Eksodo 40

BSNP Edita

Eksodo 40

40:1 E ora ei SEÑOR a papia ku Moisés, bisando:

40:2 "Riba e promé dia di e promé luna bo mester lanta e tabernakel di e tènt di reunion.

40:3 I pone e arka di testimonio ayanan i pone e velo di tal manera ku e arka no ta wòrdu mirá.

40:4 I hiba e mesa paden i prepará loke mester tin riba djé, i hiba e kandelá paden i sende su lampinan.

40:5 Ademas, bo mester pone e altar di oro pa sensia dilanti di e arka di testimonio, i pone e velo na entrada di e tabernakel.

40:6 "I pone e altar di ofrenda kimá dilanti di entrada di e tabernakel di e tènt di reunion.

40:7 I pone e labamano entre e tènt di reunion i e altar i pone awa aden.

40:8 I kologá e kortinanan di e plenchi tur rònt i pone e skèrm na entrada di e plenchi.

40:9 "E ora ei bo mester kohe e zeta di unshon i ungi e tabernakel i tur loke tin den djé, i konsagr'é i tur su artíkulonan-di-uzo; i e lo ta santu.

40:10 I ungi e altar di ofrenda kimá i tur su artíkulonan-di-uzo, i konsagrá e altar; i e altar lo ta masha santu mes.

40:11 I ungi e labamano ku su pia i konsagr'é.

40:12 "E ora ei bo mester hiba Aaron ku su yu hòmbernan na entrada di e tènt di reunion i laba nan ku awa.

40:13 I bisti Aaron e pañanan santu i ungié i konsagr'é, pa e sirbiMi komo saserdote.

40:14 I trese su yu hòmbernan i bisti nan nan túnikanan;

40:15 i ungi nan meskos ku bo a ungi nan tata, pa nan sirbiMi komo saserdote; i nan unshon lo kualifiká nan pa un saserdosio perpetuo durante di tur nan generashonnan."

40:16 Asina Moisés a hasi; konforme tur loke SEÑOR a orden'é, asina el a hasi.

40:17 Awor a sosodé ku den e promé luna di e di dos aña, riba e promé dia di e luna, e tabernakel a wòrdu lantá.

40:18 I Moisés a lanta e tabernakel i a pone su pianan, a lanta su tablanan i a pasa su baranan i a lanta su pilarnan.

40:19 I el a habri e tènt ofer di e tabernakel i a pone e kapa pa e tènt riba djé, meskos ku SEÑOR a ordená Moisés.

40:20 E ora ei el a kohe e testimonio i a pon'é den e arka, i a pega e baranan na e arka i a pone e propisiatorio riba e arka.

40:21 I el a hiba e arka den e tabernakel i a kologá e velo di e skèrm di tal manera ku e arka di testimonio no tabata wòrdu mirá, meskos ku SEÑOR a ordená Moisés.

40:22 E ora ei el a pone e mesa den e tènt di reunion, na e banda nòrt di e tabernakel, pafó di e velo.

40:23 I el a pone e pan kla riba djé dilanti di SEÑOR, meskos ku SEÑOR a ordená Moisés.

40:24 E ora ei el a pone e kandelá den e tènt di reunion, enfrente di e mesa, na e banda sùit di e tabernakel.

40:25 I el a sende e lampinan dilanti di SEÑOR, meskos ku SEÑOR a ordená Moisés.

40:26 E ora ei el a pone e altar di oro den e tènt di reunion dilanti di e velo;

40:27 i el a kima sensia aromátiko riba djé, meskos ku SEÑOR a ordená Moisés.

40:28 E ora ei el a kologá e kortina pa entrada di e tabernakel.

40:29 I el a pone e altar di ofrenda kimá dilanti di entrada di e tabernakel di e tènt di reunion, i a ofresé riba djé e ofrenda kimá i e ofrenda di mainshi, meskos ku SEÑOR a ordená Moisés.

40:30 I el a pone e labamano entre e tènt di reunion i e altar, i a pone awa aden pa laba.

40:31 I for di djé Moisés i Aaron ku su yu hòmbernan tabata laba nan man i nan pia.

40:32 Ora nan tabata drenta e tènt di reunion i ora nan tabata aserká e altar, nan tabata laba nan mes, meskos ku SEÑOR a ordená Moisés.

40:33 I el a kologá e kortinanan di e plenchi tur rònt di e tabernakel i e altar, i a kologá e kortina na entrada di e plenchi. Asina Moisés a kaba ku e trabou.

40:34 E ora ei e nubia a tapa e tènt di reunion, i e gloria di SEÑOR a yena e tabernakel.

40:35 I Moisés no tabata por a drenta e tènt di reunion, pasobra e nubia tabata riba e tènt, i e gloria di SEÑOR a yena e tabernakel.

40:36 I ki ora ku e nubia tabata wòrdu lantá for di riba e tabernakel, e yunan di Israel tabata sigui nan kaminda, durante di tur nan biahenan;

40:37 ma si e nubia no a wòrdu lantá, nan no tabata sigui nan kaminda te dia ku e wòrdu lantá.

40:38 Pasobra durante di tur nan biahenan e nubia di SEÑOR tabata riba e tabernakel den dia, i tabatin kandela den e nubia anochi, den bista di henter kas di Israel.

Eksodo 39 Levitiko 1