Buska den Beibel

Salmo 43; Salmo 44; Salmo 45 BSNP Edita

Salmonan 43

43:1 Vindikámi, O Dios, i defendé mi kaso kontra un nashon pagano; O librami di hende engañoso i inhustu!

43:2 Pasobra Abo ta e Dios di mi fortalesa; pakiko Bo a rechasámi? Pakiko mi ta kana bistí na rou pa motibu di e opreshon di e enemigu?

43:3 O manda Bo lus i Bo bèrdat, laga nan guiami; laga nan tresemi na Bo seru santu i na Bo lugánan di biba.

43:4 E ora ei lo mi bai na e altar di Dios, serka Dios, mi goso i mi delisia; i lo mi alabáBo ku lirio, O Dios, mi Dios.

43:5 Pakiko bo ta abatí, O mi alma? I pakiko bo ta intrankil den mi? Spera riba Dios, pasobra ainda lo mi alab'E, mi Salbador i mi Dios.

Salmonan 44

44:1 O Dios, ku nos orea nos a tende, nos tatanan a konta nos e obra ku Bo a hasi den nan dianan, den e dianan di promé aya.

44:2 Ku Bo mes man Bo a kore ku nashonnan, i Bo a planta nos tatanan; Bo a afligí e pueblonan, i Bo a plama nan tur parti.

44:3 Pasobra no ta pa medio di nan mes spada nan a poderá di e tera, ni tampoko nan mes brasa a libra nan, ma Bo man drechi i Bo brasa, i e lus di Bo presensia, pasobra Bo tabata stima nan.

44:4 Abo ta mi Rei, O Dios; ordená viktorianan pa Jakòb.

44:5 Pa medio di Bo nos lo tumba nos atversarionan; den Bo nòmber nos lo trapa riba esnan ku ta lanta kontra nos.

44:6 Pasobra lo mi no konfia den mi bog, ni mi spada lo no salbami.

44:7 Ma Abo a libra nos for di nos atversarionan, i Bo a brongosá esnan ku ta odia nos.

44:8 Den Dios nos a gloria henter dia, i nos lo alabá Bo nòmber pa semper.

44:9 Sinembargo, Bo a rechasá nos, i a pone nos na bèrguensa, i Bo no ta sali huntu ku nos ehérsitonan.

44:10 Bo ta hasi nos hal'atras pa e atversario; i esnan ku ta odia nos a kohe botín pa nan mes.

44:11 Bo ta entregá nos manera karné ku ta wòrdu matá pa kome, i Bo a plama nos meimei di e nashonnan.

44:12 Bo ta bende Bo pueblo barata, i no a hasi ningun ganashi ku e benta aki.

44:13 Bo a hasi nos un reproche pa nos bisiñanan, un bofon i un despresio pa esnan rònt di nos.

44:14 Bo ta hasi nos un proverbio den e nashonnan, un kos di hari den e pueblonan.

44:15 Henter dia mi desonor ta mi dilanti, i mi umiyashon a poderá di mi,

44:16 pa motibu di e bos di esun ku ta reprochá i blasfemá, pa motibu di e presensia di e enemigu i e vengadó.

44:17 Tur esaki a bin riba nos, ma nos no a lubidáBo, i nos no a kibra Bo aliansa.

44:18 Nos kurason no a hal'atras, ni nos pasonan no a desviá for di Bo kaminda;

44:19 sinembargo, Bo a kibra nos na pida-pida na un lugá pa chakál biba aden, i a tapa nos ku e sombra di morto.

44:20 Si nos a lubidá e nòmber di nos Dios, òf a ekstendé nos mannan na un dios stranhero,

44:21 Dios lo no a deskubrí esaki? Pasobra E konosé e sekretonan di kurason.

44:22 Sí, pa Bo kousa nos ta wòrdu matá henter dia; nos ta wòrdu konsiderá komo karné pa wòrdu matá.

44:23 Lanta, O SEÑOR, pakiko Bo ta drumi? Spièrta, no rechasá nos pa semper.

44:24 Pakiko Bo ta skonde Bo kara, i ta lubidá nos aflikshon i nos opreshon?

44:25 Pasobra nos alma a baha bai te den stòf; nos kurpa ta pega na tera.

44:26 Lanta pa yuda nos, i redimí nos pa motibu di Bo miserikòrdia.e yu hòmbernan di Koré. Un kantika di amor.

Salmonan 45

45:1 Mi kurason ta rebosá di palabranan bon; mi ta dirigí mi poesia na Rei; mi lenga ta pèn di un skirbidó eksperto.

45:2 Bo ta mas bunita ku e yunan di hende; grasia ta bashá riba Bo lepnan; pesei Dios a bendishonáBo pa semper.

45:3 Faha Bo spada na Bo hep, O Esun Poderoso, ku Bo splendor i Bo mahestat!

45:4 I den Bo mahestat sali bai viktoriosamente pa kousa di bèrdat, umildat i hustisia; laga Bo man drechi siñaBo kosnan temibel.

45:5 Bo flechanan ta skèrpi den kurason di e enemigunan di Rei; pueblonan ta kai bou di Bo.

45:6 Bo trono, O Dios, ta pa semper i semper; e sèpter di Bo reino ta un sèpter di hustisia.

45:7 Bo a stima hustisia i a odia maldat; pesei Dios, Bo Dios, a ungiBo ku e zeta di goso, mas ku Bo kompañeronan.

45:8 Tur Bo pañanan tin fragansia di mirra, aloé i kasia; for di palasionan di ivor instrumèntnan di kuèrdè a hasiBo kontentu.

45:9 Yu muhénan di reinan ta entre Bo damanan di onor; e reina ta pará na Bo man drechi, bistí na oro for di Ofir.

45:10 Skucha, O yu muhé, paga atenshon i inkliná bo orea; lubidá bo pueblo i e kas di bo tata;

45:11 e ora ei Rei lo deseá bo bunitesa; pasobra E ta bo Señor, bùig Su dilanti.

45:12 I e yu muhé di Tiro lo bin ku un regalo; e rikunan den e pueblo lo buska bo fabor.

45:13 Den tur su gloria e yu muhé di Rei ta den e parti mas paden di e palasio; su bistí ta gewef ku hilu di oro den djé.

45:14 Nan lo lei é hiba serka Rei, bistí na paña tur bòrdá; e birgennan, su kompañeranan ku ta siguié, lo wòrdu hibá serka Bo.

45:15 Nan lo lei nan hiba paden ku alegria i goso; nan lo drenta e palasio di Rei.

45:16 Bo yunan lo ta na lugá di Bo tatanan; lo Bo nombra nan komo prens den henter e pais.

45:17 Lo Mi hasi ku Bo nòmber ta keda rekòrdá den tur generashon; pesei e pueblonan lo alabáBo pa semper i semper.pa Alamot. Un kantika.