1 Samuel 8

BSNP Edita

1 Samuel 8

8:1 I a sosodé ku ora Samuel a bira bieu, el a nombra su yu hòmbernan komo hues riba Israel.

8:2 Awor nòmber di su primogénito tabata Joel, i nòmber di esun di dos, Abias; nan tabata huzga na Beerseba.

8:3 Sinembargo, su yu hòmbernan no a kana den su pasonan, ma a desviá bai tras di ganashi desonesto i a tuma plaka pasá bou di mesa i a pèrvèrtí hustisia.

8:4 E ora ei tur e ansianonan di Israel a bin huntu i a bin serka Samuel na Rama,

8:5 i nan a bis'é: "Mira, bo a bira bieu, i bo yunan no ta kana den bo kamindanan. Awor nombra un rei pa nos pa huzga nos, manera tur otro nashon tin."

8:6 Ma esaki tabata desagradabel den bista di Samuel ora nan a bisa: "Duna nos un rei pa huzga nos." I Samuel a hasi orashon na SEÑOR.

8:7 I SEÑOR a bisa Samuel: "Skucha bos di e pueblo den tur loke nan ta bisabo, pasobra no ta abo nan a rechasá, sino ta Ami nan a rechasá di ta rei riba nan.

8:8 Meskos ku nan a hasi for di dia ku Mi a saka nan for di Egipto te dia djawe--esta, ku nan a bandonáMi i a sirbi otro diosnan--asina nan ta hasiendo ku bo tambe.

8:9 Awor anto, skucha nan bos; sinembargo, spièrta nan solemnemente i konta nan kon e rei ku lo reina riba nan lo hasi."

8:10 Asina Samuel a papia tur e palabranan di SEÑOR ku e pueblo ku a pidié un rei.

8:11 I el a bisa: "Asina e rei ku lo reina riba boso lo hasi: e lo kohe boso yu hòmbernan i pone nan pa su mes den su garoshinan i entre su koredónan di kabai, i nan lo kore dilanti di su garoshinan.

8:12 I e lo nombra pa su mes komandantenan di milnan i di sinkuentanan, i algun pa plug su tera i pa kosechá su kosecha i pa traha su armanan di guera i ekipo pa su garoshinan.

8:13 Tambe e lo kohe boso yu muhénan pa ta trahadó di perfume, i pa ta kòki i trahadó di pan.

8:14 I e lo kohe e mihó parti di boso kunukunan i di boso plantashonnan di wendrùif i boso hòfinan di oleifi duna su sirbidónan.

8:15 I e lo kohe un désimo parti di boso simia i di boso plantashonnan di wendrùif i duna su ofisialnan i su sirbidónan.

8:16 Tambe e lo kohe boso sirbidónan hòmber i boso sirbidónan muhé i boso hobennan di mas mihó i boso burikunan, i uza nan pa hasi su trabou.

8:17 E lo kohe un désimo parti di boso kria di bestia chikitu, i boso mes lo bira su sirbidónan.

8:18 Anto e dia ei boso lo sklama pa motibu di boso rei ku boso a skohe pa boso mes, ma SEÑOR lo no kontestá boso e dia ei."

8:19 Sinembargo, e pueblo a nenga di skucha bos di Samuel; i nan a bisa: "Nò, tòg mester tin un rei riba nos,

8:20 pa nos tambe ta manera tur otro nashon, pa nos rei huzga nos i sali bai nos dilanti i bringa nos batayanan."

8:21 Awor despues ku Samuel a kaba di tende tur e palabranan di e pueblo, el a ripití nan pa SEÑOR tende.

8:22 I SEÑOR a bisa Samuel: "Skucha nan bos i nombra un rei pa nan." E ora ei Samuel a bisa e hòmbernan di Israel: "Kada un bai su mes stat."

1 Samuel 7 1 Samuel 9