Buska den Beibel

Job 21; Job 22; Job 23 BSNP Edita

Job 21

21:1 E ora ei Jòb a kontestá:

21:2 "Skucha mi diskurso ku atenshon, i laga esaki ta boso konsuelo.

21:3 Tene pasenshi ku mi, pa mi papia; i despues ku mi kaba di papia, boso por hasi bofon.

21:4 "Akaso mi keho ta kontra hende? I pakiko lo mi no bira impasiente?

21:5 Wak mi, i keda asombrá, i pone man riba boka.

21:6 Asta ora mi kòrda, mi ta keda spantá, i temblamentu ta poderá di mi.

21:7 Pakiko e malbadonan ta sigui biba i bira bieu, sí, bira masha poderoso mes?

21:8 Nan ta mira nan desendientenan stablesí rònt di nan, i nan yunan dilanti di nan wowo.

21:9 Nan kasnan ta sigur i liber di temor; e bara di Dios tampoko no ta riba nan.

21:10 Nan toronan ta engendrá sin faya; nan baka ta wèrp i no ta pèrdè yu.

21:11 Nan ta laga nan chikitunan sali bai manera un tou di karné, i nan yunan ta bula rònt.

21:12 Nan ta kanta ku tamburein i arpa, i ta regosihá riba tono di flùit.

21:13 Nan ta pasa nan dianan den prosperidat, i den un momento nan ta baha bai den Seol.

21:14 I nan ta bisa Dios: 'Bai for di nos! Nos no ta ni deseá e konosementu di Bo kamindanan.

21:15 Ta ken e Todopoderoso ta, ku nos mester sirbiE, i kiko nos ta gana, si nos hasi orashon na djE?'

21:16 Ata, nan prosperidat no ta den nan man; e konseho di e malbado ta leu for di mi.

21:17 "Kuantu biaha lampi di e malbado ta wòrdu pagá? I kuantu biaha kalamidat ta bin riba nan? Dios ta repartí destrukshon den Su rabia?

21:18 Nan ta manera yerba seku dilanti di bientu, i manera bagas ku tempestat ta hiba.

21:19 Nan ta bisa: 'Dios ta warda inikidat di un hende pa su yunan.' Laga Dios paga e hende mes, pa e komprendé.

21:20 Laga su mes wowo mira su destrukshon, i lagu'é bebe di e furia di e Todopoderoso.

21:21 Pasobra kiko ta import'é su kas despues di su morto, ora ku e kantidat di su lunanan wòrdu kòrtá kitá afó?

21:22 "Un hende por siña Dios konosementu, siendo ku ta E ta huzga esunnan di mas haltu?

21:23 Un hende ta muri yen di vigor, siendo henteramente na pas i trankil;

21:24 su kustianan ta yen di vèt, i e tuti di su wesunan ta keda fresku asina,

21:25 mientras ku otro ta muri ku alma amargá, sin ku nunka el a purba algu bon.

21:26 Huntu nan ta drumi den stòf, i bichi ta tapa nan.

21:27 "Mira, mi konosé boso pensamentunan, i e kòmplòtnan ku kualnan boso kier a hasimi daño.

21:28 Pasobra boso ta puntra: 'Unda kas di e hende nobel ta keda? I unda e tènt ta, e lugánan di biba di e malbadonan?'

21:29 Boso no a puntra esnan ku ta pasa riba kaminda? I boso no a aseptá nan testimonio?

21:30 Pasobra e malbado ta reservá pa e dia di kalamidat; nan lo wòrdu saká afó riba e dia di rabia.

21:31 Ken lo konfront'é ku su akshonnan, i ken lo pagu'é pa loke el a hasi?

21:32 Mientras ku e ta wòrdu hibá na graf, hende lo tene warda na su tumba.

21:33 E klòmpinan di tera di e vaye lo tap'é dushi asina; ademas, tur hende lo sigui su tras, mientras ku un kantidat ku no por wòrdu kontá ta bai su dilanti.

21:34 "Kon anto boso por konsolámi ku palabranan bano, siendo ku boso kontestanan ta keda yen di falsedat?"

Job 22

22:1 E ora ei Elifaz e temanita a kontestá:

22:2 "Un hende yen di vigor por ta útil pa Dios? Of un hende sabí por ta útil pa su mes?

22:3 Ki probecho esei lo duna e Todopoderoso, ku bo ta hustu, òf ki ganashi, ku bo ta hasi bo kamindanan perfekto?

22:4 "Ta pa motibu di bo temor p'E ku E ta reprendébo, ku E ta ehekutá huisio kontra bo?

22:5 No t'asina ku bo maldat ta grandi i bo inikidatnan ta sin fin?

22:6 Pasobra sin motibu bo a eksigí garantia for di bo rumannan, i a kita hende su paña, laga nan sunú.

