Buska den Beibel

Salmo 123; Salmo 124; Salmo 125 BSNP Edita

Salmonan 123

123:1 Na Bo mi ta halsa mi wowonan, Abo, Kende ta sintá riba Bo trono den e shelunan!

123:2 Mira, manera wowo di sirbidónan ta riba man di nan shon, manera wowo di sirbiente ta riba man di e señora, asina nos wowo ta riba SEÑOR nos Dios, te ora ku E tene miserikòrdia di nos.

123:3 Tene miserikòrdia di nos, O SEÑOR, tene miserikòrdia di nos, pasobra nos a soportá basta menospresio.

123:4 Nos alma a soportá basta bofon di e arogantenan, i despresio di e orguyosonan.

Salmonan 124

124:1 "Si no tabata pa SEÑOR, Kende tabata na nos banda," laga Israel bisa awor:

124:2 "Si no tabata pa SEÑOR, Kende tabata na nos banda, ora hende a lanta kontra nos,

124:3 nan lo a traga nos bibu, ora nan rabia a sende kontra nos.

124:4 E awanan lo a inundá nos, e korida di awa lo a pasa riba nos alma;

124:5 e awanan furioso lo a pasa riba nos alma."

124:6 Bendishoná sea SEÑOR, Kende no a entregá nos komo proi pa nan djente.

124:7 Nos alma a skapa manera un parha for di trampa di yagdó; e trampa a kibra i nos a skapa.

124:8 Nos yudansa ta den e nòmber di SEÑOR, Kende a traha shelu i tera.

Salmonan 125

125:1 Esnan ku ta konfia den SEÑOR ta manera Seru Sion, ku no por wòrdu moví, ma ku ta permanesé pa semper.

125:2 Manera e serunan ta tur rònt di Jerusalèm, asina SEÑOR ta tur rònt di Su pueblo di awor i pa semper.

125:3 Pasobra e sèpter di maldat lo no keda riba tera di e hustunan, pa e hustunan no saka nan man pa hasi maldat.

125:4 Hasi bon, O SEÑOR, na esnan ku ta bon, i na esnan ku ta rekto den nan kurason.

125:5 Ma esnan ku ta desviá pa sigui nan kamindanan trosí, SEÑOR lo saka nan afó huntu ku e hasidónan di inikidat. Pas sea riba Israel!