2 Huan 1

BSNP Edita

2 Huan 1

1:1 E ansiano, Na e señora skohí i su yunan, kendenan mi ta stima den bèrdat; i no ami so, ma tambe tur esnan ku konosé e bèrdat,

1:2 pa kousa di e bèrdat ku ta permanesé den nos i ku lo ta ku nos pa semper:

1:3 Grasia, miserikòrdia i pas lo ta ku nos, di Dios Tata i di Jesu-Cristo, Yu di e Tata, den bèrdat i amor.

1:4 Mi tabata masha kontentu di haña algun di bo yunan ta kana den bèrdat, meskos ku nos a risibí mandamentu di e Tata pa nos hasi.

1:5 I awor mi ta pidibo, señora, no komo si fuera ta un mandamentu nobo mi ta skirbibo, sino esun ku nos tabatin for di prinsipio, ku nos mester stima otro.

1:6 I esaki ta amor, ku nos mester kana segun Su mandamentunan. Esaki ta e mandamentu, meskos ku boso a tende for di prinsipio, ku boso mester kana aden.

1:7 Pasobra hopi gañadó a sali bai den mundu, esnan ku no ta rekonosé ku Jesu-Cristo a bin den karni. Esaki ta e gañadó i e anti-cristo.

1:8 Mira bon pa boso mes, pa boso no pèrdè loke nos a alkansá, ma pa boso risibí un rekompensa kompleto.

1:9 Ken ku bai muchu leu i no ta permanesé den e siñansa di Cristo, no tin Dios; esun ku ta permanesé den e siñansa, esei tin tantu e Tata komo e Yu.

1:10 Si un hende bin serka boso i no ta trese e siñansa aki, no risibié den boso kas, i no yam'é bonbiní;

1:11 pasobra esun ku ta yam'é bonbiní ta partisipá den su obranan malu.

1:12 Siendo ku mi tin hopi kos di skirbi boso, mi no kier hasi esaki ku papel i enk; ma mi ta spera di bin serka boso i papia kara-kara, pa boso goso sea kompleto.

1:13 E yunan di bo ruman muhé skohí ta saludábo. Amèn.

1 Huan 5 3 Huan 1