2 Korintionan 10

BSNP Edita

2 Korintionan 10

10:1 Awor ami, Pablo, personalmente ta roga boso pa medio di e suavidat i ternura di Cristo--ami ku ta suave ora mi ta kara-kara ku boso, ma for di un distansia masha fuerte mes pa ku boso.

10:2 Mi ta roga boso pa ora mi ta presente mi no tin mester di ta fuerte den e konfiansa ku kual mi tin intenshon di enfrentá algun hende ku ta kere ku nos ta kana segun karni.

10:3 Pasobra maske nos ta kana den karni, nos no ta batayá segun karni,

10:4 pasobra e armanan ku nos ta batayá kuné no ta karnal, ma poderoso den Dios pa basha e fòrtinan abou,

10:5 i pa destruí spekulashonnan i tur arogansia ku ta wòrdu lantá kontra e konosementu di Dios, hibando den koutiverio tur pensamentu, pa hasi nan obedesido na Cristo,

10:6 i nos ta kla pa kastigá tur desobedensia, unabes ku boso obedensia ta kompleto.

10:7 Boso ta wak kosnan segun nan aparensia. Si un hende ta konvensí den su mes ku e ta di Cristo, lagu'é bolbe konsiderá esaki den su mes, ku meskos ku e ta di Cristo, nos tambe ta.

10:8 Pasobra maske mi gaba un poko mas di nos outoridat, ku Señor a duna pa edifiká boso i no pa destruí boso, lo mi no keda brongosá,

10:9 pasobra mi no kier parse komo si fuera mi kier spanta boso ku mi kartanan.

10:10 Pasobra nan ta bisa: "Su kartanan ta duru i fuerte, ma su presensia personal no ta impreshoná, i su manera di papia ta despresiabel."

10:11 Laga tal persona konsiderá esaki, ku loke nos ta den palabra pa medio di karta ora nos ta ousente, nos ta tambe den echo ora nos ta presente.

10:12 Pasobra nos no ta tribi di konta òf kompará nos mes ku algun di esnan ku ta rekomendá nan mes; ma ora nan midi nan mes ku nan mes, i kompará nan mes ku nan mes, nan ta sin komprendementu.

10:13 Ma nos no kier gaba fuera di midí, sino denter di e midí di e teritorio ku Dios a duna nos komo midí, esta, pa yega te serka boso.

10:14 Pasobra nos no ta pasa nos límite, komo si fuera nos no a alkansá boso, pasobra ta nos tabata e proménan ku a yega te serka boso ku e evangelio di Cristo;

10:15 sin gaba di kosnan fuera di midí, esta, den e obranan di otro hende, ma ku e speransa, ku segun ku boso fe a krese, nos lo wòrdu engrandesé mas ainda serka boso den nos mes teritorio,

10:16 pa prediká e evangelio den e regionnan mas leu di boso, i pa no gaba den loke a wòrdu kumplí riba teritorio di otro hende.

10:17 Ma esun ku ta gaba, lagu'é gaba den Señor.

10:18 Pasobra no t'esun ku ta rekomendá su mes ta keda aprobá, ma esun ku Señor ta rekomendá.

2 Korintionan 9 2 Korintionan 11