piedra; mes duru ku e piedra parti djabou di mulina.

41:25 Ora ku e lanta su kurpa, e poderosonan ta spanta; pa motibu di e boroto, pániko ta drenta nan.

41:26 E spada ku alkans'é no por hasié nada; ni e lansa, ni e flecha, ni e yabalina.

41:27 E ta konsiderá heru komo yerba seku, i bròns komo palu putrí.

41:28 Flecha no por pon'é hui; piedra di slenger ta bira palu di mainshi seku p'é.

41:29 Klòp ta wòrdu konsiderá komo palu di mainshi seku; e ta hari ora ku e yabalina ta zona.

41:30 Bou di su barika tin manera splenter skèrpi di wea di klei; e ta laga lastronan marká den lodo.

41:31 E ta hasi e profundidatnan herebé manera un wea; e ta hasi laman manera un pòchi di unguente.

41:32 Su tras e ta laga un lastro ku ta lombra; hende lo a kere ku e profundidat tin kabei blanku.

41:33 Nada riba tera no ta manera é, ku a wòrdu trahá sin miedu.

41:34 E ta wak ku menospresio riba tur loke ta haltu; e ta rei riba tur e yunan di orguyo."

Job 40 Job 42