E Kanto di tur Kanto 8

BSNP Edita

E Kanto di tur Kanto 8

8:1 "O, si bo tabata manera un ruman hòmber pa mi, ku a bebe na e pechunan di mi mama. Si mi a hañabo pafó, lo mi a sunchi bo; i ni un hende lo no a despresiámi.

8:2 Lo mi a guiabo i hibabo den kas di mi mama, kende a instruími; lo mi a dunabo biña ku speserei bebe for di e djus di mi granatapelnan.

8:3 Laga su man robes ta bou di mi kabes, i su man drechi brasami."

8:4 "Mi kier pa boso hura, O yu muhénan di Jerusalèm, no lanta ni spièrta mi amor, te ora ku e ta deseá esaki."

8:5 "Ta ken esaki ta ku ta subi bin for di desierto, mientras ku e ta lèn riba su stimá?" "Bou di e palu di apel mi a lantabo for di soño; ayanan bo mama tabatin doló pa bo, ayanan e tabatin doló i a duna lus na bo.

8:6 Ponemi manera un seyo riba bo kurason, manera un seyo riba bo brasa. Pasobra amor ta mes fuerte ku morto, yalursheit ta mes severo ku Seol; su flamnan ta flamnan di kandela, e flam di SEÑOR.

8:7 Hopi awanan no por paga amor, ni riunan lo no pasa ofer di djé; si un hende duna tur e rikesanan di su kas pa amor, tòg esaki lo wòrdu despresiá kompletamente."

8:8 "Nos tin un ruman muhé chikitu, i e no tin pechu; kiko nos lo hasi pa nos ruman muhé riba e dia ku un hende pidi p'é?

8:9 Si e ta un muraya, nos lo traha un defensa di plata riba djé; ma si e ta un porta, nos lo ser'é aden ku tablanan di seda."

8:10 "Mi tabata un muraya, i mi pechunan tabata manera toren; e ora ei mi a bira den su bista manera un hende ku ta haña pas.

8:11 Salomon tabatin un kunuku di wendrùif na Baal-hamon; el a konfia e kunuku di wendrùif na kuidadónan; kada un mester a trese mil siklo di plata pa su fruta.

8:12 Mi mes kunuku di wendrùif ta na mi disposishon; e mil siklonan ta pa bo, Salomon, i dos shen ta pa esnan ku ta kuida su fruta."

8:13 "O abo ku ta sinta den e hòfinan, mi kompañeronan ta skucha pa tende bo bos; lagami tend'é!"

8:14 "Pura, mi stimá, i sea manera un gasèl òf un biná yòn riba e serunan di speserei."

E Kanto di tur Kanto 7 Isaias 1