Buska den Beibel

Job 24; Job 25; Job 26; Job 27; Job 28 BSNP Edita

Job 24

24:1 "Pakiko e Todopoderoso no ta stipulá tempu pa huisio? I pakiko esnan ku konos'E no ta mira Su dianan?

24:2 Tin hende ku ta kita e markanan di tereno; nan ta hòrta i devorá tounan di karné.

24:3 Nan ta bai ku e burikunan di e wérfanonan; nan ta tuma buey di e biuda komo garantia.

24:4 Nan ta pusha esnan den nesesidat for di kaminda; i ta forsa e pobernan di e tera pa skonde huntu.

24:5 Mira, manera buriku di mondi den desierto nan ta sali bai nan trabou, buskando kuminda ku diligensia; e desierto ta produsí kuminda pa nan i pa nan yunan.

24:6 Nan ta kòrta yerba pa nan bestianan den kunuku, i nan ta piki wendrùif ku ta ked'atras den kunuku di e malbado.

24:7 Nan ta pasa nochi sunú, sin paña, i nan no tin nada pa tapa kontra friu.

24:8 Nan ta tur muhá di e awaseru di e serunan haltu, i nan ta brasa baranka pa falta di lugá di skonde.

24:9 Otronan ta ranka e wérfano for di pechu, i for di hende pober nan ta eksigí garantia.

24:10 Nan ta laga nan kana rònt sunú, sin paña. I nan ta kita e bohínan for di esnan ku tin hamber.

24:11 Paden di nan murayanan nan ta produsí zeta; nan ta trapa drùif den e bakinan-di-pèrs-wendrùif, i tòg nan tin set.

24:12 For di e stat hendenan ta keha, i e almanan di esnan heridá ta sklama; sinembargo, Dios no ta hasi kaso di lokura.

24:13 "Tin esnan ku ta rebeldiá kontra e lus; nan no konosé su kamindanan, ni ta keda den su berehanan.

24:14 E matadó ta lanta ora dia ta habri; e ta mata e pobernan i esnan den nesesidat, i anochi e ta meskos ku un ladron.

24:15 I wowo di e kibradó di matrimonio ta warda te ora kuminsá bira skur, i ta bisa: 'Ningun wowo lo mirami.' I e ta disfrasá su kara.

24:16 Den skur nan ta kibra drenta den kasnan, den dia nan ta sera nan mes paden; nan no konosé lus.

24:17 Mainta ta meskos ku skuridat profundo p'é, pasobra e ta kustumbrá ku e terornan di skuridat profundo.

24:18 "Nan ta insignifikante riba e superfisio di awa; nan porshon ta keda maldishoná riba tera. Nan no ta bira den direkshon di e kunukunan di wendrùif.

24:19 Sekura i kalor ta kaba ku e awanan di sneu, asina tambe Seol ta kaba ku esnan ku a peka.

24:20 Un mama lo lubid'é; bichi ta fiesta kuné, te ku ningun hende no ta kòrd'é mas. I maldat lo wòrdu kibrá manera un palu.

24:21 E ta trata e muhé steril na manera inhustu, i no ta hasi bon pa e biuda.

24:22 Ma pa medio di Su poder Dios ta lastra e poderoso bai kuné; e ta lanta bèk, ma ningun hende no tin siguransa di bida.

24:23 E ta duna nan siguridat i nan ta wòrdu sostení, i Su wowo ta riba nan kamindanan.

24:24 Pa poko tempu nan ta halsá, despues nan no t'ei mas; ademas, nan ta wòrdu rebahá, i manera tur kos nan ta wòrdu kòrtá kitá for di kaminda; i nan ta keda kòrtá manera tapushi di mainshi.

24:25 "Awor si no ta asina, ken por proba ku mi ta un gañadó, i mustra ku mi palabranan no bal nada?"

Job 25

25:1 E ora ei Bildad e suhita a kontestá:

25:2 "Dominio i temor ta pertenesé na djE, Kende ta stablesé pas den Su halturanan.