22:7 Esun ku ta kansá bo no a duna awa pa bebe, i esun ku tin hamber bo a nenga pan.

22:8 Ma tera ta pertenesé na e hòmber poderoso, i e hòmber onorabel ta biba riba djé.

22:9 Bo a manda biudanan bai man bashí, i forsa di e wérfanonan a wòrdu kibrá.

22:10 Pesei tin trampanan tur rònt di bo, i spantu repentino ta terorisábo,

22:11 òf skuridat, asina ku bo no por mira, i un abundansia di awa ta tapabo.

22:12 "Dios no ta den e haltura di shelu? Wak tambe e streanan leu aya, kon haltu nan ta!

22:13 I bo ta puntra: 'Kiko Dios sa? E por huzga dor di skuridat profundo?

22:14 Nubianan diki ta tap'E, asina ku E no por mira; i E ta kana riba e sírkulo di shelu.'

22:15 Bo kier sigui e kaminda antiguo ku hòmbernan malbado a kana riba,

22:16 kendenan a wòrdu ranká kitá afó promé ku nan tempu, kende nan fundeshi a wòrdu labá hibá dor di un riu?

22:17 Nan a bisa Dios: 'Bai for di nos!' I 'Kiko e Todopoderoso por hasi nan?'

22:18 Sinembargo, El a yena nan kasnan ku kosnan bon; ma konseho di e malbado ta leu for di mi.

22:19 "E hustunan ta mira esei i ta keda kontentu, i e inosente ta hasi bofon di nan,

22:20 bisando: 'Di bèrdat, nos atversarionan ta kòrtá kitá afó, i kandela a kaba ku nan abundansia.'

22:21 "Entregábo awor i keda na pas kunE; dor di esei bondat lo bin pa bo.

22:22 Pa fabor, aseptá instrukshon for di Su boka, i warda Su palabranan den bo kurason.

22:23 Si bo bolbe serka e Todopoderoso, lo bo wòrdu edifiká; si bo hala inhustisia leu for di bo tènt,

22:24 i pone bo oro den e stòf, i e oro di Ofir meimei di e piedranan di e roinan,

22:25 e ora ei e Todopoderoso lo ta bo oro i plata presioso pa bo.

22:26 Pasobra e ora ei lo bo tin delisia den e Todopoderoso, i lo hisa bo kara na Dios.

22:27 Lo bo hasi orashon na djE, i E lo skuchabo, i lo bo kumpli ku bo promesanan.

22:28 Tambe lo bo deklará algu, i esei lo wòrdu stablesí pa bo, i lus lo briya riba bo kamindanan.

22:29 Ora bo ta abatí, lo bo papia ku konfiansa, i e persona umilde E lo salba.

22:30 E lo libra esun ku no ta inosente, i e lo wòrdu librá pa medio di e limpiesa di bo mannan."

Job 23

23:1 E ora ei Jòb a kontestá:

23:2 "Asta riba e dia djawe mi keho ta rebeldia; Su man ta pisá apesar di mi kehamentu.

23:3 Mara mi por tabata sa unda mi por a hañ'E, pa mi por a yega kaminda E ta sintá!

23:4 Lo mi a pone mi kaso Su dilanti i yena mi boka ku argumentonan.

23:5 Lo mi a haña sa e palabranan ku E lo a kontestámi, i komprendé loke E kier a bisami.

23:6 Akaso E lo a diskutí ku mi den e grandesa di Su poder? Nò, siguramente E lo a paga atenshon na mi.

23:7 Ayanan e hende rekto lo a rasoná kunE; asina lo mi a wòrdu librá pa semper for di mi Hues.

23:8 "Ata, mi ta bai padilanti, ma E no t'ei, i patras, ma mi no por mir'E;

23:9 ora ku E ta traha na man robes, mi no por mir'E; ora ku E bira na man drechi, mi no por mir'E.

23:10 Ma E sa di e kaminda ku mi ta kohe; ora ku E kaba di ponemi na prueba, lo mi sali manera oro.

23:11 Mi pia a sigui firme den Su pasonan; mi a keda riba Su kaminda i no a desviá.

23:12 Mi no a bandoná e mandamentu di Su lepnan; mi a stima e palabranan di Su boka mas ku mi porshon di kuminda di tur dia.

23:13 "Ma E ta úniko, i ken por kambi'E? I loke Su alma ta deseá, ta esei E ta hasi.

23:14 Pasobra E ta kumpli ku loke ta planiá pa mi, i hopi kos asina E tin pensá.

23:15 Pesei mi ta tur spantá den Su presensia; ora mi para pensa, mi ta tembla Su dilanti.

23:16 Pasobra ta Dios a hasi mi kurason desmayá, i ta e Todopoderoso a terorisámi,

23:17 ma mi no ta keda ketu pa motibu di skuridat, ni e skuridat profundo ku ta tapami.