Zakarias 6

BSNP Edita

Zakarias 6

6:1 Awor mi a hisa mi kara atrobe i a wak, i mira, kuater garoshi tabata sali for di meimei di e dos serunan; i e serunan tabata serunan di bròns.

6:2 E promé garoshi tabatin kabai kòrá, e di dos garoshi, kabai pretu,

6:3 e di tres garoshi, kabai blanku, i e di kuater garoshi, kabai pintá i ku hopi forsa.

6:4 Anto mi a papia i a bisa e angel ku tabata papia ku mi: "Kiko esakinan ta, mi señor?"

6:5 I e angel a kontestá i a bisami: "Esakinan ta e kuater spiritunan di shelu, ku ta sali bai despues di a para dilanti di e Señor di henter tera.

6:6 Esun ku tin e kabainan pretu ta sali bai pa e tera di nòrt, i esnan blanku ta sali bai tras di nan, mientras ku esnan pintá ta sali bai pa e tera di sùit.

6:7 "Ora ku esnan fuerte a sali bai, nan tabata purá pa bai patruyá tera." I El a bisa: "Bai, patruyá tera." Asina nan a patruyá tera.

6:8 Anto El a yamami i a papia ku mi, bisando: "Mira, esnan ku ta bai pa e tera di nòrt a kalma Mi furia den e tera di nòrt."

6:9 Tambe e palabra di SEÑOR a yega na mi, bisando:

6:10 "Tuma un ofrenda for di e eksiliadonan for di Heldai, Tobias i Jedaias; i abo bai e mesun dia i drenta den e kas di Josias, yu hòmber di Sofonias, kaminda nan a bolbe for di Babilonia.

6:11 I kohe plata i oro, traha un korona i pon'é riba kabes di Josué, yu hòmber di sumosaserdote Josadak.

6:12 Anto bis'é: 'Asina e SEÑOR di ehérsitonan ta bisa: "Mira, un Hòmber, Kende Su nòmber ta Rama, pasobra E lo spreit for di kaminda ku E ta; i E lo traha e tèmpel di SEÑOR.

6:13 Sí, ta E ta Esun ku lo traha e tèmpel di SEÑOR, i ta E lo risibí e onor i lo sinta i goberná riba Su trono. Asina E lo ta un saserdote riba Su trono, i e konseho di pas lo ta meimei di e dos puestonan."'

6:14 Awor e korona lo bira un rekòrdatorio den e tèmpel di SEÑOR pa Helem, Tobias i Jedaias, i Hen, yu hòmber di Sofonias.

6:15 I esnan ku ta biba leu lo bin i traha e tèmpel di SEÑOR." E ora ei boso lo sa ku e SEÑOR di ehérsitonan a mandami serka boso. I esaki lo sosodé si boso obedesé SEÑOR boso Dios kompletamente.

Zakarias 5 Zakarias 7