25:3 Su trupanan por wòrdu kontá? Riba ken Su lus no ta sali?

25:4 Kon anto un hende por ta hustu dilanti di Dios? Of kon esun ku a nase di muhé por ta puru?

25:5 Si ni luna no tin splendor, ni e streanan no ta puru den Su bista,

25:6 kuantu menos hende ku ta bichi i yu di hende ku ta bichi!"

Job 26

26:1 E ora ei Jòb a kontestá:

26:2 "Ki yudansa bo ta pa esun ku ta debil! Kon bo a salba e brasa ku ta sin forsa!

26:3 Ki konseho bo a duna esun ku no tin sabiduria! Ki konosementu sano bo a duna na abundansia!

26:4 Na ken bo a dirigí palabra? I spiritu di ken a papia dor di bo boka?

26:5 "E mortonan ta tembla bou di e awanan i nan habitantenan.

26:6 Seol ta sunú Su dilanti, i Abadon no tin ko'i tapa.

26:7 E ta ekstendé e parti nòrt riba espasio bashí, i ta kologá tera riba nada.

26:8 E ta lora e awanan den Su nubianan; tòg e nubia no ta rementá bou di nan peso.

26:9 E ta tapa kara di luna yen, i ta ekstendé Su nubia riba djé.

26:10 El a traha un sírkulo riba superfisio di e awanan, un frontera entre lus i skuridat.

26:11 E pilarnan di shelu ta tembla, i ta keda asombrá pa motibu di Su reprendementu.

26:12 El a kalma laman ku Su poder, i pa medio di Su komprendementu El a destrosá Rahab.

26:13 Pa medio di Su rosea El a dòrna e shelunan; Su man a traspasá e kolebra ku ta hui.

26:14 Mira, esakinan ta djis un parti minimal di Su obranan; i ta un palabra suave asina nos ta tende for di djE! Ma ken por komprendé Su strena poderoso?"

Job 27

27:1 E ora ei Jòb a sigui su diskurso i a bisa:

27:2 "Manera Dios ta biba, Kende a kita mi derecho, i e Todopoderoso, Kende a amargá mi alma,

27:3 pasobra tanten ku tin bida den mi, i e rosea di Dios ta den mi nanishi,

27:4 mi lepnan siguramente lo no papia inhustisia, ni mi lenga lo no ekspresá engaño.

27:5 Nunka di mi bida lo mi bisa ku boso tin rason; te na mi morto lo mi no bandoná mi integridat.

27:6 Mi ta tene mi hustisia duru i no ta lagu'é bai. Mi kurason no ta reprochá ni un di mi dianan.

27:7 "Laga mi enemigu ta manera e malbado, i esun ku lanta kontra mi, manera e inhustu.

27:8 Pasobra kiko ta e speransa di e hende sin Dios, dia ku e wòrdu kòrtá kitá afó, dia ku Dios eksigí su alma?

27:9 Akaso Dios lo skucha su sklamashon dia ku aflikshon bin riba djé?

27:10 Lo e tin delisia den e Todopoderoso? Lo e sklama na Dios tur ora?

27:11 "Lo mi siñabo tokante di e poder di Dios; loke e Todopoderoso tin planiá lo mi no skonde.

27:12 Ata, boso tur a mira esaki; pakiko anto boso ta papia banidat?

27:13 "Esaki ta e porshon for di Dios pa un hòmber malbado, i e erensia ku e opresornan ta risibí for di e Todopoderoso.

27:14 Maske su yunan ta hopi, ta pa spada nan ta destiná; i nunka su desendientenan lo no tin sufisiente pan.

27:15 Esnan di djé ku sobrebibí lo wòrdu derá pa motibu di e plaga, i nan biudanan lo no por yora.

27:16 Maske e montoná plata manera stòf i montoná paña manera klei,

27:17 e lo prepar'é, ma e hustu lo bistié, i e inosente lo parti e plata.

27:18 El a traha su kas manera kas di araña, òf manera un kabaña ku e wardadó di kunuku a traha.

27:19 Riku e ta drumi, ma pa delaster biaha; e ta habri su wowo, i su rikesa no t'ei mas.

27:20 Terornan ta poderá di djé manera un diluvio; anochi tempestat ta hòrt'é bai kuné.

27:21 Bientu di pariba ta hib'é, i e ta disparsé; e ta supl'é kit'é for di su lugá.

27:22 Pasobra e ta dal kontra djé sin miserikòrdia; siguramente e lo purba hui for di su poder.

27:23 Hende lo bati man kontra djé i lo flùit kit'é for di su lugá.

Job 28

28:1 "Siguramente tin un mina kaminda ta haña plata, i un lugá kaminda nan ta refiná oro.

28:2 Heru ta wòrdu saká for di den tera, i for di baranka hende ta dirti koper.

28:3 Hende ta pone un fin na skuridat, i ta buska te na e límite di mas leu e piedra ku ta den skuridat i den e sombra di morto.

28:4 E ta koba un mina leu for di kaminda hende ta biba, na lugánan ku pia di hende a lubidá; nan ta kologá i ta zwai bai bin leu for di hende.

28:5 Tera, for di djé ta sali pan, ma abou e ta wòrdu reboltiá manera kandela.

28:6 Su barankanan ta lugá di haña safiro, i su stòf ta kontené oro.

28:7 E bereha ei ningun parha di rapiña no konosé, ni wowo di falki no a mir'é nunka.

28:8 Bestia sobèrbè no a kana riba djé, ni leon feros no a pasa riba djé.

28:9 E ta pone su man riba piedra duru; e ta bòlter e serunan laga nan raisnan keda bisto.

28:10 E ta kòrta baranka habri kanal, i su wowo ta mira tur sorto di kos presioso.

28:11 E ta traha dam pa e koridanan di awa pa nan no kore mas, i loke ta skondí e ta saka trese na kla.

28:12 "Ma unda sabiduria por wòrdu hañá? I na unda e lugá di komprendementu ta?

28:13 Hende no konosé su balor; tampoko e no ta wòrdu hañá den e tera di e bibunan.

28:14 Profundidat ta bisa: 'E no ta den mi', i laman ta bisa: 'E no ta serka mi.'

28:15 E no por wòrdu kumprá ku oro, ni plata no por wòrdu pisá komo su preis.

28:16 E no por wòrdu balorá na preis di oro di Ofir, di piedranan presioso di òneks òf safiro.

28:17 Ni oro ni kristal no por igual'é, ni e no por wòrdu kambiá pa artíkulonan di oro fini.

28:18 Koral i kristal no mester wòrdu menshoná mes; i e preis di sabiduria ta mas haltu ku esun di pèrla.

28:19 E topasio di Etiopia no por igual'é, ni e no por wòrdu balorá na preis di oro puru.

28:20 "For di unda sabiduria ta bin anto? I na unda e lugá di komprendementu ta?

28:21 Asina e ta skondí pa wowo di tur loke ta biba, i skondí pa e parhanan di shelu.

28:22 Destrukshon i Morto ta bisa: 'Nos a tende un rumor di esaki ku nos orea.'

28:23 Dios ta komprendé su kaminda, i E konosé su lugá.

28:24 Pasobra E ta wak te na e finnan di mundu, i ta mira tur kos bou di e shelunan.

28:25 Ora ku El a duna bientu su peso i a stipulá midí di e awanan,

28:26 ora ku El a traha un lei pa awaseru, i un kaminda pa e rayonan di lamper,

28:27 e ora ei El a mira esaki i a deklar'é; El a stables'é i tambe a skudriñ'é.

28:28 I na hende El a bisa: 'Mira, e temor di SEÑOR, ta esei ta sabiduria; i pa apartá for di maldat ta komprendementu.'"